Senesi 6 - Tosi Tapu

Agaveli o le tagata

¹ Na soko loa ki se temi, kua fakaano ke toka api ai a tagata i le malama nei, ti na tupu loa ni taineliki kia latou,

² ti na tio loa a vosa o le Atua na fulumalilie ai a taineliki o tagata, ti na lotou filifili loa ni iki o latou ko alatou avaga.

³ Koia na pati ai loa le Atua : E leaise toe nofo tuumau loa loku Laumalie i le tagata, talie ko se kanofi fuai le tagata, ti ko le lasi loa o ona aso ko le kau lelau kau lua fetuu.

⁴ I le temi lena, na tagata lalasi ai le malama nei. Ti na toe felaaki i le oki o le ano o vosa o le Atua ki taineliki o tagata, ti na tupu loa mei ai ni fanau : ko latou ana na logologona i le temi mua.

⁵ Na tio loa le Eteleno kua lasi le agaveli o le tagata i malama nei, ti kua ano fuai a manatu fuli o lona loto i aso fuli ki le nea leia e veli.

⁶ Ti na fakasemala loa le Eteleno i lana fakatupu le tagata i le malama nei, ti na mamae ai lona loto.

⁷ Ti na pati loa le Eteleno : E kau fakapuli loa i aluga o le malama nei le tagata leia na kau fakatupu, mei le tagata o kaku ki manu lalasi, mo manu liliki, ti mo manu lele o le lagi ; talie kua kau fakasemala i laku fakatupu ia latou.

Fau o le aleka

⁸ Kae na tio loa le Eteleno kia Noe ti na alofa loa a ia kiate ia.

⁹ Ko leinei le sakoga o Noe. Ko Noe ko se tagata agatonu mo maokioki a ia i lona tautupu. Na saele a Noe mo le Atua.

¹⁰ Na fakatupu loa e Noe ni vosa e toka tolu : ko Semi, mo Kami, mo Safeti.

¹¹ Na fakalialia le malama nei i mua o le Atua, ti na apele le malama nei i le agamakeke.

¹² Na tio loa le Atua ki le malama nei, ti ko leinei, kua veli ai a ia ; talie kua fakalialia a ala o tagata fuli i le malama nei.

¹³ Koia na pati ai loa le Atua kia Noe : Kua kau fakapapau ke fakagato a tagata fuli ; talie kua lotou fakaapele ia le kele ki le agamakeke ; e kau maumaui loa a tagata mo le kele.

¹⁴ Fau kiate koe se aleka ki le laakau ko le kofele ; e ke fau loa le aleka lena o vaevae kogafale, ti e ke pena loa a ia ki se pulu kula i loto mo tafa.

¹⁵ E ke fau feneeki loa a ia : Ko le loa o le aleka ko meta e kau lelau kau lima, ti ko lona lau lasi ko meta e kau lua tupu lima, ti ko lona taualuga ko meta e kau agafulu tupu lima.

¹⁶ E ke fau loa i le aleka se katupa e tasi i le ato leia e kau lima satimeta lona malaga ki aluga ; e ke fau loa se matapa e tasi i le fetuu o le aleka ; ti e ke fau loa se lau fata lalo, mo se lau fata loto, ti mo se lau fata aluga.

¹⁷ Ti ko au, e kau kakau mai loa le lomaki ke to ki le kele, o maumaui a nea fuli ala e mauli i lalo o le lagi ; ti e mamate loa a nea fuli ala e mauli i aluga o le kele.

¹⁸ Kae ko au, e kau fai loa laku sai mo koe ; e ke ulu loa ki le aleka, a koe mo ou vosa, mo lau avaga ti mo avaga o ou vosa.

¹⁹ E ke toe fakaulu loa ki le aleka, ni soa manu taki tasi i manu kesekese fuli e mauli, se manu tagata mo se manu fafine, o tupu ke fakamauli latou mo koe.

²⁰ E au loa a manu kesekese fuli kiate koe, o taki toka lua, a manu lele o mulimuli ki olatou faasiga, mo manu lalasi o mulimuli ki olatou faasiga, ti mo manu totolo o le kele o mulimuli ki olatou faasiga, o tupu ke ke fakamauli latou.

²¹ Ti ko koe, tanaki ni nea kai i nea fuli ala e kai ia, ti ke tanaki ke lasi, ke feauga kiate koe mo latou.

²² Ti na fai loa a Noe ki ai : na fai loa e ia a nea fuli ala na fakatotonu e le Atua kiate ia.