Sopo 13 - Tosi Tapu

Loto o Sopo ke masau mo le Atua

¹ Ko leinei, na tio loku mata ki nea fuli ana, Ti na logo loku taliga ki ai, o tokaga ki ai.

² Ko le nea leia e kotou iloa, e kau toe iloa foki, Ti e leaise kau valea ake ia koutou.

³ Kae e kau fia masau ki le Mafimafi : E kau loto ke fai laku tagi i mua o le Atua.

⁴ Talie ko koutou ko ni kau fakatupu loi, Ko ni toketa fai faitoo lee aoga.

⁵ Kolea na leaise kotou fakalologo ai ? E kotou fai loa i ai pe ni kau poto !

⁶ E kau kolekole atu kia koutou, ke kotou fakalogo mai ki laku tagi, Ti ke kotou tokaga mai ki masau o oku laugutu.

⁷ Pe kotou manatu e kotou tausi ki le Atua, i lakotou fulusi le maoki, Pe kotou puipui loa a ia ki ni nea salasala ?

⁸ Pe kotou fakafetuu tasi kiate ia ? Pe kotou loto ke kotou puipui a ia ?

⁹ Kapau e oono e ia koutou, pe fakamaoki loa a ia kia koutou ? Pe kotou kakai loa a ia ofaipe le kakai o se tagata ?

¹⁰ E tautea maoki loa e ia koutou, Mo ka kotou fai fua ke fakamata malie kiate ia.

¹¹ Pe leaise kotou i ki le mafimafi o le Atua ? Pe leaise vilo loa lona sausau kia koutou ?

¹² E tatau akoutou tonu mo le mugalafu, Ti e tatau akoutou manatu mo le pela.

¹³ Kotou fakalologo, kotou tuku noa au, e kau fia masau ! E soko mai loa kiate au le nea leia ka soko mai loa.

¹⁴ E kau nofo o fakalogo ki se nea fua, Ti kua kau tuku foki mo loku mauli.

¹⁵ Ko leinei, e tatau aifai pe tamate au e le Atua, e leaise gato loa laku amanaki malie kiate ia ; Kae i ona mua e kau puipui loa loku anoaga.

¹⁶ Ti kapau e manuia, ti e kau malo loa, Talie e leaise mafai ke tuu se tagata agaveli i mua o le Atua.

¹⁷ Kotou fakalogo, kotou fakalogo ki aku masau, Kotou fakamavaa okoutou taliga ki le nea leia e kau fia fakasa atu kia koutou.

¹⁸ Kua kau tokamalie ke ano ki le fakamaauaga ; Talie e kau iloa e kau tonu.

¹⁹ Pe i ai se tasi leia e fia fakavisi kiate au ? Kua kau tokamalie, kapau e kau sala, ti e kau fakaleemu loa, o fakalogo ki loku mate.

²⁰ Ei loku Atua, soli mai kiate au a nea anei e lua, Ti e leaise kau mumuni loa o mamao mei ou mua :

²¹ Too atu lou lima meiate au, Ti aua na ke toe fakavilo lau fakaii kiate au.

²² Ti ke ke folafola loa, ti e kau tali atu loa kiate koe ; Ti kapau e kau masau loa, ti ke ke tali mai loa kiate au !

²³ E fia le lasi o aku sala mo aku agaveli ? Fakasa mai kiate au aku agatuu mo aku agasala ?

²⁴ Kolea leia e ke fufu ai ou mata, Ti e ke too ai au ko lou fili ?

²⁵ Pe ke fia taai se lau laakau leia e agina ? Pe ke fia tuli se ga penu malo ?

²⁶ Kolea kua ke tosi ai kiate au ni mamae kona, Ti kua ke fakatuaa ai au ki ni sala o loku temi ikiiki ?

²⁷ Kolea kua ke nonoa ai oku vae ki le tafito vite, Ti kua ke leoleo ai aku taugaoi fuli, o kaku ki le tosi o fakamailoga o oku lakaaga !

²⁸ Kae kua pala loku tino ofaipe se kie leia kua kai e manu ?