Senesi 9 - Tosi Tapu

Noe mo ona vosa

¹ Na tapuaki loa le Atua kia Noe mo ona vosa, o pati kia latou : Kotou fanaunau, mo kotou liuliuga, ti mo kotou fakaapele le kele.

² E i loa a manu fuli o le kele kia koutou, a manu lele fuli o le lagi, mo nea fuli ala e taka i aluga o le kele, ti mo ika fuli o le tai : kua tuku fuli atu latou ki okoutou lima.

³ E tuku atu loa kia koutou a nea fuli ala e taugaoi mo mauli ke kotou kai : e kau tuku atu kia koutou a nea fuli ana ofaipe laku tuku atu kia koutou le mutie sesega.

⁴ Kae ke aua fua na kotou kai loa se kanoi manu mo lona laumalie, mo lona toto.

⁵ Ke kotou iloa foki, e kau toe afa loa le toto o okoutou laumalie, e kau toe afa loa a ia ki manu fuli ; ti e kau toe afa loa le laumalie o le tagata ki le tagata, ki le tagata leia ko lona taina.

⁶ Kapau e liligi e se tasi le toto o se tagata, ti e toe liligi loa e le tagata lona toto ; talie kua fakatupu e le Atua le tagata o fakatatau kiate ia.

⁷ Ti ko koutou, ke kotou fanaunau, mo kotou liuliuga, mo kotou mafola i aluga o le kele, ti mo kotou fakakakai a ia.

⁸ Na toe masau loa le Atua kia Noe mo ona vosa, o pati :

⁹ Ko leinei, e kau fai laku fakapapau kia koutou mo lokoutou sakoga i okoutou muli,

¹⁰ ti mo nea fuli ala e mauuli i okoutou tafa : tatau a manu lele, mo manu lalata, mo manu fuli o le vao, mo manu fuli ala na mavae mei le aleka, ti mo manu fuli ala e mauli loa ki muli i aluga o le kele.

¹¹ E kau fai laku fakapapau kia koutou : E leaise toe tamate loa e le vai o le lomaki a kanofi fuli i se aso, ti e leaise toe to loa se lomaki o maumaui le malama nei.

¹² Ti na pati loa le Atua : Ko leinei le fakamailoga o le fakapapau leia e kau fai kia koutou, mo nea fuli ala e mauli mo koutou, mei tautupu ki tautupu :

¹³ Kua kau fakatuu laku nuanua i le ao, ke tuu ko se fakamailoga o le sai leia kua kau fai mo le kele.

¹⁴ I le aso leia e kau tanaki ai loa ni ao i aluga o le kele, e sa loa le nuanua i le ao,

¹⁵ Ti e kau manatui loa laku sai leia kua kau fai mo koutou mo faasiga manu kesekese fuli, ti e leaise toe liliu loa le ua ko se lomaki o maumaui ia a kanofi fuli.

¹⁶ E tuu loa le nuanua i le ao, ti e kau tio loa ki ai, ti e kau toe manatui loa le sai lee gato leia kua fai e le Atua ki nea fuli e mauli, mo nea fuli e kanofi ala e mauli i aluga o le kele.

¹⁷ Ti na pati loa le Atua kia Noe : Ko lena le fakamailoga o le sai leia kua kau fai kiate koe mo nea fuli e kanofi ala e mauli i aluga o le kele.

¹⁸ Ko vosa o Noe, ala na mavae mei le aleka : ko Semi, mo Kami, mo Safeti. Na liliu loa a Kami ko le tamana o Kanaane.

¹⁹ Ko vosa ana e tolu o Noe, ti ko lolatou sakoga leia na fakakakai ia loa le malama nei katoa.

²⁰ Na kamata gaoi loa a Noe ki le kele, ti na to loa e ia se vite.

²¹ Na inu loa e ia se vino, ti na kona loa a ia : ti na nofo telefua loa a ia i lona falela.

²² Ko Kami, tamana o Kanaane, na tio loa ki le telefua o lona tamana, ti na fakasa loa e ia le nea lena ki ona fetaina e toka lua ala na nonofo i fafo.

²³ Koia na too ai loa e Semi mo Safeti se taupulupulu o teki ki ola tuauma, ti na la saele fakasolomuli loa ki loto o le falela, o uufi le telefua o lola tamana. Na tio kese ola mata ke aua na la tio ki le telefua o lola tamana.

²⁴ I le ofo ake a Noe i lona kona, na logo loa a ia ki le nea leia na fai kiate ia e le lua o ona vosa.

²⁵ Ti na pati loa a ia : Ke Malaia a Kanaane ! Ke liliu a ia ko le nea fakasausau a tagata fakasausau o ona fetaina.

²⁶ Na toe pati foki a ia : Ke manuia le Eteleno, ko le Atua o Semi ! Ti ke fakasausau a Kanaane kia Semi !

²⁷ Ke fakalasi e le Atua a koloa o Safeti, ti ke agai a ia i falela o Semi, ti ke fakasausau a Kanaane kia Safeti !

²⁸ Na mauli loa a Noe, i le oki o le lomaki, i fetuu e kau lelau tolu kau lima.

²⁹ Ko aso fuli o Noe ko fetuu e kau lelau iva kau lima ; ti na mate loa a ia