Sonasi 1 - Tosi Tapu

Vokasio o Sonasi ; sola mo tua

¹ Na fakasa loa le foafola a le Eteleno kia Sonasi, le vosa o Amitai, o pati :

² Ke ke tuu ki aluga, o ano ki Ninive, ki le kolo lasi, ti ke kalaga ki ai ! Talie kua kaku mai ki oku mua lana agaveli.

³ Kae na tuu ake loa Sonasi, ke sola ki Talesisi, o mamao mei mata o le Eteleno. Na ifo loa a ia ki Safo, ti na maua loa e ia i ai se vaka leia na teuteu folau ki Talesisi ; ti na totogi loa e ia lona tosi folau, ti na eke loa a ia ke ano mo le kau folau ki Talesisi, o mamao mei mata o le Eteleno.

⁴ Kae na fakaagi loa e le Eteleno se matagi makeke ki le tai, ti na malaga loa i le tai se afa lasi. Ti na sakinake le vaka ka goto.

⁵ Ti na i lasi ai le kau vaka, ti na lotou tasi tagi loa ki lona atua, ti na lotou laku loa ki le tai a nea ala na tuku i le vaka, o tupu ke fakamaamaa a ia. Na ifo loa Sonasi ki le takele o le vaka, ti na moemate loa a ia.

⁶ Na fakafeofi ake loa le kapiteni kiate ia, o pati : Kolea e ke moe ai ? Tuu ki aluga, kalaga ki lou atua ! Na saga e manatu mai loa a ia kia tatou, ti e leaise tou mamate loa.

⁷ Ti na masau loa le kau vaka ia latou, o pati : Kotou au ke tou toso pe ko ai leia e tupu ai le malaia leinei. Na lotou toso loa, ti na to loa le toso kia Sonasi.

⁸ Ti na lotou pati loa kiate ia : Fakasa mai kia matou pe ko ai leia na tupu ai le malaia leinei kia tatou ? Koa au gaoi a au ? Ti e ke au meifea ? Ko ai lou fenua mo lou kakai ?

⁹ Na tali loa a ia kia latou : Ko se Epeleo au, ti e kau i ki le Eteleno, le Atua o le atu lagi, leia na fakatupu ia le tai mo le kele.

¹⁰ Na i lasi loa a tagata ana, ti na lotou pati loa kiate ia : Kolea na ke fai ai le nea lena ? Talie kua iloa e le kau tagata lena na sola a ia mei mata o le Eteleno, talie na fakasa ake e ia kia latou.

¹¹ Na lotou pati loa kiate ia : Kolea e tonu ke motou fai loa kiate koe, ke tupu ai le tokamalie o le tai kia tatou ? Talie kua asilisili veli le tai.

¹² Na tali loa a ia kia latou : Kotou too au, ti kotou ti au ki le tai, ti e tokamalie loa le tai kia koutou ; talie e kau iloa e tupu le afa lasi leinei ko au.

¹³ Kae na foe fakamakeke a tagata ana ke kaku ki le kele, kae na leaise lotou mafai a ia, o tupu na asilisili veli le tai kia latou.

¹⁴ Koia na lotou tagi ai loa ki le Eteleno, o pati : Ei Eteleno, aua na ke tuku matou ke mamate o tupu ko le mauli o le tagata leinei, ti aua na ke teki kia matou le toto mea ! Talie ko koe, Eteleno, e ke fai le nea leia e ke loto ki ai.

¹⁵ Ti na lotou too loa Sonasi, ti na lotou ti loa a ia ki le tai. Ti na malu loa le itaita o le tai.

¹⁶ Ti na maua loa e le kau tagata lena se i lasi ki le Eteleno, ti na lotou momoli loa se sakilifisio ki le Eteleno, ti na lotou fai loa ni fakapapau.