Soane 11 - Tosi Tapu

Fakamauli o Lasalo

¹ Na i ai se tagata masaki, ko Lasalo, mei Petania, kolo o Malia mo Maleta, lona taina.

² Ko le Malia lena na takai ia ki le kaloni le Aliki mo solo ia ona vae ki lona lauulu, ti ko lona tuagaane ko Lasalo leia na masaki.

³ Na kakau loa e le tautaina ke pati kia Sesu : Aliki, tio, ko leia e ke alofa ki ai e masaki.

⁴ I lana logo ki le nea lena, na pati loa Sesu : E leaise sikuga le masaki lena ki le mate, kae ki le kololia o le Atua, o tupu ke fakasa ai le kololia o le Alo o le Atua.

⁵ Kae na alofa Sesu kia Maleta, mo lona taina, ti mo Lasalo.

⁶ I lana logo ki le masaki o Lasalo, na toe nofo loa a ia i aso e lua i le ganea leia na nofo ai.

⁷ Sili aia, ti na pati loa a ia ki le kau tisipulo : Tou toe liliu ki Sutea !

⁸ Na pati loa le kau tisipulo kiate ia : Pule, na leikiaise fualoa le afa e le kau Sutea ke tuki fatui a koe, ti e ke toe liliu ki Sutea !

⁹ Na tali loa Sesu : Pe leaise ko ni ola e kau agafulu tupu lua i le aso ? Kapau e saele se tasi i le ao, e leaise tukia a ia, talie e tio a ia ki le malama o le malama nei ;

¹⁰ kae kapau e saele se tasi i le pouli, e tukia a ia, talie e leaise se malama iate ia.

¹¹ I le oki o folafola ana, na pati loa a ia kia latou : Ko lotatou kaukau nea ko Lasalo e moe ; kae kau ano nei o fafagu a ia.

¹² Na pati loa le kau tisipulo kiate ia : Aliki, kapau e moe a ia, e malie loa a ia.

¹³ Na masau Sesu ki lona mate, kae na lotou manatu e masau a ia ki le malolo o le moe.

¹⁴ Ti na pati fakatotonu loa Sesu kia latou : Kua mate Lasalo.

¹⁵ Ti e kau fiafia na leaise kau nofo i ai, o tupu ko koutou, talie ke kotou tui ai. Kae tou ano kiate ia.

¹⁶ I le nea lena ko Tomasi, leia na igoa ko le Ata, na pati loa ki la ake tisipulo : Tou ano foki, o tupu ke tou mamate mo ia.

¹⁷ I lana kaku ki ai, na maua loa e Sesu kua aso fa le tuku o Lasalo i le tanuma.

¹⁸ Kae na mamao Petania mei Selusalemi i ni kilometa e tolu,

¹⁹ ti na au se kau Sutea toka api kia Maleta mo Malia, o fakapelepelei laua i le mate o lola tuagaane.

²⁰ I le logo a Maleta kua kaku mai Sesu, na ano loa a ia ki ona mua, kae na tonatona fai Malia i le fale.

²¹ Na pati loa Maleta kia Sesu : Aliki kanapau na ke nofo i leinei, na leaise mate loku tuagaane.

²² Kae e kau iloa foki ko nea fuli ala e ke kole nei ki le Atua, e soli fuli atu loa e ia kiate koe.

²³ Na pati loa Sesu kiate ia : E toe tuuake loa lou tuagaane.

²⁴ Na tali loa Maleta kiate ia : E kau iloa e toe tuuake loa a ia i le toe tuuake, i le aso fakamuli.

²⁵ Na pati loa Sesu kiate ia : Ko au ko le toe tuuake mo le mauli. Ko leia e tui kiate au e mauli loa a ia, tatau aifai pe mate a ia ;

²⁶ ti ko leia e mauli mo tui kiate au e leaise toe mate loa a ia. Pe ke tui ki ai ?

²⁷ Na pati loa a ia kiate ia : Io, Aliki, e kau tui ko le Kilisito a koe, ko le Alo o le Atua, leia na tonu ke au ki le malama nei.

²⁸ I le oki o lana masau lena, na ano loa Maleta. Ti na kalagai fakafufu loa e ia Malia, lona taina, o pati kiate ia : Kua nofo le Pule i leinei, ti e fakaala mai e ia a koe.

²⁹ I le logo a Malia ki le nea lena, na tuu fakatavili loa a ia ki aluga, o ano kiate ia.

³⁰ Talie na leikiaise ulu Sesu ki le kolo, kae koi nofo a ia i le ganea leia na felavei ai a ia mo Maleta.

³¹ I le tio a le kau Sutea, ala na nonofo mo Malia i le fale o fakapelepelei a ia, ki le tuu fakatavili a Malia o ulu ki fafo, na lotou muli loa iate ia, o pati : E ano a ia ki le tanuma, o tagi i ai.

³² I le kaku a Malia ki le ganea leia na nofo ai Sesu o tio kiate ia, na fakamapee loa a ia ki ona vae, o pati kiate ia : Aliki, kanapau na ke nofo i leinei, na leaise mate loku tuagaane.

³³ I le tio a Sesu ki le tagi a Malia mo le kau Sutea leia na au mo ia, na mamae a ia i lona laumalie, o aloalofa kia latou.

³⁴ Ti na pati loa a ia : Na kotou tuku a ia kifea ? Na lotou tali loa kiate ia : Aliki, au o tio.

³⁵ Na tagi loa Sesu.

³⁶ I le nea lena, na pati loa le kau Sutea : Kotou tio ki le lasi ai o lona alofa kiate ia !

³⁷ Ti na pati loa ni iki o latou : Ko leia na fakamavaa ia a mata o le kivi, pe na leaise mafai foki e ia ke aua na mate le tagata lena ?

³⁸ Na toe tukumanava loa Sesu i lona loto, ti na ano loa a ia ki le tanuma. Ko se ana a ia, ti na tapono a ia ki se fatu.

³⁹ Na pati loa Sesu : Kotou too le fatu. Na pati loa Maleta, le tuagaane o le mate, kiate ia : Aliki kua sauga a ia, talie kua aso fa lona tuku i ai.

⁴⁰ Na pati loa Sesu kiate ia : Pe na leaise kau pati atu kiate koe, kapau e ke tui, ti e ke tio loa ki le kololia o le Atua ?

⁴¹ Na lotou too loa le fatu. Ti na siki loa e Sesu ona mata ki aluga, o pati : Tamana, e kau fakafetai kiate koe, talie kua ke tali au.

⁴² Kiate au, e kau iloa e ke tali tuumau au ; kae e kau masau o tupu ko le kakai leinei e takatakai ia au, talie ke lotou tui ko koe leia na kakau ia mai au.

⁴³ I le oki o lana pati lena, na kalaga loa a ia o leo lasi : Lasalo, au ki fafo !

⁴⁴ Ti na au loa le mate ki fafo, kua saisai ona vae mo ona lima ki ni kie, ti kua takatakai ona mata ki se tupenu. Na pati loa Sesu kia latou : Kotou veteki ona sai, ti kotou tuku a ia ke ano.

Fono ke tamate Sesu

⁴⁵ Na toka api ai le kau Sutea leia na au kia Malia, i lalatou tio ki le nea leia na fai e Sesu, na tui loa kiate ia.

⁴⁶ Kae na ano loa ni iki o latou o afa le kau faliseo, o fakasa kia latou le nea leia na fai e Sesu.

⁴⁷ Na tanaki loa e le kau pule faisakilifisio mo le kau faliseo le fono lasi, o pati : Kolea ka tou fai loa ? Talie e fai e le tagata lena ni milakulo.

⁴⁸ Kapau e tou tuku a ia ke fai, e tui loa a tagata fuli kiate ia, ti e au loa le kau Loma o maumaui lotatou kolo mo lotatou puleaga.

⁴⁹ Ko se tasi o latou, ko Kaifa, ko le pule faisakilifisio a ia i le fetuu lena, na pati loa kia latou : E leaise kotou matala fua ki se nea.

⁵⁰ Kotou fakakaukau : e malie ake kia koutou ke mate se tagata e toka tasi ki le kakai, kae ke aua na maumaui le puleaga katoa.

⁵¹ Na leaise pati a ia ki le nea lena iate ia totonu, kae i lona uiga ko le pule faisakilifisio a ia i le fetuu lena, na kikite loa a ia e tonu ke mate Sesu ki le puleaga.

⁵² Ti e leaise gato fua ki le puleaga ; kae ke fakatasii ai foki a fanau a le Atua kua mavetevete.

⁵³ Talu mei le aso lena, na lotou tonu tasi loa ke tamate a ia.

⁵⁴ Koia na leaise toe sa fakalauatea ai loa Sesu i le kau Sutea ; kae na ano loa a ia ki le fenua ofi ki le toafa, ki se kolo na igoa ko Efalaimi ; ti na nofo a ia i ai mo ana tisipulo.

⁵⁵ Kua ofi le Pasikate o le kau Sutea. Ti na pale loa se kakai toka api o le fenua ki Selusalemi i mua o le Pasikate, ke fakamea latou.

⁵⁶ Na lotou afa Sesu, ti na lotou pati i le fale tapu : Kolea lakoutou manatu ? Pe au loa a ia ki le aso lasi pe leai ?

⁵⁷ Talie kua fai e le kau pule faisakilifisio mo le kau faliseo se fakatotonu, kapau e iloa e se tasi le ganea leia e nofo ai a ia, ti ke fakasa e ia, o tupu ke too a ia.