Soele 1 - Tosi Tapu

Ko seseivaka, fakatata o le kau Asilia

¹ Na fakasa le folafola a le Eteleno kia Soele, le vosa o Petuele.

² Kau matua, kotou fakalogo mai ki le nea leinei ! Kotou fakalogo mai okoutou taliga, koutou fuli, ko kakai o le fenua ! Pe kua soko se nea feneeki i lokoutou temi, Pe ko le temi o okoutou tamana ?

³ Kotou fakamatala a ia ki akoutou fanau, Ti ke fakamatala a ia e akoutou fanau ki alatou fanau, Ti ke fakamatala e alatou fanau ki le tautupu leia e muli mai loa !

⁴ Ko le nea leia na tuku e le lauka, na kai a ia e le seseivaka ; Ko le nea leia na tuku e le seseivaka, na kai a ia e le seleki ; Ko le nea leia na tuku e le seleki, na kai a ia e le asile.

⁵ Kotou alaala, kau konana, ti kotou fetagisi ! Koutou fuli, kau inu vino, kotou tagi laulau, Talie kua too le vino mei okoutou gutu !

⁶ Talie kua au se kakai ki loku fenua, Leia e makeke ti e toka api. E maua e ia a nifo o se laione, Ti mo kaugutu o se laione fafine.

⁷ Kua maumaui e ia laku vite ; Kua fatifatii e ia laku fiki, Kua talai e ia ona laa, ti kua sele e ia a ia ki lalo. Kua tetea a taulu o le vite.

⁸ Ke ke tagi laulau, ofaipe le taine taupoou leia e tui ia le taga, O tagi ki le alofaaga o lona temi tupulaga !

⁹ Kua pupuli moliga mo lipasio i le fale o le Eteleno ; Kua mamae a tagata faisakilifisio, tagata fakasausau a le Eteleno.

¹⁰ Kua maumau a faisaga, Kua tagi le kele ; Talie kua maumau le fulumeto, Kua masa le vino, kua malo le lolo.

¹¹ Kua luma le kau gaoi kele, kua lauga le kau gaoi vite, O tupu ko le fulumeto mo le olese ; Talie kua maumau a fua o faisaga.

¹² Kua luma le vite, Kua gini le fiki, Ko le kelenati, mo le palemie, mo le pome, Kua gae a laakau fuli o faisaga… Kua puli le fiafia i vosa o le tagata !

¹³ Tagata faisakilifisio, kotou tui okoutou kofu fakamamae ti kotou fetagisi ! Kotou tagi laulau, tagata fakasausau o le aletale ! Kotou au, kotou alaala i le po katoa mo okoutou taga, Tagata fakasausau o le fale o loku Atua ! Talie kua puli a moliga mo lipasio i le fale o lokoutou Atua.

¹⁴ Kotou logologo se sesunio, se fakatasi mamalu ! Kotou fakatasi a matua, mo kakai fuli o le fenua I le fale o le Eteleno, lokoutou Atua, Ti kotou tagi ki le Eteleno !

¹⁵ Oi, se aso fakaii ! Talie kua ofi mai le aso o le Eteleno : E au a ia ofaipe se maumau mei le Mafimafi.

¹⁶ Pe leaise kua too le nea kai i otatou mata ? Pe leaise kua puli le fiafia mo le nekenekea i le fale o lotatou Atua ?

¹⁷ Kua malo a pulapula i le kele ; Kua lavaki a tanakiaga magiti ; Kua maumau a fale koloa, Talie e leaise koi maua se fulumeto.

¹⁸ Oi, kua fetagisi a manu ! Kua gagae a kau pipi Talie e leaise koi maua se mutie ; Ti kua fakaaloalofa foki a kau ovi.

¹⁹ Oi Eteleno, ko koe leia e kau tagi ki ai ! Talie kua tutu e le afi le mutie o le toafa, Ti kua tutu e le ula a laakau fuli o le vao.

²⁰ Kua tagi foki a manu o faisaga kiate koe ; Talie kua malo a liua, Ti kua tutu e le afi a mutie o le toafa.