Soane 3 - Tosi Tapu

Sesu mo Nikotemo : le tupu foou

¹ Kae na i ai loa se tagata i le kau faliseo, na igoa ko Nikotemo, ko se pule o le kau Sutea,

² leia na au loa kia Sesu i le pouli, o pati kiate ia : Pule, e motou iloa ko se toketa a koe na au mei le Atua ; talie e leaise tasi e fai ia a milakulo ana e ke fai, mo kapau e leaise nofo le Atua iate ia.

³ Na tali loa Sesu kiate ia : E maoki, e maoki, e kau pati atu kiate koe, kapau e leaise tupu foou se tagata, e leaise feala ke tio a ia ki le puleaga o le Atua.

⁴ Na pati loa Nikotemo kiate ia : Pe mafai feaki ke tupu se tagata mo ka kua matua a ia ? Pe mafai ke toe ulu a ia ki le manava o lona tinana, o toe tupu ?

⁵ Na tali loa Sesu : E maoki, e maoki, e kau pati atu kiate koe, kapau e leaise tupu se tagata i le vai mo le Laumalie Maokioki, e leaise feala ke ulu a ia ki le puleaga o le Atua.

⁶ Ko le nea leia na tupu i le kanofi e kanofi, ti ko le nea leia na tupu i le Laumalie Maokioki e laumalie.

⁷ Aua na ke punamauli i laku pati atu kiate koe : E tonu ke kotou tupu foou.

⁸ E agi le matagi ki le ganea leia e loto a ia ki ai, ti e ke logo fua ki lona mumusu ; kae e leaise ke iloa pe au a ia meifea, pe ano a ia kifea. E toe tatau foki ki tagata fuli ala na tupu i le Laumalie.

⁹ Na pati loa Nikotemo kiate ia : E soko feaki le nea lena ?

¹⁰ Na tali loa Sesu kiate ia : Ko le toketa a koe o le lao i Iselaele, ti e leaise ke iloa a nea ana !

¹¹ E maoki, e maoki, e kau pati atu kiate koe, e motou pati ki le nea leia e motou iloa, ti e motou fakamaoki ki le nea leia na motou tio ki ai ; kae e leaise kotou tali lamatou fakamaoki.

¹² Kapau e leaise kotou tui mo ka kau masau atu ki nea o le kele, ti e feaki ake loa ke kotou tui peka kau masau atu loa kia koutou ki nea o le lagi ?

¹³ E leikiaise pale se tagata ki le lagi, kae gato fuai ki leia na ifo mei le lagi, le Vosa o le tagata leia e nofo i le lagi.

Fakatata o le gata kapa

¹⁴ Ti ofaipe Moisese na fakatuu ia le gata i le toafa, e tonu foki ke fakatuu le Vosa o le tagata ki aluga,

¹⁵ o tupu ko se tasi fua e tui kiate ia, ke maua e ia le mauli lee gato.

¹⁶ Talie na alofa lasi ai le Atua ki le malama nei, na soli e ia lona Alo fuatasi, o tupu ko se tasi fua e tui kiate ia ke aua na mate, kae ke maua e ia le mauli lee gato.

¹⁷ Talie na leaise kakau mai e le Atua lona Alo ki le malama nei ke fakamaaui e ia le malama nei, kae ke mauli le malama nei iate ia.

¹⁸ Ko leia e tui kiate ia e leaise fakamaaui loa ; kae ko leia e leaise tui kua fakamaaui a ia, talie na leaise tui a ia ki le suafa o le Alo fuatasi o le Atua.

¹⁹ Ti ko leinei le fakamaau lena, na au le malama ki le malama nei, kae na filifili e tagata le fakapouli i le malama, talie na veveli alatou gaoi.

²⁰ Talie ko leia e fai ia le veli e vesia ki le malama, ti e leaise au a ia ki le malama, o tupu ke aua na sa ana gaoi ;

²¹ kae ko leia e fai ia le maoki e au ki le malama, o tupu ke sa ana gaoi, talie na fai latou i le Atua.

Fakamaoki foou a Soane-Patita

²² Sili aia, na ano loa Sesu mo ana tisipulo ki le fenua o Sutea ; ti na nofo a ia i ai mo latou o faipapitema.

²³ Na faipapitema foki Soane i Enoni, o ofi ki Salimi, talie na lasi le vai i ai, ti na ano ki ai le kakai ke papitema.

²⁴ Talie na leikiaise tuku Soane ki le pilisoni.

²⁵ Ti na malaga loa se visi i tisipulo a Soane mo se tagata Sutea o uiga mo le fakamea.

²⁶ Na lotou ano loa kia Soane, o pati kiate ia : Pule, ko leia na nofo mo koe i leia atu kauvai o le Solotane, leia na ke fakamaoki ki ai, ko leinei, e faipapitema a ia, ti kua ano fuli le kakai kiate ia.

²⁷ Na tali loa Soane : E maua fai e le tagata le nea leia na tuku kiate ia mei le lagi.

²⁸ Ko koutou totonu, e kotou fakamaoki kiate au na kau pati : E leaise ko Kilisito au, kae na kakau mai au i ona mua.

²⁹ Ko leia a ana le fafine avaga, ko le tagata avaga ; kae ko le kaukaunea o le tagata avaga, leia e tuu i ona tafa o logo kiate ia, e logoi e ia se fiafia lasi, o tupu ko le leo o le tagata avaga : koia ko le fiafia lena, leia ko looku foki, kua katoa.

³⁰ E tonu ke tupu ake a ia o lasi, kae ke kau ifo o ikiiki.

³¹ Ko leia e au mei aluga e taualuga a ia i tagata fuli ; ko leia na tupu i le kele e kele, ti e masau a ia ofaipe se tasi o le kele. Ko leia e au mei lagi e taualuga a ia i tagata fuli,

³² e fakamaoki a ia ki nea ala na tio a ia mo logo ki ai, ti e leaise tali fua e se tasi lana fakamaoki.

³³ Ko leia kua tui ki lana fakamaoki, na fakamaoki a ia e maoki le Atua ;

³⁴ talie ko leia na kakau mai e le Atua e fakasa ia a folafola a le Atua, talie e leaise tuku e le Atua kiate ia le Laumalie Maokioki, o fakafuafua.

³⁵ E alofa le Tamana ki le Alo, ti kua tuku e ia a nea fuli ki ona lima.

³⁶ Ko leia e tui ki le Alo e maua e ia le mauli lee gato ; ko leia e leaise tui ki le Alo e leaise toe tio loa a ia ki le mauli, kae e nofo loa le sausau o le Atua iate ia.