Soane 7 - Tosi Tapu

Tuigataa o fetaina o Sesu

¹ Sili aia, na feanoaki Sesu i Kalilea, talie na leaise fia nofo a ia i Sutea, talie na afa a ia e le kau Sutea ke tamate.

² Kae kua ofi le aso lasi o le kau Sutea, ko le aso o Tapenakulo.

³ Ti na pati loa ona fetaina kiate ia : Mavae i leinei, o ano ki Sutea, o tupu ke tio foki au tisipulo ki gaoi ala e ke fai.

⁴ E leaise gaoi fakafufu se tasi, mo ka e loto a ia ke sa : Kapau e ke fai a nea ana, fakasa a koe totonu ki le malama nei.

⁵ Talie na leaise tui foki ona fetaina kiate ia.

⁶ Na pati loa Sesu kia latou : E leikiaise tatae loku temi, kae kia koutou, e tatau fuli fai a aso.

⁷ E leaise feala ke vesia le malama nei kia koutou ; kae e vesia a ia kiate au, talie e kau fakamaoki kiate ia e veli ana gaoi.

⁸ Kotou pale, koutou, ki le aso lasi lena ; kae ko au, e leaise kau pale nei ki ai, talie e leikiaise tatae loku temi.

⁹ I le oki o lana fakasa kia latou le nea lena, na nofo loa a ia i Kalilea.

Sesu i Selusalemi i le aso o Falepola

¹⁰ I le kua pale loa ona fetaina ki le aso lasi, na pale foki mo ia ki ai, o leaise fakasasa, kae fakapulipuli.

¹¹ Na afa a ia e le kau Sutea i le lolotoga o le aso lasi, o pati : Kofea a ia ?

¹² Na lasi ai le femumusuaki a le kakai o uiga mo ia. Na pati a iki : Ko se tagata malie. Kae na pati a iki : Leai, e fakasese e ia le kakai.

¹³ Kae na leaise masau fakalauatea se tasi kiate ia, i le i ki le kau Sutea.

¹⁴ I le lolotoga o le aso lasi lena, na pale loa Sesu ki le fale tapu. Ti na akonaki a ia.

¹⁵ Na ofolele le kau Sutea, o pati : Na iloa feaki e ia a folafola ana, a ia leia na leaise ako fua ?

¹⁶ Na tali loa Sesu kia latou : E leaise au laku akonaki meiate au, kae mei leia na kakau ia mai au.

¹⁷ Kapau e fia fai e se tasi lona finegalo, e iloa loa e ia pe au laku akonaki mei le Atua, pe kau masau iate au totonu.

¹⁸ Ko leia e masau iate ia totonu, e afa ia lona kololia toka tasi ; kae ko leia e afa ia le kololia o leia na kakau ia a ia e maoki a ia, ti e leaise se nea fua iate ia e sala.

¹⁹ Pe na leaise soli atu e Moisese le lao kia koutou ? Ti e leaise tasi o koutou e fai ia le lao ? Kolea e kotou afa ai ke tamate au ?

²⁰ Na tali loa le kakai : E nofo iate koe se temonio. Ko ai leia e afa ke tamate ia a koe ?

²¹ Na tali loa Sesu kia latou : Na kau fai se gaoi e tasi i le aso o le sapato, ti na kotou ofolele fuli i ai.

²² Talie na tuku e Moisese le silikosisio kia koutou, kae na leaise au a ia meia Moisese, kae mei le kau pateliaka, ti e kotou silikosisioi se tagata i le aso o le sapato.

²³ Kapau e kotou silikosisioi se tagata i le aso o le sapato o tupu ke aua na maumaui le lao a Moisese, kolea e kotou ita ai kiate au, o tupu ko laku fakamauli se tagata katoa i le aso o le sapato ?

²⁴ Aua na kotou fakamaaui o mulimuli ki le nea leia e sa i tafa, kae kotou fakamaaui o mulimuli ki le faitotonu.

²⁵ Na pati ni iki o Selusalemi : Pe leaise ko ia leia e lotou afa ke tamate ?

²⁶ Ti ko leinei, e masau faifaitalisa a ia, ti e leaise lotou pati kiate ia ! Pe kua fakamaoki foki le kau pule ko ia ko Kilisito ?

²⁷ Kae ko ia leinei, e tou iloa le ganea leia e au a ia mei ai ; kae ko Kilisito, ka au loa a ia, e leaise iloa fua e se tasi le ganea leia e au a ia mei ai.

²⁸ Ti na kalaga loa Sesu, i lana akonaki i le fale tapu : E kotou iloa au, ti e kotou iloa le ganea leia e kau au mei ai ! Na leaise kau au iate au totonu : Kae ko leia na kakau ia mai au e maoki, ti e leaise kotou iloa a ia.

²⁹ Ko au, e kau iloa a ia, talie e kau au meiate ia, ti ko ia leia na kakau ia mai au.

³⁰ Na lotou afa loa ke too a ia, kae na leaise fafa loa le lima o se tasi kiate ia, talie na leikiaise soko lona ola.

³¹ Na tui loa se toka api o le kakai kiate ia, ti na lotou pati : Ko le Kilisito, ka au loa a ia, pe fai loa e ia ni milakulo o lasi ake i la e fai e ia leinei ?

³² Na logo loa le kau faliseo ki mumusu a le kakai ki nea ana o uiga mo ia. Ti na kakau loa e le kau pule faisakilifisio mo le kau faliseo se kau tagata fakasausau, ke lotou too a ia.

³³ Na pati loa Sesu : Koi kau nofo mo koutou i se ga temi ikiiki, ti e kau ano loa ki leia na kakau ia mai au.

³⁴ E kotou afa loa au, ti e leaise kotou maua loa au, ti e leaise feala ke kotou au ki le ganea leia e kau nofo ai loa.

³⁵ Na pati loa le kau Sutea : E ano loa a ia kifea, ke aua na tou toe maua ai loa a ia ? Pe ano loa a ia kia latou ala e mavetevete i le kau Keleka ? Pe akonaki loa a ia ki le kau Keleka ?

³⁶ Kolea le uiga o le folafola lena na fakasa e ia : E kotou afa loa au ti e leaise kotou maua loa au, ti e leaise feala ke kotou au ki le ganea leia e kau nofo ai loa.

Le makeke o le Laumalie Maokioki

³⁷ I le aso fakaoki, ko le aso tafito a ia o le aso lasi, na tuu loa Sesu, o kalaga : Kapau e fia inu se tasi, ke au a ia kiate au, ti ke inu a ia.

³⁸ Ko leia e tui kiate au e tafe loa mei lona loto ni vaitafe o le vai mauli, ofaipe lona tosi.

³⁹ Na pati a ia o uiga mo le Laumalie Maokioki leia e tonu ke tali e latou ala e tui loa kiate ia ; talie na leikiaise soli le Laumalie Maokioki, o tupu na leikiaise fakakololia Sesu.

Manatu kesekese o uiga mo Sesu

⁴⁰ I le logo a le kakai toka api ki le folafola aia, na lotou pati loa : Ko ia leinei ko le polofeta maoki.

⁴¹ Na pati ni iki : Ko le Kilisito. Ti ko iki : Pe feala ke au le Kilisito mei Kalilea ?

⁴² Pe leaise tuu koia i le tosi e tonu ke au le Kilisito mei le sakoga o Tavite, ti mo le kolo o Peteleemi, leia na nofo ai Tavite ?

⁴³ Ti na mavaevae loa le kakai o tupu ko ia.

⁴⁴ Na loto ni iki o latou ke too a ia, kae na leaise se fafa loa le lima o se tasi kiate ia.

⁴⁵ Ti na toe liliu loa le kau tagata fakasausau ki le kau pule faisakilifisio mo le kau faliseo. Ti na lotou pati loa ki le kau tagata fakasausau : Kolea na leaise kotou aumai ai a ia ?

⁴⁶ Na tali loa le kau tagata fakasausau : E leikiai se tagata kua masau i se aso ofaipe le tagata lena.

⁴⁷ Na toe tali loa le kau faliseo kia latou : Pe kua toe kakaai foki mo kotou ?

⁴⁸ Pe i ai se tasi o le kau pule pe ko le kau faliseo kua tui kiate ia ?

⁴⁹ Kae ko le kakai lena, leia e leaise iloa ia le lao, ko le kau malaia a ia !

⁵⁰ Ti na pati loa Nikotemo, ko se tasi o latou, leia na ano kia Sesu i le pouli :

⁵¹ Pe fakatua ki le mate e latatou lao se tagata kae e leikiaise logo kiate ia ti mo iloa le nea leia na fai e ia ?

⁵² Na lotou tali loa kiate ia : Pe toe Kalilea foki mo koe ? Afa, ti ke tio loa e leaise au se polofeta mei Kalilea.

⁵³ Ti na tasi ano loa ki lona fale.