Soane 17 - Tosi Tapu

Faikole a Sesu ko le pule faisakilifisio

¹ I le oki o lana masau a ia, na siki loa e Sesu ona mata ki le lagi, o pati : Tamana, kua soko le ola ! Fakakololia lou Alo, o tupu ke fakakololia a koe e lou Alo,

² Talie kua ke tuku kiate ia le pule ki tagata fuli, o tupu ke soli e ia le mauli lee gato kia latou fuli ala kua ke soli ki ai.

³ Ti ko leinei le mauli lee gato, ke lotou iloa a koe, leia ko le Atua maoki fai e tasi, ti mo leia na ke kakau ia mai, Sesu-Kilisito.

⁴ Kua kau fakakololia a koe i le malama nei : kua kau fakaoki le gaoi leia na ke tuku mai ke kau fai.

⁵ Ti ko leinei, ei Tamana, fakakololia au i ou tafa totonu ki le kololia leia na kau maua i ou tafa i mua o le fakatupu o le malama nei.

⁶ Kua kau fakasa lou suafa ki tagata ala na ke soli mai kiate au mei loto malie o le malama nei. Ko tagata latou a au, ti na ke soli mai latou kiate au ; ti kua lotou fakalogo ki lau folafola.

⁷ I le lakaga nei kua lotou iloa ko nea fuli ala na ke soli mai kiate au e au meiate koe.

⁸ Talie na kau soli kia latou a folafola ala na ke tuku mai kiate au ; ti kua lotou tali latou, ti kua lotou iloa papau na kau au meiate koe, ti kua lotou tui na ke kakau ia mai au.

⁹ E kau faikole kia latou. E leaise kau faikole ki le malama nei, kae kia latou ala na ke soli mai kiate au, talie a au latou ;

¹⁰ ti ko aku nea fuli ko au nea, ti ko au nea ko aku nea ; ti e kau fakakololia ia latou.

¹¹ E leaise koi kau nofo i le malama nei, kae e lotou nonofo i le malama nei, ti e kau natu kiate koe. Tamana maokioki, taupau latou i lou suafa leia na ke soli mai kiate au, o tupu ke lotou liliu ko se nea e tasi ofaipe taua.

¹² I laku koi nofo mo latou i le malama nei, na kau taupau latou i lou suafa. Na kau taupau latou ala na ke soli mai kiate au, ti na leaise puli se tasi o latou, kae gato fai ki le vosa o le malaia, o tupu ke fakasoko ai le Tosi.

¹³ Ti ko leinei, e kau natu kiate koe, ti e kau fakasa a nea ana i le malama nei, o tupu ke katoa ia latou loku fiafia.

¹⁴ Kua kau tuku kia latou lau folafola ; ti kua vesia le malama nei kia latou, talie e leaise lotou kau i le malama nei, ofaipe au e leaise kau kau i le malama nei.

¹⁵ E leaise kau kole atu kiate koe ke ke too latou mei le malama nei, kae ke ke saofaki latou mei le veli.

¹⁶ E leaise lotou kau i le malama nei, ofaipe au e leaise kau kau i le malama nei.

¹⁷ Fakatapui latou ki le maoki, ko lau folafola ko le maoki.

¹⁸ Ofaipe lau kakau mai au ki le malama nei, na kau toe kakau foki latou ki le malama nei.

¹⁹ Ti e kau fakatapui a au totonu o tupu ko latou, o tupu ke lotou fakatapui latou totonu kiate koe.

²⁰ E leaise ko latou fua ala e kau faikole ki ai, kae kia latou foki ala e tui loa kiate au i lalatou folafola,

²¹ o tupu ke lotou liliu fuli ko se nea e tasi, ofaipe koe, Tamana, e ke nofo iate au, ti mo au iate koe, o tupu ke lotou liliu foki ko se nea e tasi ia taua : O tupu ke tui le malama nei na ke kakau mai au.

²² Kua kau tuku kia latou le kololia leia na ke soli mai kiate au, o tupu ke lotou liliu ko se nea e tasi ofaipe taua ko se nea e tasi,

²³ ko au ia latou, ti ko koe iate au, o tupu ke lotou liliu maoki ko se nea e tasi, ti ke iloa e le malama nei na ke kakau mai au, ti na ke alofa kia latou ofaipe lou alofa kiate au.

²⁴ Tamana, na ke soli mai latou kiate au, ti e kau loto ke lotou nonofo foki mo au i le ganea leia e kau nofo ai, o tupu ke lotou tio ki loku kololia, le kololia leia na ke soli mai kiate au, talie na ke alofa kiate au i mua o le fakatupu o le malama nei.

²⁵ Tamana faitotonu, na leaise iloa a koe e le malama nei ; kae na kau iloa a koe, ti kua iloa e latou anei na ke kakau ia mai au.

²⁶ Ti na kau fakasa kia latou lou suafa, ti e kau toe fakasa loa a ia kia latou, o tupu ke nofo ia latou le alofa leia kua ke alofa ai kiate au, ti ke kau nofo ia latou.