Soane 2 - Tosi Tapu

Faiavaga i Kana

¹ Na sili loa aso e tolu, ti na i ai loa se faiavaga i Kana i Kalilea ; na nofo i ai le tinana o Sesu,

² ti na fakaafe foki Sesu mo ana tisipulo ki le faiavaga.

³ I le tamaki o le vino, na pati loa le tinana o Sesu kiate ia : Kua oki le vino.

⁴ Na tali loa Sesu kiate ia : Fafine, pe i ai se nea iate au mo koe ? E leikiaise tatae loku ola.

⁵ Na pati loa lona tinana ki le kau tagata fakasausau : Kotou fai le nea leia e pati atu loa a ia ki ai.

⁶ Kae na tuu i ai ni fagu fatu e ono ki le fanofano a le kau Sutea, ti na fua taki lua pe taki tolu le fagu.

⁷ Na pati loa Sesu ki le kau tagata fakasausau : Kotou fakaapele a fagu ana ki le vai. Ti na lotou fakaapele pipi loa a fagu.

⁸ Na pati loa a ia kia latou : Kotou asu, o ave ki le pule o le kai. Ti na lotou ave loa a ia kiate ia.

⁹ I le asiasii e le tagata pule o le kai le vai kua liliu o vino, na leaise iloa e ia pe na au meifea le vino lena, kae na iloa malie lona auaga e le kau tagata fakasausau ala na asu ia le vai, ti na kalagai loa e ia le tagata avaga,

¹⁰ o pati kiate ia : E kamata tagata fuli i le vino malie, o fakaoki ki le vino maamaa mo kapau kua mau le kakai, kae ko koe, na ke taofi le vino malie o kaku mai ki le lakaga nei.

¹¹ Ko le uluaki milakulo loa a ia, leia na fai loa e Sesu i Kana i Kalilea. Na fakasa loa e ia lona kololia, ti na tui loa ana tisipulo kiate ia.

¹² I le sili o le nea lena, na ifo loa Sesu ki Kafanaume mo lona tinana, mo ona fetaina, mo ana tisipulo, ti na lotou nonofo loa i ai i ni ga aso teiki fua.

Kapu o le kau fai fakatau i le fale tapu

¹³ Ti kua ofi le Pasikate o le kau Sutea, na pale loa Sesu ki Selusalemi.

¹⁴ Na maua loa e ia i le fale tapu le kau fakatau pipi, mo ovi, mo lupe, ti mo le kau fetogi paaga kua nonofo i ai.

¹⁵ Ti na fai loa e ia se suipi ki ni maea, o kapu latou fuli i le fale tapu, mo ovi, mo pipi ; ti na veuki loa e ia a paaga a le kau fetogi paaga, ti na tekatekai loa e ia olatou laupapa.

¹⁶ Ti na pati loa a ia ki le kau fakatau lupe : Ave kese a nea ana i leinei, aua na kotou fakaliliu le fale o loku Tamana ko se fale fakatau.

¹⁷ Na manatui loa e ana tisipulo e tosi : E kai au e le alofa ki lou fale.

¹⁸ Na pati loa le kau Sutea kiate ia : Kolea le milakulo leia e ke fakasa mai kia matou, o tupu ke ke fai ai a nea ana ?

¹⁹ Na tali loa Sesu kia latou : Kotou maumaui le fale tapu lena, ti e kau toe lagai loa a ia i ni aso e tolu.

²⁰ Na pati loa le kau Sutea : Na aoga ai ni fetuu e kau fa tupu ono ke laga ai le fale tapu lena, ti ko koe, e ke toe lagai loa a ia i ni aso fai e tolu !

²¹ Kae na masau Sesu ki le fale tapu o lona tino.

²² Koia i lana toe tuuake i le kau mate, na manatui loa e ana tisipulo na masau a ia ki le nea lena, ti na lotou tui loa ki le Tosi mo le folafola leia na fakasa e Sesu.

²³ I le nofo a Sesu i Selusalemi i le aso o le Pasikate, na tui loa se toka api ki lona suafa, i lalatou tio ki milakulo ala na fai e ia.

²⁴ Kae na leaise fanaki fua Sesu kia latou, talie na iloa e ia latou fuli,

²⁵ ti talie na leaise aoga ke fakasa ake e se tasi kiate ia se nea o uiga mo se tagata ; talie na iloa e ia le loto o le tagata.