Sonasi 2 - Tosi Tapu

Kole a Sonasi i le manava o se ika

¹ Na kakau mai loa e le Eteleno se ika lasi ke folo ia Sonasi, ti na nofo loa Sonasi i le manava o le ika i aso e tolu mo po e tolu.

² Na faikole loa Sonasi i le manava o le ika ki le Eteleno, lona Atua.

³ Na pati loa a ia : I loku mamae, na kau fetapa ki le Eteleno, Ti na tali mai a ia kiate au ; I le manava o le nofoaga o le kau mate na kau tagi, Ti na ke logo ki loku leo.

⁴ Na ke ti au ki le moana, ki le takele o le tai, Ti na takatakai au e vai tatafe ; Na fakalaka iate au au galu fuli mo au piau fuli.

⁵ Na kau pati : Kua kapu au o mamao i ou mata ! Kae e kau toe tio loa ki lou faletapu maokioki.

⁶ Na kofu au e atu vai o kaku ki le too o loku mauli, Na takatakai au e le loloto, Na takatakai loku ulu e le limu.

⁷ Na kau ifo o kaku ki fakatafito o mauga, Na tapono au e matapa ukamea o le kele o lee gato ; Kae na ke toe fakapale mauli ake au mei le popoko, Eteleno, loku Atua !

⁸ I le temi leia na gaegae ai loku laumalie iate au, Na kau manatui a koe, Eteleno, Ti na kaku laku kole kiate koe, I lou faletapu maokioki.

⁹ Ko latou ala e pipiki ki ni taulaatua noa E fakamamao ia le manavaalofa ia latou.

¹⁰ Kiate au, e kau momoli loa kiate koe ni failaulau mo ni kalaga fakafetai, E kau fai loa a fakapapau ala na kau fai : E au le fakamauli mei le Eteleno.

¹¹ Na masau loa le Eteleno ki le ika, ti na luluai loa e le ika a Sonasi ki le kele malo.