Soane 9 - Tosi Tapu

Fakamauli o se tagata na tupu kivi

¹ Na tio loa Sesu i lana fakalaka ki se tagata na tupu kivi.

² Na fai loa e ana tisipulo kiate ia le vesili leinei : Pule, ko ai na agasala, ko le tagata leinei pe ko ona matua, ke tupu kivi ai a ia ?

³ Na tali loa Sesu : E leaise ko ia pe ko ona matua ala na agasala, kae tupu ke fakasa a gaoi a le Atua iate ia.

⁴ E tonu ke kau fai koi ao a gaoi a leia na kakau ia mai au ; e au le pouli, leia e leaise mafai ke gaoi ai se tasi.

⁵ I laku koi nofo i le malama nei, ko le malama au o le malama nei.

⁶ I le oki o lana pati lena, na aanu loa a ia ki le kele, ti na fai loa e ia ki lona savale se ga pela. Ti na takai loa e ia ki le ga pela a mata o le kivi,

⁷ o pati kiate ia : Ano, o maanu i le maanuaga o Siloe (ko lona uiga : ko le fakasausau). Na ano loa a ia ki ai o maanu, ti na liliu mai loa a ia kua tio malie.

⁸ Ko ona vasaa fale ti mo latou ala na iloa ia a ia i mua ake ko se tagata kaiisi, na pati loa : Pe leaise ko ia lena na tonatona o kaiisi ?

⁹ Ti na pati ni iki : Ko ia. Ti ko iki : leai, kae e mata a ia pe ia. Ti na pati a ia totonu : Ko au maoki.

¹⁰ Ti na lotou pati loa kiate ia : Pe na ala feaki ou mata ?

¹¹ Na tali loa a ia : Ko le tagata leia e igoa ko Sesu na fai ia se ga pela, o takai ki ai oku mata, ti na pati mai loa a ia kiate au : Ano o maanu i le maanuaga o Siloe. Ti na kau ano ki ai, o maanu, ti na kau tio ai.

¹² Na lotou pati loa kiate ia : Kofea le tagata lena ? Na tali loa a ia : E leaise kau iloa.

¹³ Na lotou taki loa ki le kau faliseo leia na kivi.

¹⁴ Kae ko se aso sapato lena na fai ai e Sesu le ga pela, o fakaala ai a mata o le kivi.

¹⁵ Na toe vesili loa le kau faliseo kiate ia pe na mafai feaki lana tio. Ti na pati loa a ia kia latou : Na takai e ia se ga pela ki oku mata, ti na kau maanu, ti na kau tio.

¹⁶ I le nea lena, na pati loa ni iki o le kau faliseo : E leaise au le tagata lena mei le Atua, talie e leaise tausi e ia le sapato. Kae na pati loa ni iki : Pe mafai feaki e se tagata agasala ni milakulo fenaaki ?

¹⁷ Ti na lotou mavaevae loa i ai. Na lotou toe pati loa ki le kivi : Ko koe, kolea lau pati kiate ia, i lana fakatio ou mata ? Na tali loa a ia : Ko se polofeta a ia.

¹⁸ Na leaise tui loa le kau Sutea na kivi a ia, ti kua tio a ia, o kaku ki lalatou aumai ona matua.

¹⁹ Ti na lotou vesili loa kia laua, o pati : Pe ko lokoulua vosa leinei, leia e kolua pati na tupu kivi ? Ti e feaki loa kua tio a ia i le lakaga nei ?

²⁰ Na tali loa ona matua : E ma iloa ko loma vosa a ia, ti na tupu kivi a ia ;

²¹ Kae pe feaki kua tio a ia i le lakaga nei, pe ko ai leia na fakaala ia ona mata, e leaise ma iloa le nea lena. Kotou vesili kiate ia totonu, kua lasi a ia, e masau loa a ia ki le nea o uiga mo ia.

²² Na pati fenaaki loa ona matua talie na la i ki le kau Sutea ; talie kua tuku e le kau Sutea ke fakamavae mei le sinakoka latou fuli ala e fakasa ia ko Sesu ko le Kilisito.

²³ Koia na pati ai loa ona matua : Kua lasi a ia, kotou vesili kiate ia totonu.

²⁴ Na toe kalagai loa e le kau faliseo le tagata leia na kivi, o pati kiate ia : Tuku ki le Atua le kololia ; e motou iloa ko se tagata agasala le tagata lena.

²⁵ Na tali loa a ia : Kapau ko se tagata agasala a ia, e leaise kau lave ; e kau iloa le nea e tasi, na kau kivi ti kua kau tio i le lakaga nei.

²⁶ Na lotou pati loa kiate ia : Kolea na fai e ia kiate koe ? Pe na feaki lana fakaala ou mata ?

²⁷ Na tali loa a ia kia latou : Kua oki i laku fakasa atu kia koutou, ti na leaise kotou fakalogo ; kolea e kotou toe fia logo ai ki ai ? Pe kotou loto ke kotou liliu foki ko ana tisipulo ?

²⁸ Na lotou tauvele loa kiate ia, o pati : Ko koe leia ko lana tisipulo ; ko matou, ko tisipulo matou a Moisese.

²⁹ E motou iloa na masau le Atua kia Moisese ; kae ko ia leinei, e leaise motou iloa pe au a ia meifea.

³⁰ Na tali loa le tagata lena kia latou : E fakapunamauli ai e leaise kotou iloa pe au a ia meifea ; kae kua fakaala e ia oku mata.

³¹ E tou iloa e leaise tali e le Atua le kau agasala ; kae kapau e fakaapaapa se tasi ki le Atua mo fai ia lona finegalo, e tali e ia a ia.

³² Talu mei le kamataaga o le malama nei e leikiaise logo fua kua fakaala ia e se tasi a mata o se tagata na tupu kivi.

³³ Kapau na leaise au le tagata lena mei le Atua, na leaise mafai fua e ia se nea.

³⁴ Na lotou tali loa kiate ia : Na ke tupu katoa i le agasala, ti e ke ako ia matou ! Ti na lotou kapu loa a ia.

Toe fakamaoki e Sesu o lona Atua

³⁵ Na logo loa Sesu na lotou kapu a ia ; ti e i lana felavei mo ia, na pati loa a ia kiate ia : Pe ke tui ki le Vosa o le Atua ?

³⁶ Na tali loa a ia : Ti ko ai a ia, Aliki, ke kau tui kiate ia ?

³⁷ Na pati loa Sesu kiate ia : Kua ke tio kiate ia, ti ko leia e masau atu kiate koe, ko ia.

³⁸ Ti na pati loa a ia : E kau tui, Aliki. Ti na su loa a ia kiate ia.

³⁹ Ti na pati loa Sesu : Na kau au ki le malama nei o tupu ko se fakamaau : talie ke tio latou ala na kivi, ti ke liliu o kivi latou ala na tio.

⁴⁰ Ko ni iki faliseo ala na nonofo mo ia, i lalatou logo ki folafola ana, na pati loa kiate ia : Pe motou kivi, mo matou foki ?

⁴¹ Na tali loa Sesu kia latou : Kanapau na kotou kivi, e leaise kotou maua loa se agasala. Kae i le lakaga nei e kotou pati : E motou tio, koia e tuumau ai lakoutou agasala.