Sofoni 1 - Tosi Tapu

Fakamaau o Suta kua vave ai

¹ Na fakasa loa le folafola a le Eteleno kia Sofoni, vosa o Kusi, vosa o Ketalia, vosa o Amalia, vosa o Esekiasi, i le temi o Sosiasi, vosa o Amone, sau o Suta.

² E kau maumaui loa a nea fuli i aluga o le malama nei, E pati le Eteleno.

³ E kau maumaui loa tagata mo manu, A manu lele o le lagi mo ika o le tai, A nea fakatupu siga mo le kau agaveli mo latou ; E kau tuuti loa a tagata i aluga o le malama nei, E pati le Eteleno.

⁴ E kau falo loa loku lima kia Suta, Ti mo le kakai fuli o Selusalemi ; E kau tuuti loa i le ganea leinei a toega o Paale, Mo le igoa o ana minisi ti mo ana pelepitelo mo latou,

⁵ Mo latou ala e punou i aluga o ato o fale i mua o le solia o le lagi, Mo latou ala e punou o fakapapau i le suafa o le Eteleno, Ti mo toe fakapapau foki i le igoa o lolatou sau ko Malekame,

⁶ Mo latou ala na maliu kese i le Eteleno, Ti mo latou ala e leaise afa ia le Eteleno, Latou ala e leaise afa ia lona finegalo.

Le aso o le Eteleno

⁷ Fakalologo i mua o le Aliki, le Eteleno ! Talie kua ofi le aso o le Eteleno, Talie kua teuteu e le Eteleno le sakilifisio, ti kua filifili e ia ana kau fakaafe.

⁸ I le aso o le sakilifisio a le Eteleno, E kau tautea loa a aliki mo vosa o le sau, Ti mo latou fuli ala e kofu ki ni kofu matapule.

⁹ I le aso lena, e kau tautea loa latou fuli ala e sopo i le mua matapa ofaipe ni pagani, Latou ala e fakaapele ia le fale o lolatou pule ki le agamakeke mo le kaka.

¹⁰ I le aso lena, e pati le Eteleno, E i ai loa ni tagi i le matapa o ika, Mo ni tagi laulau i le kolo foou, Ti mo se maumau lasi i mauga liliki.

¹¹ Kotou fetagisi, kakai o Maketesi ! Talie kua maumau latou fuli ala e fai koloa, Ti kua mamate tagata fuli ala na tanaki paaga.

¹² I le aso lena, e kau ina loa Selusalemi ki ni malama, Ti e kau tautea loa a tagata ala e malolo fakafimalie ofaipe le takele o le vino i le fa poe, Ti e pati i olatou loto : E leaise fai e le Eteleno se malie pe ko se veli.

¹³ E kaia loa olatou koloa, Ti e maumaui loa olatou fale. E lotou pakia loa i le fakatuu o ni fale kae e leaise lotou nonofo loa i ai. E lotou pakia loa i le to o ni vite kae e leaise lotou inu loa ki lona vino.

¹⁴ Kua ofi le aso lasi o le Eteleno, Kua ofi mai a ia, ti e au fakatavili a ia. E fakasa e le aso o le Eteleno lona leo, Ti e fai e le tagata toa ni tagi mamae.

¹⁵ Ko le aso lena ko se aso o le sausau, Ko se aso o le mamae mo le tuania, Ko se aso o le maveuveu mo le maumau, Ko se aso o le fakapouli mo le pouli, Ko se aso o ao mo kokofu,

¹⁶ Ko se aso e tagi ai loa le fakatagi pupusi mo ni kalaga tau Ki kolo tau mo tule taualuga.

¹⁷ E kau tuku loa a tagata ki le mamae, Ti e lotou saele loa ofaipe ni kivi, Talie na lotou agasala ki le Eteleno ; E kau liligi loa lolatou toto ofaipe le efu, Ti mo lolatou kanofi ofaipe ni penu.

¹⁸ E leaise mafai loa ke saofaki latou e lalatou paaga mo lalatou aulo, I le aso o le sausau o le Eteleno ; E tutu loa le fenua katoa e le afi o lona finenonofo ; Talie e maumaui fakapunamauli loa e ia a kakai fuli o le fenua.