Soele 2 - Tosi Tapu

Ko le solia mei le potu noleto

¹ Kotou pupusi le fakatagi pupusi i Sione ! Kotou fakagugulu le fakatagi pupusi i loku mauga tapu ! Ke lulu kakai fuli o le fenua ! Talie kua au le aso o le Eteleno, talie kua ofi mai a ia,

² Aso o fakapouli mo le pouli loloto, Aso o ao mo kokofu, E au a ia ofaipe le mafola o le pouli i aluga o mauga. Ko leinei se kakai toka api mo makeke, Leia e leai sona tatau, Ti e leaise toe maua sona tatau i temi ki muli.

³ E ano se afi kaka i ona mua ; Ti e muli iate ia se ula vevela ; Na fai le fenua i mua pe se oloto o Eteni, Kae talu mei ai, ko se toafa fakaii a ia : E leaise sao se nea iate ia !

⁴ I le tio kia latou, e lotou faipe ni osi, Ti e lotou makape ofaipe ni tagata ekeosi.

⁵ I le logo kia latou, e faipe se logoa o ni saliote tau I le tumutumu o ni mauga ala e lotou soposopo ai, E faipe se mafitifiti o le ulai afi, Mo ka tutu e ia se mutie malo. E faipe se kau tau makeke Leia e teuteu ki le tau.

⁶ I olatou mua e lulu a kakai, E fakalaulautetea a mata fuli.

⁷ E lotou oso ofaipe ni tagata tau, E lotou kava i kaua ofaipe ni tagata tau ; E tasi ano le tagata i lona ala, E leaise toe maliu kese a ia i lona ala.

⁸ E leaise lotou fetekeaki le tasi ki le tasi, Kae e lotou tasi saele i lona atu ; E lotou oso ki faigataa fuli, E leaise toe fakatuu latou e se nea.

⁹ E lotou mavetevete i le kolo, Makape i aluga o kaua, Kava ki aluga o fale, Ulu i katupa ofaipe se tagata kaia.

¹⁰ I olatou mua e lulu le kele, E galulu le atu lagi, E fakapouli le laa mo le masina, Ti e puli le gigila o fetuu.

¹¹ E fakagugulu e le Eteleno lona leo i mua o lana kau tau ; Talie e lasi ai lona nofolaga solia, Ti e makeke leia e fakasoko ia lana folafola ; Talie e lasi le aso o le Eteleno, e fakaii a ia : Ko ai e feala loa ke tuu i ai ?

Kalaga ki le fakasemala

¹² I le aso nei foki, e pati le Eteleno, Kotou toe liliu mai kiate au i lokoutou loto katoa, Mo ni sesunio, mo ni tagi, ti mo ni tagi laulau !

¹³ Kotou sae okoutou loto kae aua okoutou kofu, Ti kotou toe liliu mai ki le Eteleno, lokoutou Atua ; Talie e agamalie a ia mo manava alofa, E kataki fualoa a ia mo apele i le agamalie, Ti e fakasemala a ia ki tautea ala e tuku e ia.

¹⁴ Ko ai e iloa ia pe leaise toe tafoki loa a ia ti e fakasemala loa a ia, Pe leaise tuku loa e ia le tapuakina i ona muli ? Ti e feala loa ke kotou momoli ni failaulau mo ni lipasio ki le Eteleno, lokoutou Atua.

¹⁵ Kotou pupusi le fakatagi pupusi i Sione ! Kotou logologo se sesunio, mo se fakatasi mamalu !

¹⁶ Kotou fakatasi le kakai, kotou fai se fono tapu ! Kotou fakatasi a matua, Kotou fakatasi a toe, Tatau foki mo toe koi u ! Ke mavae le tagata avaga i lona fale, Ti mo le fafine avaga i lona kogafale !

¹⁷ I le vasa o le matapa ulu mo le aletale Ke fetagisi tagata faisakilifisio, Ti ko tagata fakasausau a le Eteleno, Ke lotou pati : Eteleno, fakamauli lou kakai ! Aua na ke tuku lou tofiga ki le luma, Ki nukinuki a atu puleaga ! Kolea e pati ai loa i lotolotoga o kakai : Kofea lolatou Atua ?

Fakapapau o le tapuakina

¹⁸ E finenonofo lasi le Eteleno ki lona fenua, Ti e fakamauli e ia lona kakai.

¹⁹ E tali le Eteleno, ti e pati a ia ki lona kakai : Ko leinei, e kau soli atu loa kia koutou se fulumeto, Mo se vino, mo se lolo, Ti e kotou makona loa ; Ti e leaise kau toe tuku loa koutou ki le luma i lotolotoga o atu puleaga.

²⁰ E kau fakamamao loa ia koutou le fili o le noleto, E kau kapu loa a ia ki se kele malo mo toafa, E kau ti loa lona atu mua ki le tai mate, Mo lona atu muli ki le tai metitelanea. Ti e mafola loa lona pala, E malaga ake loa lona namuku i le aele, O tupu na fai e ia ni nea veveli lalasi.

²¹ Kele, aua na ke i, Kae ke ke fiafia mo ke nekenekea, Talie e fai le Eteleno ni nea lalasi !

²² Manu o le vao, aua na kotou i, Talie e toe sesega loa a toafa, Ti e toe fua loa a laakau, Ti e toe soli loa e le fiki mo le vite ola koloa.

²³ Ti ko koutou, fanau o Sione, kotou fiafia ti kotou nekenekea I le Eteleno, lokoutou Atua, Talie e tuku atu loa e ia kia koutou le ua i lona temi, E kakau atu loa e ia kia koutou a ua o le temi momoko mo ua o le temi mafana, Ofaipe le temi mago.

²⁴ E apele loa a sasaaga fulumeto i le fulumeto, Ti e apele loa a tane vino i le vino mo le lolo.

²⁵ E kau fetogi atu loa kia koutou a fetuu Ala na kai e le seseivaka, Mo le lauka, mo le asile, mo le kasame, Laku solia lasi leia na kau kakau atu kia koutou.

²⁶ E kotou kakai loa ti e kotou makokona loa, Ti e kotou fakavikiviki loa ki le suafa o le Eteleno, lokoutou Atua, Leia na fai ia kia koutou ni nea fakamanamana ; Ti e leaise toe luma loa loku kakai.

²⁷ Ti e kotou iloa loa e kau nofo i loto malie o Iselaele, Ti ko au ko le Eteleno, lokoutou Atua, ti e leai se tasi ake atua kese iate au, Ti e leaise toe nofo loa loku kakai i le luma.

²⁸ I le oki o le nea lena, e kau liligi loa loku Laumalie ki kanofi fuli ; E kikite loa okoutou vosa mo okoutou taineliki, E fai loa e okoutou matua ni moe miti, Ti mo okoutou tagata tupulaga ni tio.

²⁹ Ti e tatau foki ki tagata fakasausau mo fafine fakasausau, I aso ana, e kau liligi loa loku Laumalie.

³⁰ E kau fakasa loa ni nea fakamanamana i le lagi mo le kele, Se toto, mo se afi, ti mo ni pou afu.

³¹ E fetogi loa le laa o fakapouli, Ti mo le masina o toto, I mua o le soko mai o le aso o le Eteleno, O le aso lasi lena mo fakaii.

³² Ti ko leia e fetapa loa ki le suafa o le Eteleno e mauli loa ; E nofo loa le fakamauli i le mauga o Sione mo Selusalemi, Ofaipe le pati a le Eteleno, Ti mo lotolotoga o latou ala na saofaki, latou ala e kalagai loa e le Eteleno.