Sofoni 3 - Tosi Tapu

Tupuaga o le tautea o Selusalemi

¹ Malaia ki le kolo agatuu mo fakalialia, Ki le kolo leia kua apele i tagata agamakeke !

² E leaise logo fua a ia ki se leo, E leaise tali fua e ia se valoki, E leaise fanaki a ia ki le Eteleno, E leaise fakafeofi a ia ki lona Atua.

³ Ko ona pule i loto malie o ona e fai pe ni laione kaikai ; Ko ona tui fakamaau ko ni lupo o le afiafi ala e leaise fakatoe ia se nea ki le usu.

⁴ E matasosoka mo kaka ona polofeta ; E maumaui e ana tagata faisakilifisio a nea tapu mo le lao.

⁵ Kae e faitotonu le Eteleno i loto malie o ia, E leaise fai e ia se nea e veli ; I usu fuli e fakasa e ia ki le malama ana fakamaauaga, Ti e leaise toe faisala a ia i le nea lena ; Kae ko leia e agaveli e leaise iloa ia le luma.

⁶ Na kau tuuti ni puleaga ; kua maumau olatou tule ; Na kau maumaui olatou ala, e leaise tasi koi fakalaka i ai ! Kua maumau olatou kolo, e leaise koi maua se tagata, e leaise koi maua se tasi ke nofo i ai !

⁷ Na kau pati : Kapau fua na ke fia fakaapaapa kiate au, O tokaga ki laku fakatotonu, E leaise maumaui loa lou nofoaga, Ti e leaise soko loa tautea fuli ala na kau fakatuutuu kiate koe ! Kae na lotou fakatavili o fakakelekele alatou gaoi.

⁸ Koia e pati ai le Eteleno : Kotou talitali mai la kiate au ! I le aso leia e kau tuu ake ai loa o tanaki le koloa o le tau, Talie kua kau fakapapau ke fakatasi a atu puleaga, Ke fakatasi a atu puleaga sau, O tupu ke kau liligi kia latou loku sausau, Le mamafa katoa o loku ita ; Talie e tutu loa le fenua katoa e le afi o loku finenonofo.

Tapuakina o le temi ki muli

⁹ I le aso lena, e kau soli loa ki kakai ni laugutu mea, O tupu ke lotou fetapa fuli ki le suafa o le Eteleno, Ti ke lotou tausi kiate ia i se loto e tasi.

¹⁰ Mei leia atu fetuu o vaitafe o Etiopia, E aumai loa e laku kau atolasio, laku kau mavetevete, ni moliga kiate au.

¹¹ I le aso lena, e leaise ke toe luma loa ki au gaoi fuli Ala na ke agasala ai kiate au ; Talie e kau too loa i loto malie o ou latou ala na malo i le fia nealasi, Ti e leaise ke toe fia nealasi loa i loku mauga maokioki.

¹² E kau tuku loa i loto malie o ou se kakai agamalu mo mativa, Leia e maua loa lona mumuniaga i le suafa o le Eteleno.

¹³ E leaise toe fai loa e toetoega o Iselaele se agaveli, E leaise lotou toe fai loa se loi, Ti e leaise toe maua loa i lolatou gutu se alelo kaka ; Kae e lotou kai loa, e lotou malolo loa, ti e leaise toe fakaveli loa se tasi kia latou.

¹⁴ Taine o Sione, ke ke kalaga fakafiafia ! Iselaele, ke ke fakamapa ni kalaga nekenekea ! Taine o Selusalemi, fakafiafia i lou loto katoa !

¹⁵ Kua fakamafuli kese e le Eteleno ou tautea, Kua fakamamao e ia lou fili. E nofo le sau o Iselaele, le Eteleno, i loto malie o ou ; E leaise ke toe maua ia loa se malaia.

¹⁶ I le aso lena, e pati loa i Selusalemi : Aua na ke i ki se nea ! Sione, aua na fakagaegae ou lima !

¹⁷ E nofo le Eteleno, lou Atua i loto malie o ou, ofaipe se tagata toa leia e fakamauli ia a koe ; E maua loa lona fiafia lasi iate koe ; E fakalologo loa a ia i lona alofa ; E sua fakafiafia loa a ia kiate koe.

¹⁸ E kau fakatasi loa latou ala e loto mamae, o mamao i aso lalasi, Latou ala na mavae mei lou manava, Latou ala e mafaia i le luma.

¹⁹ Ko leinei, i le aso lena, e kau gaoi loa kia latou ala na fakamamae ia a koe ; E kau saofaki loa le kau kito, ti e kau fakatalitali loa latou ala na kapu, E kau fakaliliu loa latou ko se tupuaga o le fakavikiviki mo le fakakololia I fenua fuli ala na lotou luma ai.

²⁰ I le aso lena, e kau toe aumai loa koutou ; I le aso lena, e kau fakatasi loa koutou ; Talie e kau fakaliliu loa koutou ko se tupuaga o le fakavikiviki mo le kololia I lotolotoga o kakai fuli o le malama nei, Mo ka kau toe aumai loa lokoutou kau popula i mua o okoutou mata, E pati le Eteleno.