Soane 20 - Tosi Tapu

Toe tuuake o Sesu-Kilisito

¹ I le uluaki aso o le vasaa, na ano loa Malia mei Maketala ki le tanuma i le pogipogi usu, kae koi fakapouli ; ti na tio loa a ia kua too le fatu mei le tanuma.

² Na makape loa a ia kia Simone Petelo mo le tisipulo leia na alofa ki ai Sesu, o pati kia laua : Kua lotou too le Aliki mei le tanuma, ti e leaise motou iloa pe kua lotou tuku a ia kifea.

³ Na ulu loa Petelo ki fafo mo leia ake tisipulo, o ano ki le tanuma.

⁴ Na la makape fakatasi. Kae na mauvave ake loa leia ake tisipulo ia Petelo, ti na uluaki kaku loa a ia ki le tanuma.

⁵ I lana tulolo ki lalo, na tio loa a ia kua tuku fa kie sai i le kele, kae na leaise ulu loa a ia ki loto.

⁶ Ko Simone Petelo, leia na muli mai iate ia, na kaku ake loa, o ulu ki le tanuma ; ti na tio loa a ia ki kie sai kua tuku i le kele,

⁷ ti mo le tupenu leia na teki i le ulu o Sesu, na leaise tuku fakatasi mo kie sai, kae kua fetui a ia, o tuku kese.

⁸ Ti ko leia ake tisipulo, leia na uluaki kaku mai ki le tanuma, na toe ulu loa mo ia ki loto ; ti na tio loa a ia, ti na tui loa a ia.

⁹ Talie na leikiaise la matala foki ki le Tosi, leia e tonu ke toe tuuake Sesu mei le kau mate.

¹⁰ Ti na toe liliu loa le sa tisipulo ki lola kaiga.

Sa o Sesu kia Malia Maketalena

¹¹ Kae na tuu loa Malia i fafo o ofi ki le tanuma, o tagi. I lana tagi na punou loa a ia o faino ki le tanuma ;

¹² ti na tio loa a ia ki ni aselo e toka lua na kofu tetea, na tonatona i le ganea leia na fakamoe ai le tino o Sesu, ko le tasi i le ulu, ti ko le tasi i vae.

¹³ Na la pati loa kiate ia : Fafine, kolea e ke tagi ai ? Na tali loa a ia kia laua : Talie kua lotou ave loku Aliki, ti e leaise kau iloa pe kua lotou tuku a ia kifea.

¹⁴ I lana masau lena, na maliu loa a ia ki muli, ti na tio loa a ia kia Sesu e tuu ; kae na leaise iloa e ia ko Sesu a ia.

¹⁵ Na pati loa Sesu kiate ia : Fafine, kolea e ke tagi ai ? Ko ai leia e ke afa ia ? Na tuku e Malia ko le tagata fai oloto, ti na pati loa a ia kiate ia : Aliki, kapau ko koe leia na ave ia a ia, fakasa mai kiate au pe na ke tuku a ia kifea, ti e kau too loa a ia.

¹⁶ Na pati loa Sesu kiate ia : Malia ! Na maliu loa Malia, o pati kiate ia i le fakaepeleo : Rabbouni ! (Ko lona uiga, Pule).

¹⁷ Na pati loa Sesu kiate ia : Auase ke fafa mai kiate au ; talie e leikiaise kau pale ki loku Tamana. Kae ke ke ano ki oku fetaina, o pati kia latou e kau pale ki loku Tamana ti ko lokoutou Tamana, ki loku Atua ti ko lokoutou Atua.

¹⁸ Na ano loa Malia Maketalena, o fakasa ki le kau tisipulo kua tio a ia ki le Aliki, ti kua fakasa ake e ia kiate ia a nea anei.

Sa o Sesu ki tisipulo kae puli Tomasi

¹⁹ I le afiafi o le aso lena, leia ko le uluaki aso o le vasaa, kua tapono a matapa o le ganea leia na fakatasi ai le kau tisipulo, o tupu ko lolatou i ki le kau Sutea, na au loa Sesu, o tuu i loto malie o latou, o pati kia latou : Ke nofo ia koutou le tokamalie !

²⁰ Ti oki lana pati a ia, na fakasa loa e ia kia latou ona lima mo lona vakavaka. Ti na fiafia loa le kau tisipulo i lalatou tio ki le Aliki.

²¹ Na toe pati loa Sesu kia latou : Ke nofo ia koutou le tokamalie ! Ofaipe loku kakau mai e le Tamana, ko au foki e kau kakau koutou.

²² I le oki o folafola ana, na pupusi loa a ia kia latou, o pati kia latou : Kotou tali le Laumalie Maokioki.

²³ Ko latou ala e kotou fakamolemole loa ki ai alatou agasala, e fakamolemole loa latou kia latou, ti ko latou ala e kotou taofi loa ki ai alatou agasala, e taofi loa latou kia latou.

Sa o Sesu ki tisipulo mo Tomasi

²⁴ Ko Tomasi, leia na igoa ko Ata, ko se tasi o le tino agafulu tupu lua, na leaise nofo mo latou i le au a Sesu.

²⁵ Na pati loa a la ake tisipulo kiate ia : Kua motou tio ki le Aliki. Kae na pati loa a ia kia latou : Kapau e leaise kau tio ki pu o fao i ona lima, ti kapau e leaise kau velo loku maikao ki pu o fao, ti kapau e leaise kau teki loku lima ki lona vakavaka, e leaise kau tui loa.

²⁶ Sili ni aso e valu, na toe fakatasi le kau tisipulo a Sesu i le fale, ti na nofo Tomasi mo latou. Na au loa Sesu, kae kua tapono a matapa, o tuu i loto malie o latou, o pati : Ke nofo ia koutou le tokamalie !

²⁷ Ti na pati loa a ia kia Tomasi : Sosoaki mai lou maikao ki leinei, o tio ki oku lima ; sosoaki mai foki lou lima, o teki ki loku vakavaka ; ti aua na ke tui gataa, kae ke tui.

²⁸ Na tali loa Tomasi kiate ia : Ei loku Aliki mo loku Atua ! Na pati loa Sesu kiate ia :

²⁹ Talie kua ke tio kiate au, kua ke tui ai. Manuia latou ala na leaise tio, ti na tui !

Tupuaga o le Evaselio a Soane

³⁰ Ti na toe fai foki e Sesu, i mua o ana tisipulo, ni iki ake milakulo lasi ai, ala na leaise tosi i le tosi leinei.

³¹ Kae kua tosi a nea anei o tupu ke kotou tui ko Sesu ko le Kilisito, ko le Alo o le Atua, ti ke kotou maua le mauli i lona suafa ki lakoutou tui.