Sopo 12 - Tosi Tapu

Tali a Sopo kia Tesofale

¹ Na masau loa a Sopo, o pati :

² E sakinake ko le malama nei katoa ko koutou fai, Ti e tonu ke mate le poto mo koutou.

³ E kau maua foki se atamai ofaipe koutou, Ti e leaise kau taulalo fua ia koutou ; Ti ko ai e leaise iloa ia loa a nea ala e kotou pati ki ai ?

⁴ Kua kau liliu ki oku kaukaunea ko se nea fakagologolo, Talie e kau tagi ke tokoi mai le Atua kiate au ; Io, kua liliu le tagata agatonu, leia e leaise agasala, ko se nea fakagologolo !

⁵ Ko le vaega o leia e mamae ko le vesia ! Ko le tali a ia a latou ala e fimalie ; Io, e lotou tuku le vesia ki leia kua seke lona vae.

⁶ E manuia le kau kaia i olatou falela, Ti e fimalie latou ala e fakatupu ia le sausau o le Atua, Mo latou fuli ala e atua ki lolatou makeke.

⁷ Ke ke vesili ki manu, ti e lotou ako atu loa a ia kiate koe, Ke ke vesili ki manu lele o le lagi, ti e lotou fakasa atu loa a ia kiate koe ;

⁸ Masau ki le kele, ti e ako atu loa e ia a ia kiate koe ; Ti mo ika o le tai, ti e lotou fakamatala atu loa a ia kiate koe.

⁹ Ko ai e leaise iloa ia ia latou le fakamaoki Ko le lima o le Eteleno leia na fai ia a nea fuli ?

¹⁰ E too e ia i lona lima le laumalie o nea fuli e mauli, Mo le tukumanava o tagata fuli.

¹¹ Pe leaise ko le gaoi a le taliga ko le iloa o masau, Ofaipe le gutu ko le iloa o le kano malie o nea kai ?

¹² Ti e maua le poto i le kau matua, Ti e au le iloa mei le loa o le mauli.

Fakasa e Sopo o le mafimafi o le Atua

¹³ Kae e nofo i le Atua le maoki, mo le poto, mo le mafimafi ; E maua e ia le fakakaukau mo le atamai.

¹⁴ Ko le nea leia e maumaui e ia e leaise toe fakatuu loa, Ti ko leia e tapono e ia i le pilisoni, e leaise toe saofaki loa.

¹⁵ Ka taofi e ia a vai, ti e malo nea fuli ; Kae ka tuku e ia latou, ti e lotou maumaui le kele.

¹⁶ E maua e ia le makeke mo le fakapotopoto ; E pule a ia ki leia e sese pe fakasese ia ni iki.

¹⁷ E ave popula e ia le kau fakakaukau ; E fakavalea e ia le atamai o tui fakamaau.

¹⁸ E tatala e ia le kilipipi o sau ; E nonoa e ia se maea ki olatou sulugalava.

¹⁹ E ave fakapopula e ia le kau faisakilifisio ; E ti e ia ki lalo le kau makeke.

²⁰ E too e ia le masau meia latou ala e poto masau ; Ti e too e ia le poto a le kau matua.

²¹ E liligi e ia le vesiainai ki le kau mauiga ; E fakagaga e ia le kilii pipi o le kau makeke.

²² E fakasa e ia le nea leia e fufu i le fakapouli ; Ti e aumai e ia ki le malama le malu o le mate.

²³ E fakaapi e ia a puleaga, ti e toe maumaui e ia latou. E fakalasi e ia a puleaga ki mamao, ti e toe aumai e ia latou ki olatou koiga afea.

²⁴ E too e ia le atamai o pule o puleaga, Ti e fakasaele e ia latou i ni toafa sala ala ;

²⁵ E lotou saele taufa i le fakapouli, talie e leaise lotou tio malie ; E fakaeva noa e ia latou ofaipe ni tagata konana.