Soane 1 - Tosi Tapu

E Atua Sesu Kilisito, le Folafola

¹ I le kamataaga na agai le folafola, ti na agai le folafola mo le Atua, ti na Atua le folafola.

² Na agai a ia i le kamataaga mo le Atua.

³ Na fai e ia a nea fuli, ti na leaise nea i nea fuli ala na fai na leaise fai sala mo ia.

⁴ Na iate ia le mauli, ti ko le mauli ko le malama a ia o tagata.

⁵ Na ula le malama i le fakapouli, kae na leaise tali a ia e le fakapouli.

⁶ Na i ai loa se tagata na kakau mei le Atua : Ko lona igoa ko Soane.

⁷ Na au loa a ia ko se tagata fakamaoki, ke fakamaoki ki le malama, o tupu ke tui a tagata fuli kiate ia.

⁸ Na leaise ko ia leia ko le malama, kae na sa loa a ia ke fakamaoki ki le malama.

⁹ Ko le malama lena ko le malama maoki, leia na au ki le malama nei, ke fakamalama ia a tagata fuli.

¹⁰ Na nofo a ia i le malama nei, ti na fakatupu e ia le malama nei, kae na leaise iloa fua a ia e le malama nei.

¹¹ Na au a ia ki lona kakai, kae na leaise tali a ia e lona kakai.

¹² Kae kia latou fuli ala na tali ia a ia, kia latou ala e tui ki lona suafa, na soli e ia le pule ke liliu ko fanau a le Atua, ala kua tupu,

¹³ o leia i le toto, pe i le finegalo o le kanofi, pe i le finegalo o le tagata, kae i le Atua.

¹⁴ Ti na tupu tagata le folafola, ti na nofo a ia ia tatou, o apele i le kalasia mo le maoki ; ti na motou tio ki lona kololia, ko se kololia ofaipe le kololia o le Alo fuatasi na au mei le Tamana.

Fakamaoki a Soane-Patita kia Sesu

¹⁵ Na fakamaoki Soane kiate ia, o kalaga : Ko leinei leia na kau pati atu ki ai : Ko leia e muli mai iate au e lasi ake iate au, talie na mua a ia iate au.

¹⁶ Ti kua tou tali fuli mei lona apele katoa le kalasia ki le kalasia ;

¹⁷ talie na soli mai le lao e Moisese, kae na au le kalasia mo le maoki ia Sesu-Kilisito.

¹⁸ Na leikiaise tio se tasi i se aso ki le Atua ; ko le Atua le Alo fuatasi, leia e nofo i le fatafata o le Tamana, ko ia leia na fakasa ia a ia.

¹⁹ Ko leinei le fakamaoki a Soane, i le kakau mai e le kau Sutea mei Selusalemi ni tagata faisakilifisio mo ni levita, ke vesili kiate ia : Aloa, ko ai a koe ?

²⁰ Na fakasa loa e ia, o leaise toe fakafufu, ti na fakamaoki loa a ia e leaise ko Kilisito a ia.

²¹ Ti na lotou vesili loa kiate ia : Kolea koia ? pe ko Elia a koe ? Ti na pati loa a ia : E leaise ko Elia au. Pe ko le polofeta a koe ? Ti na tali loa a ia : Leai.

²² Na lotou pati loa kiate ia : Ko ai a koe ? o tupu ke motou tuku se tali kia latou ala na kakau ia mai matou ; kolea lau pati kiate koe totonu ?

²³ Na pati loa Soane : Ko au ko le leo o leia e kalaga i le toafa : Kotou fakatokatoka le ala o le Aliki, Ofaipe le pati a le polofeta ko Esaia.

²⁴ Ko latou ala na kakau ko ni tagata faliseo.

²⁵ Na lotou toe fai foki kiate ia le vesili leinei : Kolea loa leia e ke fai papitema ai, mo kapau e leaise ko le Kilisito a koe, pe ko Elia, pe ko le polofeta ?

²⁶ Na tali loa Soane kia latou : Ko au, e kau fai papitema ki le vai, kae i lotomalie o koutou e i ai se tasi leia e leaise kotou iloa, leia e au i oku muli,

²⁷ kae lasi ake a ia iate au, ti e leaise kau gali fua i le tatala o nonoa o ona taka.

²⁸ Na soko a nea ana i Petania, i leia atu kauvai o le Solotane, leia na fai papitema ai Soane.

²⁹ I leia ake a aso, na tio loa Soane kia Sesu e au kiate ia, ti na pati loa a ia : Ko leinei le Akeno o le Atua, leia e fakamolemole ia le agasala o le malama nei.

³⁰ Ko ia leia na kau pati atu ki ai : E au se tagata i oku muli leia e lasi ake iate au, talie na mua a ia iate au.

³¹ Na leaise kau iloa a ia, kae o tupu ke fakasa a ia ki Iselaele, koia na kau au ai o fai papitema ki le vai.

³² Na fai loa e Soane le fakamaoki leinei : Na kau tio ki le Laumalie Maokioki e ifo mei lagi ofaipe se lupe, o tuu iate ia.

³³ Na leaise kau iloa a ia, kae ko leia na kakau ia mai au ke fai papitema ki le vai, na pati mai kiate au : Ko leia e ke tio loa e ifo ki ai le Laumalie Maokioki, o tuu iate ia, ko ia leia e fai papitema ki le Laumalie Maokioki.

³⁴ Ti na kau tio, ti na kau fakamaoki ko le Alo a ia o le Atua.

Uluaki tisipulo a Sesu

³⁵ I leia ake a aso, na koi nofo Soane i le ganea lena mo se toka lua o ana tisipulo ;

³⁶ Ti i lana tio kia Sesu e fakalaka, na pati loa a ia : Ko leia le Akeno o le Atua.

³⁷ Na logo loa le sa tisipulo ki lana pati, ti na la muli loa ia Sesu.

³⁸ Na mafuli loa Sesu, o tio e la muli iate ia, ti na pati loa a ia kia laua : Kolea e kolua afa ? Na la tali loa : Pule e ke nofo ifea ?

³⁹ Na pati loa Sesu kia laua : Kolua au, o tio. Na la ano loa, ti na la tio loa i le ganea leia na nofo ai a ia ; ti na la nonofo loa mo ia i le aso lena. Ko le ola fa ia o le sili lalatea.

⁴⁰ Ko Atelea, taina o Simone Petelo, ko se tasi o laua ala na logo ki masau a Soane, ti na muli ia Sesu.

⁴¹ Ko ia foki leia na uluaki felavei mo lona taina ko Simone, ti na pati loa kiate ia : Kua ma maua le Mesia (ko lona uiga, ko le Kilisito).

⁴² Ti na taki loa e ia a ia kia Sesu. I le tio a Sesu kiate ia, na pati loa a ia : Ko koe ko Simone, vosa o Sonasi, e fakaigoa loa a koe ko Kefasi (ko lona uiga ko Petelo, fa fatu).

⁴³ I leia ake a aso, na loto loa Sesu ke ano ki Kalilea, ti na felavei loa a ia mo Filipo. Ti na pati loa a ia kiate ia : Muli mai iate au.

⁴⁴ Na au Filipo mei Petesaita, mei le kolo o Atelea mo Petelo.

⁴⁵ Na felavei loa Filipo mo Natanaele, ti na pati loa a ia kiate ia : Kua motou maua leia na tosi ki ai Moisese mo le kau polofeta, ko Sesu mei Nasaleti, vosa o Sosefo.

⁴⁶ Na pati loa Natanaele kia Filipo : Pe feala ke au se nea malie mei Nasaleti ? Na tali loa Filipo kiate ia : Au, o tio.

⁴⁷ I le tio a Sesu kia Natanaele e au kiate ia, na pati loa a ia kiate ia : Ko leinei se Iselaele maoki, leia e leaise maua fua i ai se fai kaka.

⁴⁸ Na tali loa Natanaele kiate ia : E ke iloa au meifea ? Na tali loa Sesu kiate ia : I mua o lou kalagai e Filipo, kae koi ke nofo i lalo o le fiki, na kau tio kiate koe.

⁴⁹ Na tali loa Natanaele, o toe pati : Pule, ko koe ai ko le Alo o le Atua, ko le Sau o Iselaele.

⁵⁰ Na tali loa Sesu kiate ia : E ke tui, o tupu na kau pati atu kiate koe na kau tio kiate koe i lalo o le fiki ; e ke tio loa ki ni nea lalasi ake i nea anei.

⁵¹ Na pati loa Sesu kiate ia : E maoki, e maoki, e kotou tio loa ki le lagi kua mavaa, ti mo le kau aselo a le Atua e pale mo ifo i aluga o le Vosa o le tagata.