Sonasi 3 - Tosi Tapu

Akonaki a Sonasi i Ninive

¹ Na fakasa loa le foafola a le Eteleno kia Sonasi, ko lona tua lua a ia, o pati :

² Tuu ki aluga, ano ki Ninive, le kolo lasi, ti ke fakasa i ai le nea leia e kau fakatotonu atu loa kiate koe !

³ Ti na tuu ake loa Sonasi, o ano ki Ninive, o mulimuli ki le foafola a le Eteleno. Kae ko Ninive ko se kolo lasi ai a ia, na aso tolu le saele i ai.

⁴ Na fai mua e Sonasi se aso saele i le kolo ; ti na kalaga a ia, o pati : Koi toe fai ni aso e kau fa, ti e maumaui loa Ninive !

⁵ Ti na tui loa le kakai o Ninive ki le Atua, ti na lotou fakasa loa se sesunio, ti na lotou kofu loa ni taga, mei le kau lalasi o kaku kia latou ala e liliki oki.

⁶ Na kaku loa le nea ki le sau o Ninive ; ti na tuu ake loa a ia i lona ekeekeaga fakasau, o tatala lona taupulupulu, kae tui loa e ia se taga, ti na tonatona loa a ia i le mugalafu.

⁷ Ti na fakatotonu loa e ia ke logologo mo fakasa i Ninive le nea leinei kua fono e le sau mo lana kau lalasi : Aua na asiasii se nea kai, pe kai se luna, pe inu se vai, e tagata mo manu, mo pipi, mo ovi !

⁸ Ke kofu e tagata mo manu ni taga, ti ke lotou tagi ki le Atua i lolatou makeke katoa, ti ke lotou tafoki fuli mei olatou ala veveli mo alatou gaoi fakamakeke ala na agasala ai olatou lima !

⁹ Ko ai e iloa ia, pe leaise toe tafoki loa le Atua o fakasemala, ti mo fakafiti loa a ia ki lona sausau lasi, ti e feala loa ke aua na tou mamate ?

¹⁰ Ti na tio loa le Atua kua lotou fai felaaki, ti kua lotou tafoki mei olatou ala veveli. Ti na fakasemala loa le Atua ki le veli leia na fakatotonu e ia ke fai kia latou, ti na leaise fakasoko loa e ia a ia.