Senesi 46 - Tosi Tapu

Sakopo mo lona famili i Esipito

¹ Na ano loa Iselaele mo ana nea fuli. Na kaku loa a ia ki Pele-Sepa, ti na momoli loa e ia ni sakilifisio ki le Atua o lona tamana ko Isaake.

² Ti na masau loa le Atua kia Iselaele i se moe miti i le pouli, o pati : Sakopo ! Sakopo ! Ti na tali loa Iselaele : Ko leinei au !

³ Ti na pati loa le Atua : Ko au ko le Atua, ko le Atua o lou tamana. Ke aua na ke tuania i le ifo ki Esipito, talie e kau fakaliliu loa a koe ko se puleaga lasi i le fenua lena.

⁴ Ko au totonu, e kau ifo loa mo koe ki Esipito, ti ko au totonu, e kau toe aumai ia loa a koe ki leinei. I lou mate ko Sosefo leia e tapono ia loa ou mata.

⁵ Na mavae loa Sakopo i Pele-Sepa. Ti na fakaeke loa e vosa o Iselaele lolatou tamana ko Sakopo, mo alatou fanau, mo alatou avaga, ki saliote ala na fakamomoli ake e Falaone ke aumai ai latou.

⁶ Na lotou ave foki alatou kau manu, mo alatou nea fuli ala na lotou maua i le fenua o Kanaane. Ti na ano loa Sakopo ki Esipito mo lona famili katoa.

⁷ Na ave loa e ia ki Esipito ona vosa, mo vosa o ona vosa, mo ona taineliki, mo taineliki o ona vosa, ti mo lona famili katoa.

⁸ Ko nei a igoa o vosa o Iselaele, ala na ifo loa ki Esipito. Ko Sakopo mo ona vosa. Ko le vosa uluaki o Sakopo ko Lupeni.

⁹ Ko vosa o Lupeni : Ko Enoke, mo Palu, mo Eselone, mo Kalimi.

¹⁰ Ko vosa o Simeone : Ko Semuele, mo Samine, mo Oate, mo Sakine, mo Soale ; ti mo Saulo, ko le vosa ki le fafine Kanaane.

¹¹ Ko vosa o Levi : Ko Kelesoni, mo Keati, mo Melali.

¹² Ko vosa o Suta : Ko Ele, mo Onane, mo Sela, mo Pelesi, mo Selake. Na mate loa Ele mo Onane i le fenua o Kanaane. Ko vosa o Pelesi ko Eselone mo Amule.

¹³ Ko vosa o Isakale : Ko Tola, mo Puva, mo Sopo, mo Similoni.

¹⁴ Ko vosa o Sapulone : Ko Seleti, mo Eloni, mo Saleli.

¹⁵ Ko vosa ana ala na fanaui e Lea kia Sakopo i Patane-Alame, ti mo lona taine ko Tina. Na fakatasi latou mo alatou fanau ko le tino tolu tupu tolu.

¹⁶ Ko vosa o Kate : Ko Sifesoni, mo Aki, mo Suni, mo Eteseponi, mo Eli, mo Aloti, mo Aleeli.

¹⁷ Ko vosa o Asele : Ko Simena, mo Siseva, Sisevi, mo Pelia ; ti ko lolatou tuagaane ko Selake. Ti ko vosa o Pelia : ko Epele mo Malikiele.

¹⁸ Ko vosa ana ala na fanaui e Silipa, leia na tuku e Lapane ki lona taine ko Lea ; ti na fanaui e ia latou kia Sakopo. Na fakatasi latou ko le tino agafulu tupu ono.

¹⁹ Ko vosa o Lasele, avaga o Sakopo : Ko Sosefo mo Pesamino.

²⁰ Na tupu loa kia Sosefo, i le fenua o Esipito, a Manase mo Efalaimi, ala na fanaui kiate ia e Asenate, taine o Potifela, ko le pelepitelo o Oni.

²¹ Ko vosa o Pesamino : Ko Pela, mo Pekeli, mo Asipeli, mo Kela, mo Neemani, mo Esi, mo Losi, mo Mupimi, mo Upime, mo Aleti.

²² Ko vosa ana ala na fanaui e Lasele kia Sakopo. Na lotou fakatasi ko le tino agafulu tupu fa.

²³ Ko vosa o Tane : Ko Usime.

²⁴ Ko vosa o Nefetali : Ko Sateseele, mo Kuni, mo Setesele, mo Silemi.

²⁵ Ko vosa ana ala na fanaui e Pila, leia na tuku e Lapane ki lona taine ko Lasele ; ti na fanaui e ia latou kia Sakopo. Na lotou fakatasi ko le toka fitu.

²⁶ Ko le api o le famili o Sakopo, latou ala na ifo totonu meiate ia, ti na ifo mo ia ki Esipito, ko le tino ono tupu ono, kae na leaise lau a avaga o vosa o Sakopo.

²⁷ Na maua e Sosefo ni vosa e toka lua, ala na tupu kiate ia i Esipito. Ko le api katoa o le famili o Sakopo leia na nofo loa i Esipito ko le tino fitu.

²⁸ Na kakau loa e Sakopo a Suta ke muamua iate ia kia Sosefo, o fakasa kiate ia, ke nake a ia ki Koseni, talie e ifo loa a ia ki ai.

²⁹ Na teuteui loa e Sosefo lana saliote, ti na eke loa a ia ki ai, ti na ano loa a ia ki Koseni, o fakafelavei ki lona tamana ko Iselaele. I lana tio ki lona tamana, na makape loa a ia o kalu ki lona ua, o sogi kiate ia, ti na tagi loa a ia o fualoa i lona ua.

³⁰ Na pati loa Sakopo kiate ia : Ke kau mate i le temi nei, talie kua kau tio ki ou mata, ti koi ke mauli !

³¹ Na pati loa Sosefo ki ona fetaina, mo le famili katoa o lona tamana : E kau ano o fakasa kia Falaone kua kaku mai kiate au oku fetaina mo le famili katoa o loku tamana, ala na nofo i le fenua o Kanaane.

³² E kau fakasa loa kiate ia ko ni tagata tausi manu koutou, ti na kotou aumai akoutou kau pipi, mo akoutou kau ovi, mo akoutou kau koti, ti mo akoutou nea fuli.

³³ Ti kapau e kalagai loa koutou e Falaone ke kotou nake kiate ia, ti ka vesili atu loa a ia kia koutou :

³⁴ Pe kolea lakoutou gaoi ? Kotou tali loa kiate ia : E tausi manu au tagata fakasausau talu mei lomatou liliki o kaku mai ki le aso nei, ofaipe omatou tamana. I le nea lena e fakataga loa e ia kia koutou ke kotou nonofo i le fenua ko Koseni, talie e fakalialia le kau Esipito ki kau tausi manu fuli.