Sopo 18 - Tosi Tapu

Masau a Pilitate kia Sopo

¹ Na masau loa Pilitate mei Suake, o pati :

² E kotou fakagato loa afea a masau ana ? Ko afea e kotou tali ai loa ke kau masau ?

³ Kolea e kotou tuku ai a Sopo ke tio kia tatou ofaipe ni manu ? Pe kotou tio mai e tou valelea ?

⁴ Ti ko koe, ei Sopo, ko lou ita e veli kiate koe totonu. Pe tonu ke liliu le malama nei o toafa o tupu ko koe ? Pe tonu ke pupuli a utu mei olatou tuulaga ?

⁵ E puli loa le malama o le tagata agaveli, Ti e mate loa le ula o lana afi.

⁶ E fakapouli loa le malama i lona falela, Ti e mate loa lona malama i ona aluga.

⁷ E gaegae loa lona saele makeke ; Ti e logo ai lana kataki, e siga loa a ia.

⁸ Talie kua teki ona vae ki se kupega, Ti kua saele a ia i pu o le kupega.

⁹ E pikiia lona mulivae i le masele, Ti e visia a ia i le kupega ;

¹⁰ E munia le va o le masele i le kele, Ti e tuu le masele i lona ala.

¹¹ E fakatasi ni nea fakaii kiate ia, Ti e lotou takatakai a ia, mo tuli a ia.

¹² E kai e le pakupaku lona makeke, Ti e nofo le mativa i ona tafa.

¹³ E kai e ia a koga o lona kili, Ti e kai lona tino e le uluaki tupu o le mate.

¹⁴ E taaki a ia mei lona fale leia na fimalie ai, O ave ki le sau o le fenua o le kau mate.

¹⁵ E leaise nofo se tasi o lona famili i lona falela ; Ti e laku loa le sufele ki lona nofoaga.

¹⁶ E malo loa ona aka i lalo o le kele, O kaku ki ona laa i aluga.

¹⁷ E leaise toe manatui loa a ia i le malama nei, Ti e leaise toe too lona igoa i se ganea.

¹⁸ E tulei loa a ia mei le malama ki le fakapouli, Ti e kapu loa a ia mei le malama nei.

¹⁹ E leaise maua loa e ia se vosa pe ko se makopuna i lona kakai, Ti e leaise toe mauli loa se tasi i lona famili katoa.

²⁰ E ofolele loa tautupu ki muli i lona maumau, Kae i loa le tautupu o le temi lena.

²¹ Ko lena le ikuaga o le tagata agaveli, Ko lena le ikuaga o le tagata leia e leaise iloa ia le Atua.