Soane 12 - Tosi Tapu

Takai e Malia a vae o Sesu i Petania

¹ Koi toe ni aso e ono ki le Pasikate, na ano loa Sesu ki Petania, ki le ganea leia na nofo ai Lasalo, leia na toe fakatuuake e ia mei le kau mate.

² I lena, na teuteui loa se kai kiate ia ; na selevisi Maleta, ti ko Lasalo ko se tasi o latou ala na nonofo i le laupapa kai mo ia.

³ Na too loa e Malia se kaloni ko le nale maoki, ko se vaeluai liti, ti ko se koloa lasi, o takai ai a vae o Sesu, ti na solosolo e ia laua ki lona lauulu ; ti na apele loa le fale i le manogi o le kaloni.

⁴ Ko se tasi o ana tisipulo, ko Sutasi Isekaliote, leia na tonu ke fakatau ia a ia, na pati loa :

⁵ Kolea na leaise fakatau ai le kaloni lena ki ni fa tenalio e kau lelau tolu, ke soli latou ki le kau mativa ?

⁶ Na pati a ia ki le nea lena, o leaise tupu na mamae a ia ki le kau mativa, kae tupu ko se tagata kaia a ia, ti e i lana taupau le kisi paaga, na tau too e ia le nea leia na tuku ki ai.

⁷ Kae na pati loa Sesu : Tuku a ia ke taupau ia le kaloni lena ki loku aso tanu.

⁸ E kotou maua tuumau le kau mativa mo koutou, kae e leaise kotou maua tuumau au.

⁹ Na iloa loa e se toka api o le kau Sutea kua nofo Sesu i Petania, ti na lotou au loa ki ai, o leaise tupu fua ko Sesu, kae o tupu ke lotou tio kia Lasalo leia na fakatuuake e ia mei le kau mate.

¹⁰ Na fono loa le kau pule faisakilifisio ke tamate foki mo Lasalo,

¹¹ talie kua mavae se kau Sutea toka api meia latou o tupu ko ia, o tui kia Sesu.

Ulu a Sesu ki Selusalemi

¹² I leia ake a aso, na logo loa se kakai toka api leia na au ki le aso lasi kua pale ake Sesu ki Selusalemi ;

¹³ ti na lotou too loa ni laai laakau, o ano o fakafelavei kiate ia, mo kalaga : Osana ! E manuia leia e saele mai i le suafa o le Aliki, le sau o Iselaele.

¹⁴ Na maua loa e Sesu se uviki asino ti na eke loa a ia ki ai, o mulimuli ki le nea leia kua tosi :

¹⁵ Aua na ke i, taine o Sione ; Ko leinei, e au lou sau, Eeke a ia i le uviki asino.

¹⁶ Na leaise matala loa ana tisipulo ki le nea lena i le temi lena ; kae i le oki o le fakakololia o Sesu, na lotou manatui loa na tosi a nea ana kiate ia, ti na fakasoko latou kiate ia.

¹⁷ Ti na fakamaoki kiate ia latou fuli ala na nonofo mo Sesu, i lana kalagai Lasalo mei le tanuma mo lana fakatuuake a ia mei le kau mate ;

¹⁸ ti na au loa le kakai ki ona mua, talie na logo a ia ki le milakulo lena na fai e ia.

¹⁹ Na pati loa le kau faliseo : E kotou tio e leaise kotou mafai se nea ; ko leinei, kua muli le kakai katoa iate ia.

Ko ni Keleka na fia tio kia Sesu.

²⁰ Ko ni Keleka, ia latou ala na pale ki Selusalemi o atolasio i le aso lasi,

²¹ na ano loa kia Filipo, mei Petesaita i Kalilea, o kole kiate ia : Aliki, e motou fia tio kia Sesu.

²² Na ano loa Filipo o fakasa le nea lena kia Atelea, ti na fakasa loa a ia e Atelea mo Filipo kia Sesu.

²³ Na tali loa Sesu kia laua : Kua soko mai le aso leia e tonu ke fakakololia ai le Vosa o le tagata.

²⁴ E maoki, e maoki, e kau pati atu kia koutou, kapau e leaise vilo le fuai fulumeto ki le kele o pala, e nofo toka tasi a ia ; kae kapau e pala a ia, e fua a ia o lasi ai.

²⁵ Ko leia e alofa ki lona mauli e pulinoa loa, kae ko leia e vesia ki lona mauli i le malama nei e taupau ia loa a ia ki le mauli lee gato.

²⁶ Kapau e tausi se tasi kiate au, ke muli mai a ia iate au ; ti ko le ganea leia e kau nofo ai, e toe nofo ai foki laku tagata fakasausau. Kapau e tausi se tasi kiate au, e fakakololia loa a ia e le Tamana.

²⁷ I le lakaga nei kua mamae loku laumalie. Ti kolea e kau pati loa ki ai ? Tamana, saofaki au mei le ola leinei ?… Kae na kau au o tupu ko le ola lena o kaku mai ki le aso nei !

²⁸ Tamana, fakakololia lou suafa ! Ti na au loa se leo mei le lagi : Kua kau fakakololia a ia, ti e kau toe fakakololia loa a ia.

²⁹ Ko le kakai leia na nofo i ai ti na logo ki le leo na pati ko se mana leia na gugulu. Na pati a iki ko se aselo leia na masau kiate ia.

³⁰ Na pati loa Sesu : E leaise sa le leo lena o tupu ko au ; kae o tupu ko koutou.

³¹ Ko leinei le ola leia e fakamaaui ai le malama nei ; ko leinei le ola leia e ti ai loa le pule o le malama nei ki fafo.

³² Ti ko au, ka siki ake loa au ki aluga mei le kele, e kau fakatatae mai loa kiate au a tagata fuli.

³³ I lana masau lena, na fakasa e ia le mate leia e tonu ke mate ai.

³⁴ Na tali loa le kakai kiate ia : Kua motou ako i le lao e nofo le Kilisito o lee gato ; e feaki loa lau pati : E tonu ke siki ake ki aluga le Vosa o le tagata mei le kele ? Ko ai le Vosa o le tagata lena ?

³⁵ Na pati loa Sesu kia latou : Koi nofo fua le malama i se ga temi ikiiki ia koutou. Kotou saele koi kotou maua le malama, talie ke aua na maua koutou e le fakapouli : ko leia e saele i le fakapouli e leaise iloa e ia pe ano a ia kifea.

³⁶ Kotou tui ki le malama koi kotou maua a ia, o tupu ke kotou liliu ko ni fanau o le malama. Na fakasa loa e Sesu a nea ana, ti na ano loa a ia, o mumuni mamao meia latou.

Loto fefeka o le kakai

³⁷ Logo ai le lasi o milakulo ala na fai e Sesu i mua o latou, na leaise lotou tui aifai kiate ia ;

³⁸ o tupu ke fakasoko le folafola leia na fakasa e le polofeta ko Esaia : Aliki, Ko ai na tui ki lamatou akonaki ? Ti ko ai na fakasa ki ai le lima o le Aliki ?

³⁹ Ti na leaise mafai ke lotou tui, talie na toe pati Esaia :

⁴⁰ Kua fakakivi e ia olatou mata ; Ti kua fakafefeka e ia olatou loto, Ke aua na lotou tio ki olatou mata, Ke aua na lotou matala i olatou loto, Ti ke aua na lotou tafoki, ti ke aua na kau fakamauli latou.

⁴¹ Na pati loa Esaia ki nea ana, i lana tio ki lona kololia, ti mo lana masau kiate ia.

⁴² Kae na tui loa kiate ia se toka api i le kau pule foki ; kae o tupu ko le kau faliseo, na leaise lotou fakasa a ia, talie na kapu latou mei le sinakoka.

⁴³ Talie na lasi ake lalatou fia fai ki le kololia o le tagata i le kololia o le Atua.

⁴⁴ Ti na kalaga Sesu : Ko leia e tui kiate au, e leaise tui a ia kiate au, kae tui a ia ki leia na kakau ia mai au ;

⁴⁵ Ti ko leia e tio kiate au, e tio a ia ki leia na kakau ia mai au.

⁴⁶ Na kau au ofaipe se malama ki le malama nei, o tupu ke aua na nofo i le fakapouli leia e tui mai kiate au.

⁴⁷ Kapau e logo se tasi ki aku folafola, kae e leaise taupau e ia latou, e leaise ko au leia e fakamaaui ia a ia ; talie na leaise kau au o fakamaaui le malama nei, kae o fakamauli le malama nei.

⁴⁸ Ko leia e tiaki ia au ti e leaise tali ia aku folafola e maua e ia lona tui fakamaau ; ko le folafola leia na kau fakasa, ko ia leia e fakamaaui ia loa a ia i le aso fakamuli.

⁴⁹ Talie na leaise kau masau iate au totonu ; kae ko le Tamana, leia na kakau ia mai au, na fakatotonu mai kiate au le nea leia e tonu ke kau fakasa, ti mo le nea leia e tonu ke kau akonaki ki ai.

⁵⁰ Ti e kau iloa ko lana fakatotonu ko le mauli lee gato. Koia ko le nea leia e kau masau ki ai, e kau fakasa a ia ofaipe lona fakasa mai e le Tamana kiate au.