Sopo 17 - Tosi Tapu

¹ Kua faigataa laku tukumanava, Ti kua oki oku aso ; Kua talitali mai le tanuma kiate au.

² Kua takatakai au e ni kau gologolo, Ti e tonu ke tio oku mata ki alatou lauveli.

³ Ei Atua, ke ke liliu ko loku avoka i ou tafa, Talie ko ai loa iate koe e tali ia ke tuu mai kiate au ?

⁴ Talie kua ke tapono lolatou loto ki le atamai ; Koia e leaise ke tuku ai loa ke lotou malo.

⁵ E lotou faipe le tagata o le taagapati ; E fakaafe e ia ona kaukaunea ke vaevae mo ia lana nea kai, Kae tiaki e ia ana fanau totonu ke mamate.

⁶ Kua fakatauga e le kakai alatou lau kiate au, Ti kua kau liliu ko se nea fakalialia ki olatou mata.

⁷ Kua fakapouli loku mata i le lasi o loku mamae, Ti kua fai loku tino katoa pe se malu.

⁸ E ofolele le kau agatonu i loku malaia, Ti e tio noa latou ala e pati e lotou saosaoa : E lotou tio kiate au ofaipe se tagata agaveli.

⁹ Kae e tuu makeke aifai le tagata agatonu i lona ala, ti e asilisili lotomakeke leia e mea ona lima.

¹⁰ Kae ko koutou fuli, ko oku kaukaunea, ke kotou tafoki mai mei akoutou masau ! Kae e leaise kau maua se tasi leia e poto ia koutou !

¹¹ Kolea ! Kua oki oku aso, kua motusi aku fakatuutuu, A fakatuutuu ala na fakaapele ia loku loto…

¹² Ti e lotou pati ki le pouli ko le ao, Ti kua ofi mai le mafoata, kae koi lolotoga le pouli !

¹³ Ko le nea leia e kau talitali ki ai, ko soku nofoaga i le nofoaga o le kau mate, E kau folasi loa loku moeaga i le fakapouli.

¹⁴ E kau kalaga ki le tanuma : Ko loku tamana a koe ! Ti e kau kalaga ki ilo : Ko loku tinana mo loku tuagaane koutou !

¹⁵ Ko laku amanaki malie, kofea koia a ia ? Ko loku amanaki malie, ko ai e feala ke tio ki ai ?

¹⁶ E ifo loa a ia mo au ki matapa o le nofoaga o le kau mate, Mo ka ma ano fakatasi loa o malolo i le kele.