Sopo 11 - Tosi Tapu

Masau a Tesofale kia Sopo

¹ Na masau loa Tesofale mei Naama, o pati :

² Pe leaise maua loa se tali ki le tuuga masau leinei ? Pe feauga loa ke poto masau se tasi ke fakatonu ia a ia ?

³ Pe tapono loa e au masau noa a gutu o le kakai ? Pe ke gologolo loa kae e leaise tali atu se tasi kiate koe ?

⁴ Kua ke pati : E totonu ake laku tio, Ti e kau mea i ou mua.

⁵ Oi, ka na loto le Atua ke masau, Ka na fakamavaa e ia ona laugutu o tali atu kiate koe,

⁶ Ti ka na fakasa atu e ia kiate koe a manatu fakafufu o lona poto, Io, o lona poto lasi, E ke tio loa e leaise fai e ia kiate koe o mulimuli ki lau agaveli.

⁷ Pe feala ke ke ului a manatu loloto a le Atua, mo ke kaku o iloa le lasi o lona Mafimafi ?

⁸ E taualuga ake a ia i le lagi ; kolea loa le nea e ke fai ? E loloto ake a ia i le nofoaga o le kau mate ; kolea loa le nea e ke iloa ?

⁹ E loa ake a ia i le kele, Ti e laulasi ake a ia i le tai.

¹⁰ Kapau e too e ia se tasi i lana fakalaka, o ave ki lana fakamaauaga, Ko ai loa e fakafesagai kiate ia ?

¹¹ Talie e iloa e ia le kakai agaveli, Ti e tio gaofie a ia ki le tagata agasala.

¹² Kae e maua e le tagata le poto o le vale, Ti na tupu a ia ofaipe se uviki o se asino vao.

¹³ Kiate koe, tuku lou loto ki le Atua, Falo ou lima kiate ia,

¹⁴ Ke ke Fakamamao mei le agaveli, Ti aua na ke tuku ke nofo le agasala i lou falela.

¹⁵ Ti e ke lagai ake loa lou lae sala mafetefete, Ti e ke tuu makeke loa, sala i ;

¹⁶ E ke galoi loa ou mamae, E ke manatu loa ki ai ofaipe ni vai kua tafe.

¹⁷ E toe lasi ake loa le gigila o ou aso i le laa o le lalatea, Ti e fai loa ou fakapouli pe le malama o le usu.

¹⁸ E ke apele loa i le fanaki, ti e leaise ano noa loa lau talitali ; E ke tio loa ki ou tafatafa, ti e ke malolo loa i le fimalie.

¹⁹ E ke moe loa kae e leaise toe fakamamae a koe e se tasi, Ti e amoamo loa ou mata e se toka api.

²⁰ Kae e gaegae loa a mata o le kau agaveli, e leaise se solaaga kia latou ; Ti ko le mate, ko lena lolatou amanaki fakamuli.