Soele 3 - Tosi Tapu

Fakamaau o atu puleaga

¹ Talie ko leinei, i aso ana, i le temi lena, Mo ka kau toe aumai loa le kau popula o Suta mo Selusalemi,

² E kau fakatasi loa a atu puleaga fuli, Ti e kau fakaifo loa latou ki le vaivailiua o Sosafate ; I ai, e kau fakamaau loa latou, O tupu ko loku kakai, o tupu ko Iselaele, loku tofiga, Leia na lotou fakamavetevete i atu puleaga, O tupu ko loku fenua leia na lotou vae ia latou.

³ Na lotou toso loku kakai ; Na lotou soli le tama tupulaga ki se fafine faiaga, Na lotou fakatau le taine ki se vino, ti na lotou inu.

⁴ Kolea le nea e kotou loto ki ai, Tile mo Sitone, Ti mo koutou fuli, fenua o le kau Filisitini ? Pe kotou loto ke kotou lagavaka mai kiate au ? Kapau e kotou fia lagavaka mai kiate au, E leaise tuvai loa laku fakavilo lakoutou lagavaka ki okoutou ulu.

⁵ Na kotou too laku siliva mo laku aulo ; Ti ko le nea leia na kau maua e mauiga kese mo fulumalie, Na kotou ave latou ki okoutou fale tapu.

⁶ Na kotou fakatau a fanau o Suta mo Selusalemi ki le kau Keleka O tupu ke fakamamao latou i lolatou fenua.

⁷ Ko leinei, e kau toe aumai loa latou mei le ganea lena na kotou fakatau latou ki ai ; Ti e kau toe fakavilo loa ki okoutou ulu lakoutou lagavaka.

⁸ E kau fakatau loa okoutou vosa mo okoutou taineliki ki fanau o Suta ; Ti e lotou toe fakatau loa latou ki le kau Sapea, puleaga mamao. Talie kua masau le Eteleno.

⁹ Kotou fakasa a nea ana i lotolotoga o atu puleaga ! Kotou teuteu ki le tau ! Kotou fafagu a tagata toa ! Ke lotou fakafeofi mai, ke lotou pale mai, Tagata tau fuli !

¹⁰ Kotou fau ni seleta ki sele o akoutou saliote ! Ti mo ni tao ki akoutou sele tuuti fulumeto. Ke pati leia e manava veli : E kau makeke !

¹¹ Kotou vavevave o au, koutou fuli, puleaga o tafatafa ; Ti kotou fakatasi fuli ! I lena, ei Eteleno, fakaifo mai lau kau toa !

¹² Ke alaala a atu puleaga, ti ke lotou pale Ki le vaivailiua o Sosafate ! Talie i lena e kau ekeeke loa o fakamaau a puleaga fuli o tafatafa.

¹³ Kotou too le sele tuuti fulumeto, Talie kua matua le taukai fulumeto ! Kotou au, kotou takatakafi, Talie kua apele le tatauaga vite, Kua apele pipi a tane vino ! Talie kua lasi ai lalatou agaveli.

¹⁴ Ko se kakai toka api, ko se kakai toka api, I le vaivailiua o le fakamaau. Talie kua ofi le aso o le Eteleno, I le vaivailiua o le fakamaau.

¹⁵ Kua fakapouli le laa mo le masina, Ti kua puli le gigila o fetuu.

¹⁶ Mei Sione e gugulu le Eteleno, Mei Selusalemi e logo lona leo ; Kua galulu le lagi mo le kele. Kae ko le Eteleno ko se mumuniaga ki lona kakai, Se puipuiaga ki fanau a Iselaele.

¹⁷ Ti e kotou iloa loa ko au ko le Eteleno, lokoutou Atua, Leia e nofo i Sione, loku mauga maokioki. E maokioki loa Selusalemi, Ti e leaise toe fakalaka loa i ai a matapule.

Fakapapau ki Iselaele

¹⁸ I le temi lena, e tafe loa le vino mei mauga, E sali loa le sua u mei mauga liliki, Ti e i ai loa se vai i liua fuli o Suta ; E mapuna loa se matapuna vai mei le fale o le Eteleno, O fakavai loa le vaivailiua o Sitime.

¹⁹ E maumau loa Esipito, E liliu loa Etome o toafa, O tupu ko agamakeke ki fanau o Suta, Ala na lotou liligi le toto saosaoa i lolatou fenua.

²⁰ Kae e nofoi loa Suta o lee gato, Ti mo Selusalemi i tautupu mo tautupu.

²¹ E kau totogi loa lolatou toto Leia na leaise totogi. Ti e nofo loa le Eteleno i Sione.