Sopo 14 - Tosi Tapu

Fakasa e Sopo o le noa o le tagata

¹ E tupu le tagata mei le fafine ! E toetoe fua lona mauli, ti e apele a ia i mamae.

² E tupu ake a ia ofaipe se sei laakau, ti e tuuti a ia ki lalo ; E sola a ia ti e puli a ia ofaipe se malu.

³ Ti ko ia leia e leoleo e lou mata ! Ti e ke toso au ki le fakamaauaga !

⁴ Pe feaki loa ke tupu mei se tagata kelekele se tagata mea ? E leaise feala ke tupu meiate ia se fa toka tasi fua.

⁵ Kapau kua tosi a aso o le tagata, ti kapau kua ke lau ona masina ; Ti kapau kua ke fakatotonu le koiga ke aua na fakalaka ai,

⁶ Ke ke fakamaliu ou mata meiate ia, ti ke ke tuku se malolo kiate ia, O tupu ke maua fua e ia le fiafia o le tagata gaoi totogi i le oki o lona aso gaoi.

⁷ E maua e se laakau se amanaki malie : Talie ka tuuti a ia, e toe somo a ia, Ti e toe fakatupu e ia ni uli.

⁸ Pe kua matua lona aka i le kele, Ti kua mate lona kuaga i le efu,

⁹ E toe sesega a ia mo ka i ai se vai, Ti e toe sosomo ni laa ofaipe se laakau koi muli.

¹⁰ Kae ka mate le tagata, e leaise toe malaga ake a ia ki aluga. Io, ka mate le tagata, kofea a ia ?

¹¹ E pupuli a vai o le tai, Ti e mamasa a vaitafe, o malo ;

¹² E fenaaki le tagata, e moe a ia ki lalo ti e leaise toe tuu ale loa a ia ki aluga ; E leaise toe ala ake loa a ia o kaku ki le puli o le lagi i aluga, Ti e leaise toe tuu ake loa a ia i lana moe.

¹³ Oi, ka na ke loto fua ke fufu au i le nofoaga o le kau mate, Ke kau mumuni ai o kaku ki le oki o lou sausau, Ti ka na ke fakatotonu fua se temi leia e ke toe manatu ai loa kiate au !

¹⁴ Ka na feala ke toe mauli le tagata leia kua mate, E kau maua loa le amanaki malie i le temi katoa o oku mamae, O kaku ki le temi e fetogi ai loa loku anoaga.

¹⁵ I le aso lena e ke kalaga mai loa kiate au, Ti e kau tali atu loa kiate koe, E ke fia tio loa ki le gaoiaga o ou lima.

¹⁶ Kae i le aso nei e ke lau oku lakaaga, Ti e tuku tuumau lou mata ki aku agasala ;

¹⁷ Kua ke sai fakamaumau aku sala i se taga, Ti e ke toe fakakaukaui ni iki ake agaveli kiate au.

¹⁸ E solo le mauga o puli, Ti e puli le utu i lona tuuaga,

¹⁹ E gugu le fatu e le vai, Ti e ave le kele e le tafe ; E fenaaki lau maumaui le amanaki malie a le tagata.

²⁰ E ke ti a ia ki le kele, ti e ano a ia o lee gato ; E ke fakaliliu ona mata o fakalialia, ti e ke kakau a ia ke ano.

²¹ Kapau e fakamauiga ona vosa, e leaise iloa e ia se nea ; Ti kapau e fakataulalo latou, e leaise lave fua a ia ki ai.

²² E tali toka tasi e ia lona kafo i lona tino, Ti e logoi toka tasi e ia lona mamae i lona laumalie.