Soane 5 - Tosi Tapu

Fakamauli o le palalisia i Peteseta

¹ Sili aia, na i ai loa se aso lasi o le kau Sutea, ti na pale loa Sesu ki Selusalemi.

² Ti na i ai i Selusalemi, o ofi ki le matapa o ovi, se maanuaga na igoa i le fakaepeleo ko Peteseta, ti na kogafale lima.

³ Ti na momoe i lalo o kogafale ana se kau masaki toka api ai, mo ni kivi, mo ni sape, mo ni palalisia, o talitali ki le taposu o le vai ;

⁴ talie na tautau ifo mai se aselo ki le maanuaga, o taposu i le vai ; ti ko leia e uluaki ifo ki ai i le oki o lana taposu i le vai e mauli loa i lona masaki.

⁵ Na nofo i ai se tagata na masaki talu mei fetuu e kau tolu tupu valu.

⁶ Ko Sesu, i lana tio ki lana moemoe, ti mo lana iloa na nofo masaki a ia talu mei fualoa, na pati loa kiate ia : Pe ke loto ke ke mauli ?

⁷ Na tali loa le tagata masaki kiate ia : Aliki, e leaise kau maua ia se tasi ke ave ia au ki le maanuaga mo ka taposui le vai : ti i le lolotoga o laku ifo ki ai, e ifo se tasi o mua iate au.

⁸ Na pati loa Sesu kiate ia : Tuu ki aluga, too lou palepale, o saele.

⁹ I le lakaga fai lena, na mauli loa le tagata ; ti na too loa e ia lona palepale, o saele.

¹⁰ Ko se aso sapato a ia. Na pati loa le kau Sutea ki leia kua mauli : Ko le sapato ; e leaise taga kiate koe ke amo ia lou palepale.

¹¹ Na tali loa a ia kia latou : Ko leia na fakamauli ia au, na pati mai kiate au : Too lou palepale, o saele ?

¹² Na lotou vesili loa kiate ia : Ko ai le tagata leia na pati atu kiate koe : Too lou palepale, o saele ?

¹³ Kae na leaise iloa e leia na mauli pe ko ai ; talie na mavae loa Sesu i le kakai leia na nonofo i le ganea lena.

¹⁴ Talu mei ai, na toe maua loa a ia e Sesu i le fale tapu, ti na pati loa a ia kiate ia : Ko leinei kua ke mauli ; aua na ke toe agasala, talie na soko loa kiate koe se nea leia e toe veli oki ake.

¹⁵ Na ano loa le tagata lena, o fakasa ki le kau Sutea ko Sesu leia na fakamauli ia a ia.

¹⁶ Ko le tupuaga loa a ia o lalatou fakaveliveli kia Sesu, o tupu ko lana fai a nea ana i le sapato.

Fakasa e Sesu o lona tatau mo le Tamana

¹⁷ Kae na tali loa Sesu kia latou : Koi gaoi loku Tamana i le temi nei ; ko au foki, e kau gaoi.

¹⁸ Koia na toe asilisili faiga ai le kau Sutea ke tamate a ia, o leaise tupu fua na maumaui e ia le sapato, kae na pati a ia ko le Atua ko lona Tamana totonu, o fakatatau a ia ki le Atua.

¹⁹ Ti na toe masau loa Sesu kia latou, o pati : E maoki, e maoki, e kau pati atu kia koutou, e leaise feala ke fai e le Alo se nea iate ia totonu, e fai e ia le nea leia e tio a ia e fai e le Tamana ; ti ko nea fuli ala e fai e le Tamana, e toe fai foki e le Alo.

²⁰ Talie e alofa le Tamana ki le Alo, o fakasa e ia kiate ia a nea fuli ala e fai e ia ; ti e fakasa loa e ia kiate ia ni gaoi lalasi ake i gaoi anei, o tupu ke kotou ofolele ai.

²¹ Talie ofaipe le tamana e fakatuuake ia le kau mate ti e soli ia kia latou le mauli, e toe soli foki e le Alo le mauli ki leia e loto a ia ki ai.

²² E leaise fakamaaui e le Tamana se tasi, kae kua tuku e ia a fakamaau fuli ki le Alo,

²³ o tupu ke fakaapaapa fuli ki le Alo ofaipe lalatou fakaapaapa ki le Tamana. Ko leia e leaise fakaapaapa ki le Alo, e leaise fakaapaapa a ia ki le Tamana leia na kakau ia mai le Alo.

²⁴ E maoki, e maoki, e kau pati atu kia koutou, ko leia e fakalogo ki laku folafola, ti mo tui ki leia na kakau ia mai au, e maua e ia le mauli lee gato ti e leaise toe au a ia ki le fakamaau, kae kua fakalaka a ia mei le mate ki le mauli.

²⁵ E maoki, e maoki, e kau pati atu kia koutou, e au le ola, ti kua soko foki a ia, e logo ai loa le kau mate ki le leo o le Alo o le Atua ; ti ko latou ala e logo loa ki ai e mauli loa.

²⁶ Talie, ofaipe le Tamana e maua ia le mauli iate ia totonu, kua toe soli foki e ia ki le Alo ke maua e ia le mauli iate ia totonu.

²⁷ Kua soli e ia kiate ia le pule ki le fakamaau, talie ko le Vosa a ia o le tagata.

²⁸ Aua na kotou punamauli ki le nea lena ; talie e au le ola leia e logo ai loa latou fuli ala e nonofo i tanuma ki lona leo, ti e lotou ulu loa ki tafa.

²⁹ Ko latou ala na fai ia loa le malie e toe tuuake loa ki le mauli, kae ko latou ala na fai ia le veli e toe tuuake loa ki le fakamaau.

³⁰ E leaise kau mafai fua se nea iate au totonu : E kau fakamaau o mulimuli ki le nea leia e kau logo ki ai ; ti e maoki laku fakamaau, talie e leaise kau afa ia loku finegalo, kae e kau afa le finegalo o leia na kakau ia mai au.

Fakamaoki a le Tamana

³¹ Kanapau na kau fakamaoki kiate au totonu, e loi laku fakamaoki.

³² E i ai se tasi ake leia e fakamaoki kiate au, ti e kau iloa e maoki lana fakamaoki kiate au.

Fakamaoki a Soane-Patita

³³ Na kotou kakau ni kakai kia Soane, ti na fakamaoki a ia ki le maoki.

³⁴ Kae kiate au e leaise ko se tagata leia na kau tali mei ai le fakamaoki ; kae e kau fakasa le nea leinei, o tupu ke kotou maua le mauli.

³⁵ Ko Soane ko le malama leia e ula mo malama, ti na kotou loto ke kotou fakafiafia i se ga temi ikiiki i lona malama.

Fakamaoki a gaoi a Sesu

³⁶ Ko au, e kau maua se fakamaoki leia e lasi ake i le fakamaoki a Soane ; talie ko gaoi ala na tuku mai e le Tamana ke kau fakasoko, a gaoi anei e kau fai, e fakamaoki kiate au ko le Tamana totonu leia na kakau ia mai au.

Fakamaoki a le Tamana

³⁷ Ti ko le Tamana leia na kakau ia mai au na fakamaoki totonu kiate au. Na leaise kotou logo fua ki lona leo i se aso, pe tio ki ona mata,

³⁸ ti e leaise nofo lana folafola ia koutou, talie e leaise kotou tui ki leia na kakau mai e ia.

Fakamaoki a le Tosi

³⁹ E kotou sufe le Tosi tapu talie e kotou manatu e kotou maua i ai le mauli lee gato. Ko le Tosi tapu leia e fakamaoki kiate au.

⁴⁰ Ti e leaise kotou fia au kiate au, o tupu ke kotou maua le mauli !

⁴¹ E leaise kau tali loku kololia mei tagata.

⁴² Kae e kau iloa e leaise koi maua ia koutou le alofa ki le Atua.

⁴³ Na kau au i le suafa o loku Tamana, ti na leaise kotou tali au : Kapau e au se tasi i lona igoa totonu, e kotou tali loa a ia.

⁴⁴ E feaki le mafai ke kotou tui, koutou ala e afa ia lokoutou kololia ia koutou, kae e leaise kotou afa le kololia leia e au mei le Atua toka tasi ?

⁴⁵ Aua na kotou manatu, ko au e kau tukugavelii ia loa koutou i mua o le Tamana, ko leia e tukugavelii ia koutou, ko Moisese, leia na kotou tuku ki ai lakoutou fanaki.

⁴⁶ Talie kanapau na kotou tui kia Moisese, e kotou tui mai foki kiate au, talie na tosi e ia kiate au.

⁴⁷ Kae kapau e leaise kotou tui ki ana tosi, e feaki loa ke kotou tui ki aku folafola ?