Soane 18 - Tosi Tapu

Sakilifisio o le Alo o le Atua

¹ I le oki o lana fakasa a nea ana, na ano loa Sesu mo ana tisipulo ki leia atu fetuu o le vaitafe ko Setolone, leia na tuu ai se oloto, ti na ulu loa a ia ki ai mo ana tisipulo.

² Ti na iloa foki e Sutasi, leia na fakatau ia a ia, le ganea lena, talie na tau fakatasi ki ai Sesu mo ana tisipulo.

³ Ti na ano foki ki ai Sutasi, o taki le kau solia, ti mo ni fakasausau ala na kakau e le kau pule faisakilifisio mo le kau faliseo mo ni malama taki, mo ni afi taume, ti mo ni masafu tau.

⁴ Kae i le iloa e Sesu o nea fuli ala e tonu ke soko kiate ia, na saele loa a ia kia latou, o pati : Ko ai leia e kotou afa ia ?

⁵ Na lotou tali loa kiate ia : Sesu mei Nasaleti. Na pati loa Sesu kia latou : Ko au. Ti na tuu foki mo latou a Sutasi, leia na fakatau ia a ia.

⁶ I le pati a Sesu kia latou : Ko au, na lotou solomuli loa o fetekai ki le kele.

⁷ Ti na toe vesili loa Sesu kia latou : Ko ai leia e kotou afa ia ? Ti na lotou pati loa : Ko Sesu mei Nasaleti.

⁸ Na tali loa Sesu : Kua kau pati atu kia koutou ko au. Ti kapau ko au leia e kotou afa ia, tuku latou anei ke ano.

⁹ Na fai e ia le pati lena, o tupu ke fakasoko le folafola leia na fakasa e ia : Na leaise kau tuku ke puli se tasi fua o latou ala na ke soli mai kiate au.

¹⁰ Ko Simone Petelo, leia na nofo mo se seleta, na tosoi ia loa a ia, o taai le tagata fakasausau a le pule faisakilifisio, o motu ai lona taliga atamai. Ko le igoa o le tagata fakasausau lena ko Malekusi.

¹¹ Ti na pati loa Sesu kia Petelo : Toe velo lau seleta ki lona tukuaga. Pe leaise kau inu loa le ipu leia na soli mai e le Tamana ke kau inu ?

Sesu i mua o Anasi mo Kaifa :

¹² Ti ko le kau solia, mo le pule solia, ti mo le kau fakasausau a le kau Sutea, na too ia loa Sesu, o sai a ia.

¹³ Ti na lotou uluaki taki loa a ia ki le fale o Anasi ; talie ko le tamana a ia o le avaga o Kaifa, leia na pule faisakilifisio i le fetuu lena.

¹⁴ Ti ko Kaifa leia na tuku ia le tonu leinei ki le kau Sutea : E malie ake ke mate se tagata e toka tasi ki le kakai.

Fakafiti tua tolu a Petelo

¹⁵ Na mulimuli Simone Petelo mo se tasi ake tisipulo ia Sesu. Na iloa le tisipulo lena e le pule faisakilifisio, ti na ulu loa a ia mo Sesu ki le loto malae o le pule faisakilifisio ;

¹⁶ kae na nofo loa Petelo i fafo o ofi ki le matapa. Ko leia ake tisipulo, leia na iloa e le pule faisakilifisio, na ulu loa ki fafo o masau ki le fafine fakasausau, ti na fakaulu loa e ia Petelo ki loto.

¹⁷ Ti na pati loa le fafine tuu matapa kia Petelo : Ko koe foki, pe leaise ke kau i tisipulo a le tagata lena ? Na tali loa a ia : Leai, e leaise kau kau fua i ai ?

¹⁸ Ko le kau tagata fakasausau mo le kau leo, ala na tutuu i ai, na tafu ia loa se afi, talie na momoko, ti na lotou fakamafana loa i ai. Na nofo foki Petelo mo latou, o fakamafana.

¹⁹ Na fakavesilii loa Sesu e le pule faisakilifisio o uiga mo ana tisipulo ti mo lana akonaki.

²⁰ Na tali loa Sesu kiate ia : Na kau masau fakalauatea ki le malama nei ; na kau akonaki tuumau i le sinakoka ti mo le fale tapu, leia na fakatasi ai le kau Sutea katoa, ti na leaise kau pati fakafufu ki se nea.

²¹ Kolea e ke fakavesilii ai au ? Vesili kia latou ala kua logo kiate au, o uiga mo nea ala na kau fakasa kia latou ; ko leinei, e lotou iloa le nea leia na kau masau ki ai.

²² I pati ana, ko se tasi o le kau leo, ala na nonofo i ai, na paai ia loa Sesu, o pati : Pe ke tali fenaaki ki le pule faisakilifisio ?

²³ Na tali loa Sesu kiate ia : Kapau na kau masau veli, fakasa mai lona veli ; ti kapau na kau masau malie, kolea e ke paai ai au ?

²⁴ Na kakau loa e Anasi ke ave a ia mo ona sai kia Kaifa, ko le pule faisakilifisio.

²⁵ Na nofo loa Simone Petelo i ai, o fakamafana. Na pati loa se tasi kiate ia : Ko koe foki, pe leaise ke kau i ana tisipulo ? Na fakafiti loa a ia, o pati : Leai, e leaise kau kau i ai.

²⁶ Ko se tasi i le kau tagata fakasausau a le pule faisakilifisio, ko se kaiga o leia na tuuti e Petelo lona taliga, na pati loa : Pe na leaise kau tio kiate koe mo ia i le oloto ?

²⁷ Na toe fakafiti loa Petelo ki ai. Ti na koukoua loa le moatoa i le lakaga fai lena.

Sesu i mua o Pilato

²⁸ Na lotou taki loa Sesu mei le fale o Kaifa o ave ki le peletolio ; ko le pogipogi usu lena. Na leaise lotou ulu loa ki le peletolio o tupu ke aua na lotou kelekele, kae ke feala lalatou kai le Pasikate.

²⁹ Na ulu loa Pilato ki fafo kia latou, o pati : Kolea le nea leia e kotou fakalakasala ai le tagata leinei ?

³⁰ Na lotou tali loa kiate ia : Kanapau na leaise ko se tagata agaveli a ia, na leaise motou aumai loa a ia kiate koe.

³¹ I le nea lena, na pati loa Pilato kia latou : Kotou too a ia, ti kotou fakamaaui a ia o mulimuli ki lakoutou lao. Na pati loa le kau Sutea kiate ia : E leaise taga kia matou ke motou tamate se tasi.

³² Ti na fakasoko ai le folafola a Sesu, i lana fakasa le mate leia e tonu ke mate ai a ia.

³³ Na toe ulu loa Pilato ki le peletolio o kalagai Sesu, o pati kiate ia : Pe ko le sau a koe o le kau Sutea ?

³⁴ Na tali loa Sesu : Pe au meiate koe totonu le nea lena, pe na masau atu ni iki kiate koe o uiga mo au ?

³⁵ Na tali loa Pilato : Pe ko au ko se Sutea ? Kua aumai a koe kiate au e lou kakai mo le kau pule faisakilifisio : Kolea na ke fai ?

³⁶ Na tali loa Sesu : E leaise kau loku puleaga i le malama nei. Kana kau loku puleaga i le malama nei, e tau loa aku tagata fakasausau kiate au o tupu ke aua na tuku au ki le kau Sutea ; kae i le lakaga nei e leaise kau loku puleaga i lalo nei.

³⁷ Na pati loa Pilato kiate ia : Pe ko se sau koia a koe ? Na tali loa Sesu : E ke fakasa a ia, e kau sau. Na kau tupu ti na kau au ki le malama nei o fakamaoki ki le maoki. Ko leia e nofo i le maoki, e logo a ia ki loku leo.

³⁸ Na pati loa Pilato kiate ia : Kolea le maoki ? I le oki o lana pati lena, na toe ulu loa a ia ki fafo ki le kau Sutea, o pati kia latou : E leaise kau maua fua se sala iate ia.

Palapasi ; Sesu

³⁹ Kae o tupu ko se agai fenua ia koutou ke kau tuku atu kia koutou se tasi i le aso o le Pasikate, pe kotou loto ke kau tuku atu kia koutou le sau o le kau Sutea ?

⁴⁰ Ti na lotou toe kalaga fuli loa : Leai a ia, kae ko Palapasi. Kae ko Palapasi ko se tagata kaia a ia.