Soane 16 - Tosi Tapu

Fakaveliveli olatou e alofa kia Sesu

¹ Kua kau fakasa kia koutou a nea ana, o tupu ke aua na lotou liliu loa kia koutou ko se sigaaga.

² E lotou kapu loa koutou mei sinakoka ; ti e soko mai loa le ola, ko leia e tamate ia loa koutou e tui loa a ia ko lana gaoi malie a ia ki le Atua.

³ Ti e lotou fai loa a nea ana kia koutou, talie na leaise lotou iloa le Tamana, pe ko au.

⁴ Kae kua kau fakasa a nea ana kia koutou, o tupu, ka soko mai loa le ola, ke kotou manatui na kau fakasa atu latou kia koutou. Na leaise kau fakasa atu latou kia koutou i le kamataaga, talie na kau nofo mo koutou.

Gaoi a le Laumalie Maokioki

⁵ Ko leinei e kau ano ki leia na kakau ia mai au, ti e leaise vesili mai fua se tasi o koutou : pe ke ano kifea ? "

⁶ Kae o tupu ko laku fakasa kia koutou a nea ana, kua apele okoutou loto i le mamae.

⁷ Kae e kau fakasa kia koutou le maoki : E aoga kia koutou ke kau ano, talie kapau e leaise kau ano, e leaise au loa le Fakapelepele kia koutou ; kae kapau e kau ano, e kau kakau mai loa a ia kia koutou.

⁸ Ti ka au loa a ia, e fakamalamai loa e ia le malama nei o uiga mo le agasala, mo le faitotonu, ti mo le fakamaau :

⁹ O uiga mo le agasala, talie e leaise lotou tui kiate au ;

¹⁰ o uiga mo le faitotonu, talie e kau ano ki le Tamana, ti e leaise kotou toe tio loa kiate au ;

¹¹ o uiga mo le fakamaau, talie kua fakamaaui le pule o le malama nei.

¹² Koi lasi ai a nea ala e kau fia fakasa atu kia koutou, kae e leaise mafai ke kotou amo latou i le temi nei.

¹³ Ka au loa le Fakapelepele, le Laumalie o le maoki, e taki loa e ia koutou i le maoki katoa ; talie e leaise masau loa a ia meiate ia totonu, kae e fakasa loa e ia a nea fuli ala e logo loa a ia ki ai, ti e fakasa fakatomua loa e ia kia koutou a nea ka soko mai.

¹⁴ E fakakololia loa e ia a au, talie e too loa e ia mei le nea leia a aku, o fakasa atu loa a ia kia koutou.

¹⁵ Ko nea fuli ala e maua e le Tamana a aku ; koia na kau pati ai, e too e ia mei le nea leia a aku, o fakasa atu loa a ia kia koutou.

Masau a Sesu ki lona mate, lona toe tuuake, lona toe liliu mai

¹⁶ Koi toe fua se ga temi ikiiki, ti e leaise kotou toe tio loa kiate au ; ti e toe toe se tasi ga temi ikiiki, ti e kotou toe tio loa kiate au, talie e kau ano ki le Tamana.

¹⁷ Koia na pati loa ni iki o ana tisipulo : Kolea le uiga o lana pati mai kia tatou, koi toe fua se ga temi ikiiki, ti e leaise kotou toe tio loa kiate au ; ti koi toe se tasi ga temi ikiiki, ti e kotou toe tio loa kiate au ? : talie e kau ano ki le Tamana ?

¹⁸ Ti na lotou pati loa : Kolea le uiga o lana pati : Koi toe fua se ga temi ikiiki ? E leaise motou iloa le nea leia e masau a ia ki ai.

¹⁹ Ko Sesu, i lana iloa e lotou fia fakavesilii a ia, na pati loa kia latou : E kotou fevesiliaki o uiga mo le nea leia na kau masau ki ai ! Koi toe fua se ga temi ikiiki, ti e leaise kotou toe tio loa kiate au ; ti e koi toe se tasi ga temi ikiiki, ti e kotou toe tio loa kiate au.

²⁰ E maoki, e maoki, e kau pati atu kia koutou, e kotou fetagisi loa ti e kotou lauga loa, kae e fiafia loa le malama nei : E kotou nonofo loa i le mamae, kae e fetogi loa lokoutou mamae o fiafia.

²¹ Ko le fafine, mo ka fanau, e logoi e ia le mamae, talie kua soko lona ola ; kae, ka fanaui loa e ia lona toe, e leaise toe manatui loa e ia lona mamae, i lona fiafia talie kua tupu se tagata ki le malama nei.

²² Ko koutou foki, e kotou nonofo i le aso nei i le mamae ; kae e kau toe tio loa kia koutou, ti e fiafia loa okoutou loto, ti e leaise too loa e se tasi lokoutou fiafia meia koutou.

²³ I le aso lena, e leaise kotou toe fakavesilii loa au ki se nea. E maoki, e maoki, e kau pati atu kia koutou, ko le nea leia e kotou kole loa ki le Tamana, e soli atu loa e ia a ia kia koutou i loku suafa.

²⁴ O kaku mai ki le lakaga nei, na leaise kotou kole fua se nea i loku suafa. Kotou kole, ti e kotou tali loa, o tupu ke katoa lokoutou fiafia.

²⁵ Na kau fakasa a nea ana kia koutou i ni folafola fakatata. Kae soko mai le ola leia e leaise kau toe masau atu loa kia koutou i ni folafola fakatata, kae e kau masau fakalauatea atu loa kia koutou ki le Tamana.

²⁶ I le aso lena e kotou kole loa i loku suafa, ti e leaise kau pati atu kia koutou e kau faikole loa ki le Tamana kia koutou ;

²⁷ talie e alofa le Tamana totonu kia koutou, o tupu na kotou alofa kiate au, ti na kotou tui na kau au mei le Atua.

²⁸ Na kau au mei le Tamana, ti na kau au ki le malama nei ; ko leinei e kau mavae i le malama nei, o ano ki le Tamana.

²⁹ Ti na pati loa ana tisipulo kiate ia : Tio, ko leinei kua ke masau fakalauatea, ti e leaise koi ke fakaaoga se folafola fakatata.

³⁰ I leinei kua motou iloa papau e ke iloa a nea fuli, ti e leaise aoga ke fakavesilii a koe e se tasi ; koia kua motou tui ai na ke au mei le Atua.

³¹ Na tali loa Sesu kia latou : E kotou tui i le lakaga nei.

³² Ko leinei, e au le ola, ti kua au foki a ia, leia e kotou mavetevete ai loa, kae kotou tuku loa au toka tasi ; kae e leaise kau toka tasi, talie e nofo le Tamana mo au.

³³ Kua kau fakasa a nea ana kia koutou, o tupu ke kotou maua le tokamalie iate au. E kotou maua loa ni mamae i le malama nei ; kae kotou loto makeke, kua kau malo i le malama nei.