Sopo 15 - Tosi Tapu

Fakatatau o Sopo e Elifasi ki se tagata agaveli

¹ Na masau loa Elifasi mei Temane, o pati :

² Pe gali mo le tagata poto se tali vaiga ? Pe fakakita e ia lona fatafata ki le matagi o le potu esite ?

³ Pe puipui a ia e ni masau noa ? Io, e ni masau ala e leaise aoga i se nea.

⁴ Ko koe, e ke maumaui le i ki le Atua, Ti e ke taofi le fia tausi ki le Atua.

⁵ E taki lou gutu e lau agaveli, ti e ke too le masau a le kau kaka.

⁶ E leaise ko au, kae ko lou gutu leia e fakalakasala ia a koe ; Ko ou laugutu ala e fakamaoki kiate koe.

⁷ Pe ko le uluaki tagata a koe na fanaui ? Pe na fanaui a koe i mua o mauga ?

⁸ Pe kua ke logo ki le manatu fakapulipuli a le Atua ? Pe na ke too le poto ma au toka tasi ?

⁹ Kolea e ke iloa kae e leaise motou iloa ? Pe ke matala ki se tasi ake a nea leia e leaise motou matala ki ai ?

¹⁰ E maua ia matou ni ulu sina, mo ni kau matua, Ala kua lasi ake olatou fetuu i la o lou tamana.

¹¹ Pe ke fakanoai a fakapelepele a le Atua kiate koe, Mo masau malilie ala e fai atu kiate koe ?…

¹² E toso a koe kifea e lou loto ? Kolea e ke tio felaaki mai ai kia matou ?

¹³ Pe leaise ke iloa ko le Atua leia e ke lolotoga ita ki ai ? Ti ko ia leia e ke fai ki ai a masau ana !

¹⁴ Kolea le tagata, ke ke pati ai e mea a ia ? Pe feala ke faitotonu leia na tupu mei le fafine ?

¹⁵ Kapau e leaise fanaki le Atua ki lana kau sagato, Ti kapau e leaise mea le lagi i ona mua,

¹⁶ Ti e feaki ake loa le lasi o le fakalialia mo le kelekele o le tagata, Leia e inu ia le agasala ofaipe le vai ?

¹⁷ Fakalogo mai kiate au, e kau fia masau kiate koe ! E kau fakamatala loa kiate koe le nea leia na kau maua,

¹⁸ Le nea leia na fakasa e le kau poto, Le nea leia na lotou maua mei olatou tamana, ti na lotou fakasa ia.

¹⁹ Na lotou maua tefua le fenua, Ti na leikiaise nofo se matapule ia latou.

²⁰ E nofo le tagata agaveli i le mamae i aso fuli o lona mauli, Ti mo fetuu fuli ala kua fakatuutuu kiate ia.

²¹ E kalaga ni leo fakaii ki ona taliga, Ti e saele le tagata maumau kiate ia kae e leaise iloa e ia.

²² E leaise amanaki a ia ke sao i le fakapouli, E tio a ia ki le seleta leia kua fakakaikai kiate ia.

²³ E oso saele a ia o afa se pane, E iloa e ia e talitali le aso o le fakapouli kiate ia.

²⁴ E fakamamae a ia e le mamae mo le tuania, Ti e la takatakai a ia ofaipe se solia a se sau e teuteu ki le tau.

²⁵ Talie na siki e ia lona fa kaito ki le Atua, Ti na fia tuu a ia ki le Mafimafi.

²⁶ Na toa a ia i le makape kiate ia, O fakamalumalu i ana paletau matotolu.

²⁷ Na apele ona mata i le mauli, Ti na kalulu ona vakavaka i gako.

²⁸ Ti e nofo a ia i ni kolo maumau, Mo ni fale kua tiaki, Ti kua vave sosolo fua.

²⁹ E leaise toe mou koloa loa a ia i se aso, ti e leaise fualoa loa lona koloa. E leaise toe mafola loa lona mauiga i le kele.

³⁰ E leaise sao loa a ia mei le fakapouli o le mate, Ti e tutu loa e le afi ona uli, Kae e tamate loa a ia e le Atua ki le tukumanava o lona gutu.

³¹ Kapau e fanaki a ia ki le veli, e faisala a ia, Talie e liliu loa le veli ko lona fakapale.

³² E soko loa le nea lena kae leikiaise tatae ona aso, Ti e leaise toe sesega loa lona taulu.

³³ E fai loa a ia pe se vite leia kua maluluku ona fua kae koi momoto, Pe ko se oliveto leia kua maluluku fuli ona se.

³⁴ Io, e liliu loa o paa le fale o le tagata agaveli, Ti e tutu loa e le afi le falela o le tagata kua fakalialia o tupu ko koloa.

³⁵ Ko leia e fakakaukau ia le veli e fanaui ia le malaia, Ti e fagai e ia i lona manava ni fua ala e kakai ia a ia.