Senesi 5 - Tosi Tapu

¹ Ko leinei le tosi o le sakoga o Atama. I le fakatupu e le Eteleno le tagata, na fai loa e ia a ia o fakatatau ki le Atua.

² Na fakatupu loa e ia le tagata mo le fafine, na tapuaki loa a ia kia laua, ti na fakaigoa loa e ia laua ki le igoa o le tagata, i lana fakatupu laua.

³ Ko Atama, i lona fetuu kau lelau kau tolu, na fakatupu ia loa se vosa leia na tatau mo ia, mo aga ofaipe ia, ti na soli loa e ia kiate ia le igoa ko Seti.

⁴ Ko aso o Atama, i le oki o le tupu o Seti, ko fetuu e kau lelau valu. Ti na fakatupu loa e ia ni vosa mo ni taineliki.

⁵ Ko aso fuli o le mauli o Atama ko fetuu e kau lelau iva kau tolu ; ti na mate loa a ia.

⁶ Ko Seti, i lona fetuu kau lelau kau lima, na fakatupu ia loa Enosi.

⁷ Na mauli loa Seti i le oki o le tupu o Enosi, i fetuu e kau lelau valu tupu fitu ; ti na fakatupu loa e ia ni vosa mo ni taineliki.

⁸ Ko aso fuli o Seti ko fetuu e kau lelau iva kau agafulu tupu lua ; ti na mate loa a ia.

⁹ Ko Enosi, i lona fetuu kau iva, na fakatupu ia loa Kenani.

¹⁰ Na mauli loa Enosi, i le oki o le tupu o Kenani, i fetuu e kau lelau valu kau agafulu tupu lima ; ti na fakatupu loa e ia ni vosa mo ni taineliki.

¹¹ Ko aso fuli o Enosi ko fetuu e kau lelau iva tupu lima ; ti na mate loa a ia.

¹² Ko Kenani, i lona fetuu kau fitu, na fakatupu ia loa Maalaleele.

¹³ Na mauli loa Kenani, i le oki o le tupu o Maalaleele, i fetuu e kau lelau valu kau fa ; ti na fakatupu loa e ia ni vosa mo ni taineliki.

¹⁴ Ko aso fuli o Kenani ko fetuu e kau lelau iva tupu lima ; ti na mate loa a ia.

¹⁵ Ko Maalaleele, i lona fetuu kau ono tupu lima, na fakatupu ia loa Seleti.

¹⁶ Na mauli loa Maalaleele, i le oki o le tupu o Seleti, i fetuu e kau lelau valu kau tolu ; ti na fakatupu loa e ia ni vosa mo ni taineliki.

¹⁷ Ko aso fuli o Maalaleele ko fetuu e kau lelau valu kau iva tupu lima ; ti na mate loa a ia.

¹⁸ Ko Seleti, i lona fetuu kau lelau kau ono tupu lua, na fakatupu ia loa Enoke.

¹⁹ Na mauli loa Seleti, i le oki o le tupu o Enoke, i fetuu e kau lelau valu ; ti na fakatupu loa e ia ni vosa mo ni taineliki.

²⁰ Ko aso fuli o Seleti ko fetuu e kau lelau iva kau ono tupu lua ; ti na mate loa a ia.

²¹ Ko Enoke, i lona fetuu kau ono tupu lima, na fakatupu ia loa Metusela.

²² Ko Enoke, i le oki o le tupu o Metusela, na saele loa mo le Atua i fetuu e kau lelau tolu ; ti na fakatupu loa e ia ni vosa mo ni taineliki.

²³ Ko aso fuli o Enoke ko fetuu e kau lelau tolu kau ono tupu lima.

²⁴ Na saele loa Enoke mo le Atua ; ti na leaise toe maua loa a ia, talie na ave loa a ia e le Atua.

²⁵ Ko Metusela, i lona fetuu kau lelau kau valu tupu fitu, na fakatupu ia loa Lemeke.

²⁶ Na mauli loa Metusela, i le oki o le tupu o Lemeke, i fetuu e kau lelau fitu kau valu tupu lua ; ti na fakatupu loa e ia ni vosa mo ni taineliki.

²⁷ Ko aso fuli o Metusela ko fetuu e kau lelau iva kau ono tupu iva ; ti na mate loa a ia.

²⁸ Ko Lemeke, i lona fetuu kau lelau kau valu tupu lua, na fakatupu ia loa se vosa.

²⁹ Ti na soli loa e ia kiate ia le igoa ko Noe, o pati : Ko ia leinei e fakafimalie ia loa tatou i atatou gaoi pakia, talie kua fakamalaia le kele leinei e le Eteleno.

³⁰ Na mauli loa Lemeke, i le oki o le tupu o Noe, i fetuu e kau lelau ono kau iva tupu lima ; ti na fakatupu loa e ia ni vosa mo ni taine.

³¹ Ko aso fuli o Lemeke ko fetuu e kau lelau fitu kau fitu tupu fitu ; ti na mate loa a ia.

³² Ko Noe, i lona fetuu kau lelau lima, na fakatupu ia loa a Semi, mo Kami, mo Safeti.