Senesi 49 - Tosi Tapu

Tapuaki a Sakopo ki ona vosa

¹ Na kalagai loa e Sakopo ona vosa, o pati : Kotou fakatasi mai. Ti e kau fakasa loa kia koutou le nea leia ka soko loa kia koutou i temi ki muli.

² Kotou fakatasi mai kiate au, ti kotou fakalogo mai kiate au, ei vosa o Sakopo ! Kotou fakalogo ki lokoutou tamana ko Iselaele !

³ Lupeni, ko koe ko loku vosa uluaki, Ko loku makeke ti ko uluaki fua o loku makeke. E ke fakalaka i ou fetaina i le mamalu mo le makeke ;

⁴ Ko se tafe makeke a koe, kae e leaise ke maua loa le tuulaga o le uluaki, Talie na ke pale ki le moeaga o lou tamana, Ti na ke fakakelekele loku moeaga i lau pale ki ai.

⁵ Ko Simeone mo Levi e tautaina ; Ko la seleta ko ni nea gaoi o le tukipo.

⁶ Ke aua na kau loku laumalie ki ala fono fakafufu. Ke aua na fakatasi loku laumalie ki ala fakatasiga, talie na la tamate ni tagata i lola ita, Ti na la tutuuti a vae o pipi i lola agaveli.

⁷ Ke malaia lola ita, talie na veli ai lola ita ! Ke malaia lola itaita, talie na tukipo a ia ! Koia e kau fakamavaevae ai loa laua i le fenua o Sakopo, Ti e kau veteki loa laua i le fenua o Iselaele.

⁸ Ko Suta, e ke tali loa a fakavikiviki o ou fetaina ; E teki loa lou lima ki le muli ulu o ou fili ; E tulolo loa a vosa o lou tamana i ou mua.

⁹ Ko Suta ko loku vosa, e ke faipe se laione muli. E ke au mei le tamatea, ei loku vosa ! E peluki e ia ona vae o moe pe se laione tagata, Ofaipe se laione fafine : Ko ai e toe lagai ia a ia ki aluga ?

¹⁰ E leaise fakamamao loa le pala fakasau ia Suta, Ti mo le tokotoko fakaaliki i lima o lona sakoga, O kaku ki le aso leia e sa ai loa le Silo (leia e tonu ke maua ia a ia), Ti ke fakalogo loa kiate ia a kakai fuli.

¹¹ E sai loa e ia lana asino ki le vite, Ti mo le uviki o lana asino fafine ki le tafito vite malie. E fo loa e ia lona kofu i le vino, Ti mo lona taupulupulu i le toto o le fua o le vite.

¹² E kukula ona mata i le vino, Ti e tetea ona nifo i le sua manu.

¹³ Ko Sapulone, e nofo loa a ia i le mata tai, E nofo loa a ia i le taulaga o vaka, Ti e kaku loa lona kele ki Sitone.

¹⁴ Ko Isakale ko se asino makeke, Leia e moe i fale manu.

¹⁵ E tio a ia e malie le ganea leia na malolo ai, Ti e malie le fenua ki le nofo. Koia na tali ai loa e ia ke teki se amoga ki lona tuauma, Ti mo le totogi o se tukusau.

¹⁶ Ko Tane, e fakamaaui ia loa lona kakai, talie ko ia ko se tasi o famili o Iselaele.

¹⁷ E fai a Tane pe se gata i le ala, Pe se gata kona i se ala lau ikiiki, Leia e uuti ia a taga vae o osi, Ke vilo ai ki muli le tagata leia e eke i aluga.

¹⁸ E kau fanaki ki le Eteleno, ko loku tokoi !

¹⁹ Ko Kate, e osoi loa a ia e ni kau tagata kaia, Kae toe osoi loa e ia latou ti e toe kapu loa e ia latou.

²⁰ Ko Asele, e fakatupu loa e ia se nea kai malie ai, ti e teuteui loa e ia a nea kai fakaeteete a sau.

²¹ Ko Nefetali, ko se koti fafine vao a ia e mauli faifaitalisa, Ti e fai e ia ni masau fulumalie.

²² Ko Sosefo, ko le uli a ia o se laakau fua, Le uli o se laakau fua i tafa o se matapuna vai ; E malaga loa ona laa i aluga o le kaua.

²³ Na fakaveliveli kiate ia ni tagata fai kalolo, Ti na lotou kaloloi a ia ki alatou kalolo, Ti na lotou kapu a ia i lolatou vesia.

²⁴ Kae na tuu makeke aifai lana kalolo, Ti na fakamakeke ona lima E lima o le Atua makeke o Sakopo : Koia leia na liliu ai a ia ko le tagata tausi manu, mo le utu o Iselaele.

²⁵ Ko le gaoi a ia a le Atua o lou tamana, leia e tokoi loa kiate koe ; Ko le gaoi a ia a le Mafimafi, leia e tapuaki loa kiate koe, Ki tapuakina o le lagi i aluga, Ki tapuakina o le vai i lalo, Ki tapuakina o u mo manava o fafine.

²⁶ E fakalaka a tapuaki o lou tamana i tapuaki o oku tamana, o kaku ki tumutumu o mauga lee gato. Ke ifo a tapuaki ana ki le ulu o Sosefo, Ki le tumutumu o le ulu o le aliki o ona fetaina !

²⁷ Ko Pesamino ko se lupo fekai leia e sae ia. I le usu e kai e ia lana nea kai, Ti ko le afiafi, e vae e ia lona koloa i le tau.

²⁸ Ko latou fuli ana, na tupu mei ai a famili e tino agafulu tupu lua o Iselaele. Ti ko masau ana, na tuku kia latou e lolatou tamana, i lana tapuaki kia latou. Na tuku e ia lana tapuaki ki le tagata taki toka tasi.

Mate mo le tanu o Sakopo

²⁹ Ti na tuku loa e ia kia latou le fakatotonu leinei : Ka kau ano loa ki loku kakai ; ke kotou tanu loa au i le tanuma o oku tamana, i le ana leia e tuu i le faisaga o le tagata Eti ko Efelone,

³⁰ I le ana o Makepela, leia e ofi ki Mamele, i le fenua o Kanaane. Na totogi le faisaga lena e Apalaamo ki le tagata Eti ko Efelone, ke liliu ko lona tanuma.

³¹ Kua tanu i ai Apalaamo mo lana avaga ko Sala ; Kua tanu i ai Isaake mo lana avaga ko Lepeka ; ti na kau tanu foki i ai a Lea.

³² Ko le faisaga mo le ana leia e tuu i ai, na totogi a ia mei vosa o Eti.

³³ I le oki o le tuku e Sakopo o ana fakatotonu ki ona vosa, na too loa e ia ona vae o tuku ki le palepale, ti na tukumanava fakaoki loa a ia, ti na ano loa a ia ki lona kakai.