Sopo 10 - Tosi Tapu

Kia Sopo e fakavelivelii a ia e le Atua kae e leai sona tupuaga

¹ Kua fakalialia loku laumalie ki le mauli ! E leaise kau toe tataofi loa aku lauga, E kau masau loa i le mamae o loku loto.

² E kau pati ki le Atua : Aua na ke tautea au ! Fakasa mai pe kolea leia e ke fakafesagai ai kiate au !

³ Pe malie kiate koe le fakaveliveli mo le tiaki o leia na ke fakatupu ia, Kae ke fakamanuia a fakatuutuu a le kau agasala ?

⁴ Pe ke maua ni mata ofaipe la o le tagata ? Pe ke tio ofaipe le tio a le tagata ?

⁵ Pe tatau ou aso mo aso o le tagata, Ti mo ou fetuu mo ona fetuu,

⁶ Ke ke afa ai laku agaveli, ti mo ke sakili ai laku agasala ?

⁷ Kae e ke iloa malie e leaise kau lakasala, Ti e leaise tasi e mafai ke saofaki ia au mei lou lima ?

⁸ Ko ou lima totonu ala na fau ia au, ti na lotou fakatupu ia au, Ti na lotou fau katoa ia au… Ti e ke loto loa ke ke maumaui au !

⁹ Manatui na ke gaoi au ofaipe le kele kula ; Pe ke loto ke ke toe fakaliliu au ko le efu ?

¹⁰ Na ke fau au i le tino o loku tinana, Ofaipe le fakamoe o le sua pipi i le takele o le fa kulo ke makeke.

¹¹ Na ke kofu au ki le kanofi mo le kili, Ti na ke fakamakeke au ki ni ivi mo ni ua ;

¹² Na ke soli mai kiate au lou kalasia mo le mauli, Ti na ke taupau au ti mo leoleo kiate au.

¹³ Kae ko leinei le nea leia na ke fufu i lou loto, Ko leinei e kau iloa le nea leia na ke fakapapau i lou loto.

¹⁴ Kapau e kau agasala, e ke tio mai kiate au, Ti e leaise ke fakamolemole laku agaveli.

¹⁵ Malaia kiate au mo kapau kua kau sala ! Ti kapau e kau saosaoa e leaise mafai ke lagai loku ulu ki aluga, Talie kua kau makona i le luma, ti kua kau kona i le mamae.

¹⁶ Kae kapau e kau lagai a ia ki aluga, e ke tuli au ofaipe se laione, E ke toe taai au ki ni nea fakaii,

¹⁷ E ke fakafoou lau kau fakamaoki kiate au, Ti e ke fakalasi lou sausau kiate au, Ti e ke toe tuku sosolo mai kiate au ni malaia.

¹⁸ Kolea na ke fakamavae ai au i le manava o loku tinana ? Na kau mate loa, ti na leaise tio loa se mata kiate au ;

¹⁹ Na kau fai loa pe se tasi leia na leaise tupu, Ti na kau fakalaka loa mei le manava o loku tinana ki le tanuma.

²⁰ Pe leaise koi toe fua ni ga aso teiki kiate au ? Ke tuku noa e ia au ! Ke fakamamao a ia iate au, kae feala ke fakatau laku manava,

²¹ I mua o laku ano, ti e leaise toe liliu mai, Ki le fenua o le fakapouli mo le malu o le mate,

²² Le fenua o se fakapouli matotolu, Leia e pule ai le malu o le mate mo le maveuveu, Ti e tatau ai le malama mo le fakapouli.