Soane 15 - Tosi Tapu

Sesu ko le tafito vite maoki

¹ Ko au ko le tafito vite maoki, ti ko loku Tamana ko le tagata faivite.

² Ko laa fuli iate au e leaise fua, e tuuti e ia ; ti ko laa fuli e fua, e muto e ia, o tupu ke toe asilisili fua a ia o lasi ake.

³ Kua kotou mea foki, o tupu ko le folafola leia kua kau fakasa atu kia koutou.

⁴ Kotou nonofo iate au, ti e kau nofo loa ia koutou. Ofaipe le laa vite e leaise mafai ke fua iate ia totonu, mo kapau e leaise pipiki a ia ki le tafito vite, e toe tatau foki mo koutou, e leaise mafai ke kotou fua, mo kapau e leaise kotou nonofo iate au.

⁵ Ko au ko le tafito vite, ko koutou ko laa vite. Ko leia e nofo iate au, ti e kau nofo iate ia, e fua a ia o lasi, talie ka sala mo au e leaise kotou mafai se nea.

⁶ Kapau e leaise nofo se tasi iate au, e tiaki a ia ki fafo ofaipe le laa vite, ti e malo a ia ; ti e tanaki a ia o ti ki le afi, ke ulaula i ai.

⁷ Kapau e kotou nonofo iate au, ti e nofo aku folafola ia koutou, kotou kole se nea fua leia e kotou loto loa ki ai, ti e soli atu loa a ia kia koutou.

⁸ Kapau e kotou fua o lasi ai, e fakakololia loa i ai loku Tamana, ti e kotou liliu loa i ai ko aku tisipulo.

⁹ Ofaipe le alofa o le Tamana kiate au, na kau alofa foki kia koutou. Kotou nofo i loku alofa.

¹⁰ Kapau e kotou fai aku fakatotonu, ti e kotou nofo loa i loku alofa, ofaipe laku fai a fakatotonu a loku Tamana, ti mo laku nofo i lona alofa.

¹¹ Kua kau fakasa a nea ana kia koutou, o tupu ke nofo loku fiafia ia koutou, ti ke katoa lokoutou fiafia.

¹² Ko leinei laku fakatotonu : Kotou fealofani, ofaipe loku alofa kia koutou.

¹³ E leaise alofa e toe lasi ake i le soli o lona mauli o tupu ko ona kaukau nea.

¹⁴ Ko koutou ko oku kaukau nea, mo kapau e kotou fai le nea leia e kau fakatotonu atu kia koutou.

¹⁵ E leaise kau toe fakaigoa koutou ko tagata fakasausau, talie e leaise iloa e le tagata fakasausau le nea leia e fai e lona pule ; kae kua kau fakaigoa koutou ko kaukaunea, talie kua kau fakasa kia koutou a nea fuli ala kua kau ako mei loku Tamana.

¹⁶ E leaise ko koutou ala na filifili ia au ; kae ko au, kua kau filifili koutou, ti kua kau fakanofo koutou, o tupu ke kotou ano, ti ke kotou maua se fua, ti ke tologa lokoutou fua, o tupu ko nea fuli ala e kotou kole loa ki loku Tamana i loku suafa, ke soli atu e ia kia koutou.

¹⁷ Ko le nea leia e kau fakatotonu atu kia koutou : kotou fealofani.

Vesia o le malama nei kia latou e tui kia Kilisito

¹⁸ Kapau e vesia le malama nei kia koutou, kotou iloa na uluaki vesia a ia kiate au ia koutou.

¹⁹ Kanapau ko kotou a le malama nei, e alofa loa le malama nei ki lana nea. Kae tupu e leaise ko koutou a le malama nei, ti na kau filifili koutou mei loto malie o le malama nei, koia e vesia ai le malama nei kia koutou.

²⁰ Kotou manatui le folafola leia na kau fakasa atu kia koutou : E leaise lasi ake le tagata fakasausau i lona pule. Kapau na lotou fakavelivelii au, ti e lotou toe fakavelivelii foki mo koutou ; kapau na lotou fai laku folafola, ti e lotou toe fai foki lakoutou folafola.

²¹ Kae e lotou fai loa kia koutou a nea fuli ana o tupu ko loku suafa, talie e leaise lotou iloa leia na kakau ia mai au.

²² Kanapau na leaise kau au ti kanapau na leaise kau masau kia latou, na leaise lotou maua loa se agasala ; kae i le lakaga nei e leaise lotou maua fua se nea ke kofu ai lalatou agasala.

²³ Ko leia e vesia kiate au, e vesia foki a ia ki loku Tamana.

²⁴ Kanapau na leaise kau fai i lotolotoga o latou ni gaoi ala na leaise fai e se tasi, e leaise sa loa lalatou agasala ; kae ko leinei kua lotou tio kia latou, ti kua lotou vesia kiate au mo loku Tamana.

²⁵ Kae na soko le nea lena o tupu ke fakamaoki ai le folafola leia kua tuu i lalatou lao : Na lotou vesia noa kiate au.

²⁶ Ka au loa le Fakapelepele, leia e kau kakau mai loa kia koutou mei le Tamana, le Laumalie o le maoki, leia e au mei le Tamana, e fakamaoki loa a ia kiate au ;

²⁷ ti ko koutou foki, e kotou fakamaoki loa kiate au, talie na kotou nonofo mo au talu mei le kamataaga.