Sopo 16 - Tosi Tapu

Mamae o Sopo ki ona kaukaunea

¹ Na tali loa a Sopo, o pati :

² Kua tua lasi laku tau logo ki masau ana ; Ko koutou fuli ko ni kau fakapelepele fakatupu itaita.

³ E oki loa afea a masau noa ana ? Kolea le uiga o le ita lena i lau tali ?

⁴ Ko au foki, e mafai ke kau masau ofaipe koutou. Ka na kotou nofo i loku nofoaga : E fakamafaia loa koutou ki ni masau, Ti e kau kalokalo loa loku ulu kia koutou.

⁵ E kau fakamakeke loa koutou ki aku masau, Ti e kau fakafimalie loa koutou ki oku laugutu.

Lauga a Sopo o uiga mo ia

⁶ Kapau e kau masau, e leaise fimalie loa oku mamae, Ti kapau e kau fakaleemu, e leaise lotou puli loa.

⁷ I le aso nei kua too e ia loku makeke katoa, Ti kua tamate e ia loku fale.

⁸ Na ke too au, ke fakamaoki kiate au ; Kua malaga ki aluga loku kala, o tuku veli au i oku mua.

⁹ Kua sae e ia au ti kua tuli e ia au i lona sausau, Kua uuti e ia ona nifo kiate au, Kua osoi e ia au, ti kua sukii e ia au ki ana tio.

¹⁰ Kua fakamaga olatou gutu ke lotou kai au, Kua lotou gologolo kiate au ti kua lotou fepataki oku kalaafau, Ti kua lotou kau fuli kiate au.

¹¹ Kua tuku au e le Atua ke faitalisa ki ai le kau agasala, Ti kua ti e ia au ki lima o le kau agaveli.

¹² Na kau fimalie, kae na lui e ia au ; Na fafa a ia ki loku ua, o fatii au ; Na fai fana a ia kiate au.

¹³ Kua au ana gasau kiate au mei ganea fuli, Ti kua sukii fakaveliveli e ia oku ifiifi, Ti kua fakasali e ia loku au ki le kele.

¹⁴ Kua oso a ia kiate au ofaipe se tagata tau, o taai au, Ti kua kau lavelavea katoa.

¹⁵ E leaise koi mavae le taga mei loku kili, Ti e punou tuumau loku lae ki le efu.

¹⁶ Kua fakalialia oku mata i le lasi o laku tagi, Ti kua teki le malu o le mate i oku laumata.

¹⁷ Kae na leaise uku fua oku lima i le fakamakeke, Ti na mea tuumau laku faikole.

Kole o le mate e Sopo

¹⁸ Ei kele, aua na ke tanu loku toto, Ti ke logo aku kalaga i ganea fuli !

¹⁹ Ko leinei foki, e nofo loku tagata fakamaoki i le lagi, E nofo loku tagata fakamaoki i ganea taualuga.

²⁰ E gologolo oku kaukaunea kiate au, Kae e kau kalaga mo tagi loimata ki loku Atua.

²¹ Ka na mafai ke tuu a ia i le vasaa o le tagata mo le Atua, Ofaipe lona fai i le malama nei i le vasaa o se tagata mo se tasi ake tagata !

²² Talie kua kaku oku fetuu ki le fakaoki, Ti e kau ano loa i se ala leia e leaise kau toe liliu loa mei ai.