Sopo 1 - Tosi Tapu

Tausi malie o Sopo ki le Atua

¹ Na i ai se tagata i le fenua ko Usi leia na igoa ko Sopo. Ti na saosaoa mo agatonu le tagata lena ; ti na i a ia ki le Atua, ti na fakamamao a ia mei le veli.

² Na tupu loa kiate ia ni vosa e toka fitu mo ni taineliki e toka tolu.

³ Na maua e ia ni ovi fafine e fitu afe, mo ni kamelo e afe, mo ni soa pipi tagata e kau lelau lima, mo ni asino fafine e kau lelau lima, ti mo ni tagata fakasausau toka api. Ti na mauiga toka tasi le tagata lena i tagata fuli o le potu Esite.

⁴ Na tau ano ona vosa ki le kaiga o leia mo leia ia latou, o fai i ai se kai. Ti na lotou fakaafe olatou tuagaane e toka tolu ke kai mo inu mo latou.

⁵ Ti ka oki a aso fakafiafia, e kakau loa e Sopo ke au kiate ia ona vosa, ke fakamea latou ; e tuu ake loa a ia i le mafoata o momoli ni failaulau o fakatatau ki le lasi o ana fanau ; talie na pati a Sopo : E feala ke agasala oku vosa ti ke lotou masau sala ki le Atua i olatou loto. Ko lena le fai masani a Sopo.

Tuku veli o Sopo e Satana

⁶ Kae i se aso, na au loa a vosa o le Atua ki mua o le Eteleno, ti na au foki Satana i loto malie o latou.

⁷ Na pati loa le Eteleno kia Satana : Pe ke au meifea ? Ti na tali loa Satana ki le Eteleno : Mei laku folii le malama nei, o evaeva i ai.

⁸ Na pati loa le Eteleno kia Satana : Pe kua ke tokagai laku tagata fakasausau ko Sopo ? E leaise tatau se tasi mo ia i le malama nei ; ko se tagata saosaoa mo agatonu, mo i ki le Atua, ti mo fakamamao mei le veli.

⁹ Ti na tali loa Satana ki le Eteleno : Pe fufuaki alofa noa a Sopo ki le Atua ?

¹⁰ Pe leaise tupu ko lau puipui a ia, mo lona famili, ti mo ana nea fuli ? Kua ke fakamanuia le gaoi o ona lima, ti kua uufi e ana kau manu le fenua.

¹¹ Kae ke falo lou lima, o taai ana nea fuli, ti e kau iloa papau, e lauveli loa a ia kiate koe.

¹² Ti na pati loa le Eteleno kia Satana : Ko leinei, kua kau tuku atu a nea fuli a Sopo kiate koe ; kae aua fua na fafa lou lima kiate ia. Ti na mavae loa Satana mei le agaiaga o le Eteleno.

Puli o koloa mo le famili o Sopo

¹³ I se aso leia na kai ai mo inu vino ai a vosa mo taineliki o Sopo i le fale o lolatou taina uluaki,

¹⁴ Na kaku mai loa se tagata avelogo kia Sopo, o pati kiate ia : Na fakamaluu kele a pipi tagata, ti na kai a asino fafine i olatou tafa ;

¹⁵ ti na oso mai loa ni tagata Sapesi, o ave latou, kae na lotou tamate loa ki le seleta a tagata fakasausau. Ti ko au fai toka tasi na sola, ke aumai kiate koe le logo.

¹⁶ Koi lolotoga masau a ia, kae kaku mai se tasi ake tagata avelogo, o pati : Kua vilo le afi a le Atua mei lagi, o tutu a ovi mo tagata tausi ovi, o mamate fuli. Ti na kau sao, au toka tasi, o aumai le logo kiate koe.

¹⁷ Koi lolotoga masau a ia, kae kaku mai se tasi ake tagata avelogo, o pati : Ko se kau Kaletea, na vaega tolu, na osoi ia a kamelo o ave, kae lotou tamate ki le seleta a tagata fakasausau. Ti na kau sao, au toka tasi, o aumai le logo kiate koe.

¹⁸ Koi lolotoga masau a ia, kae kaku mai se tasi ake tagata avelogo, o pati : Na lolotoga kai mo inu vino ou vosa mo ou taineliki i le fale o lolatou taina uluaki ;

¹⁹ Ti ko leinei, na au loa se sasataki mei le toafa, o taai a potupotu e fa o le fale ; ti na solo loa a ia ki le kau tupulaga, o lotou mamate fuli. Ti na kau sao, au toka tasi, o aumai le logo kiate koe.

²⁰ Ti na tuu loa a Sopo ki aluga, o sae lona taupulupulu, mo tele lona ulu ; ti na fakamapee loa a ia ki le kele, ti na su loa a ia,

²¹ O pati : Na kau au telefua mei le manava o loku tinana, ti e kau toe liliu telefua loa ki le manava o le kele. Na soli e le Eteleno, ti kua toe too e le Eteleno ; ke fakafetai ki le suafa o le Eteleno !

²² I nea fuli ana, na leaise agasala fua a Sopo, ti na leaise tuku fua e ia se veli ki le Atua.