Soane 14 - Tosi Tapu

Fakamakeke e Sesu le kau apositolo

¹ Aua na mamae okoutou loto. Kotou tui ki le Atua, ti kotou tui foki kiate au.

² E lasi a nofoaga i le fale o loku Tamana. Kanapau e leai, kua kau fakasa atu a ia kia koutou. E kau ano o teuteui se nofoaga kia koutou.

³ Ti ka kau ano loa, ti ka kau teuteui loa se nofoaga kia koutou, e kau toe liliu mai loa, ti e kau too loa koutou mo au, o tupu ko le ganea leia e kau nofo ai e kotou nonofo ai foki.

⁴ E kotou iloa le ganea leia e kau ano ki ai, ti e kotou iloa mo le ala.

⁵ Na pati loa Tomasi kiate ia : Aliki, e leaise motou iloa pe ke ano kifea ; ti e feaki loa ke motou iloa le ala ?

⁶ Na pati loa Sesu kiate ia : Ko au ko le ala, mo le maoki, ti mo le mauli. E leaise au se tasi ki le Tamana, kae iate au.

E tasi le Tamana mo le Alo

⁷ Kapau e kotou iloa au, kua kotou iloa foki mo loku Tamana. Ti e kamata i le lakaga nei e kotou iloa a ia, ti kua kotou tio kiate ia.

⁸ Na pati loa Filipo kiate ia : Aliki, fakasa mai kia matou le Tamana, ti e motou feauga ai.

⁹ Na pati loa Sesu kiate ia : Kua fualoa ai laku nofo mo koutou, kae leaise ke iloa aifai a au, Filipo ! Ko leia kua tio kiate au kua tio a ia ki le Tamana ; e feaki e ke pati ai : Fakasa mai kia matou le Tamana ?

¹⁰ Pe leaise ke tui e kau nofo i le Tamana, ti e nofo le Tamana iate au ? Ko folafola ala e kau fakasa kia koutou, e leaise kau fakasa latou iate au totonu ; kae ko le Tamana, leia e nofo iate au, ko ia leia e fai ia a gaoi.

¹¹ Kotou tui mai kiate au, e kau nofo i le Tamana, ti e nofo le Tamana iate au ; kotou tui fua o tupu ko gaoi ana.

¹² E maoki, e maoki, e kau pati atu kia koutou, ko leia e tui kiate au, e fai foki e ia a gaoi ala e kau fai, ti e toe fai loa e ia ni gaoi lalasi ake, talie e kau ano ki le Tamana ;

¹³ ti ko nea fuli ala e kotou kole loa i loku suafa, e kau fai loa latou, o tupu ke fakakololia le Tamana i le Alo.

¹⁴ Kapau e kotou kole se nea fua i loku suafa, e kau fai loa a ia.

Fakapapau o le Laumalie Maokioki

¹⁵ Kapau e kotou alofa kiate au, kotou fai aku fakatotonu.

¹⁶ Ti ko au, e kau kole loa ki le Tamana, ti e tuku atu loa e ia kia koutou se tasi Fakapelepele, o tupu ke nofo a ia mo koutou o lee gato,

¹⁷ le Laumalie o le maoki, leia e leaise feala ke tali e le malama nei, talie e leaise tio a ia kiate ia ti e leaise iloa e ia a ia ; kae ko koutou, e kotou iloa a ia, talie e nofo a ia mo koutou, ti e nofo loa a ia ia koutou.

¹⁸ E leaise kau tuku loa koutou ke sala matua, e kau au loa kia koutou.

¹⁹ Koi toe fua se ga temi ikiiki, ti e leaise toe tio loa le malama nei kiate au ; kae ko kotou, e kotou tio loa kiate au, talie e kau mauli, ti e kotou mauli loa mo koutou foki.

²⁰ I le aso lena, e kotou iloa loa e kau nofo i loku Tamana, e kotou nofo iate au, ti e kau nofo ia koutou.

²¹ Ko leia e maua ia aku fakatotonu ti e fai ia latou, ko ia leia e alofa kiate au. Ko leia e alofa kiate au, e alofa loa loku Tamana kiate ia, ti e kau alofa loa mo au kiate ia, ti e kau fakasa loa au kiate ia.

²² Ko Suta, leia e leaise ko le Isekaliote, na pati loa kiate ia : Aliki, kolea e ke fakasa ai loa a koe kia matou, kae leai ki le malama nei ?

²³ Na tali loa Sesu kiate ia : Kapau e alofa se tasi kiate au, ti e fai loa e ia laku folafola, ti e alofa loa loku Tamana kiate ia ; e ma au loa kiate ia, ti e ma fai loa loma nofoaga iate ia.

²⁴ Ko leia e leaise alofa kiate au e leaise fai e ia aku folafola. Ti ko folafola ala e kotou logo ki ai e leaise ko folafola a ia a aku, kae a le Tamana leia na kakau ia mai au.

²⁵ Na kau fakasa kia koutou a nea ana koi kau nofo mo koutou.

²⁶ Kae ko le Fakapelepele, le Laumalie Maokioki, leia e kakau mai loa e loku Tamana i loku suafa, e ako ia loa kia koutou a nea fuli, ti mo fakamanatu atu loa kia koutou a nea fuli ala kua kau fakasa atu kia koutou.

E soli e Kilisito le tokamalie

²⁷ E kau tuku kia koutou le tokamalie, e kau soli kia koutou loku tokamalie. E leaise kau soli a ia kia koutou ofaipe le soli e le malama nei. Aua na mamae okoutou loto, ti mo i.

²⁸ Kua kotou logo na kau pati kia koutou : E kau ano ti e kau toe liliu mai kia koutou. Kapau e kotou alofa kiate au, e kotou fiafia loa i laku ano ki le Tamana ; talie e lasi ake le Tamana iate au.

²⁹ E kau fakasa kia koutou a nea ana i le lakaga nei, kae e leikiaise lotou soko mai, o tupu mo ka lotou soko mai loa, ke kotou tui.

³⁰ E leaise kau toe masau lasi loa mo koutou ; talie e au le pule o le malama nei. E leaise maua e ia sana nea fua e tasi iate au.

³¹ Kae o tupu ke iloa e le malama nei e kau alofa ki le Tamana, ti e kau fai o mulimuli ki le fakatotonu a le Tamana kiate au, kotou tutuu ki aluga, ke tou mavae i leinei.