Senesi 44 - Tosi Tapu

Asiasii e Sosefo ona fetaina

¹ Na tuku loa e Sosefo le fakatotonu leinei ki le pule o lona fale : Faofao ke apelepele i nea kai a taga a tagata anei, o mulimuli ki lalatou ma ave ia, ti ke tuku loa le paaga a le tagata taki toka tasi ki le gutu o lana taga.

² Velo loa loku ipu, le ipu siliva, ki le gutu o le taga a le mulimuli, o fakatasi mo le paaga o lana fulumeto. Na fai loa e le tagata pule a nea fuli ala na fakatotonu ake e Sosefo kiate ia.

³ I le ala usu ake, i le mafoa mai o le ao, na tuku loa latou ke ano mo alatou asino.

⁴ Na lotou mavae loa i le kolo, ti na leikiaise lotou mamao loa ai. Ti na pati loa Sosefo ki le pule o lona fale : Tuu, o tuli a tagata ana, ti ka ke maua loa latou, ke ke pati loa kia latou : Kolea e kotou totogi ai le malie ki le veli ?

⁵ Pe leaise kotou nofo loa mo le ipu leia e inu ai loku aliki, leia e toe fakaaoga e ia ki le fai kikite ? E veli le nea leia kua kotou fai.

⁶ Na maua loa latou e le tagata pule o le fale, ti na fai loa e ia a masau ana kia latou.

⁷ Na lotou tali loa kiate ia : Kolea e masau felaaki ai lomatou aliki ? Ke mamao ia matou le fai o se nea fenaaki !

⁸ Ko leinei, na motou toe liufaki mai mei le fenua o Kanaane le paaga leia na motou maua i le gutu o amatou taga ; ti e feaki loa ke motou kaia se paaga pe ko se aulo i le fale o lou aliki ?

⁹ Kapau e maua loa le ipu lena i le taga a se tasi o matou, ti e mate loa le tagata lena, ti e motou popula loa kiate koe !

¹⁰ Na pati loa le tagata : Ke fai ki le nea leia kua kotou pati ki ai ! Kae e popula toka tasi loa le tagata leia e maua ai loa le ipu, kae lauatea loa ala ake.

¹¹ Ti na latou fakavilivili loa o tasi tuku lana kavega ki le kele.

¹² Ti na sufe loa e le tagata pule alatou kavega, o kamata mei le uluaki o fakaoki ki le mulimuli, ti ko leinei, na tuku le ipu i le taga a Pesamino.

¹³ Na lotou sae loa olatou kofu, ti na lotou toe teki loa alatou kavega ki asino, o toe liliu loa ki le kolo.

¹⁴ Na kaku loa Suta mo ona fetaina ki le fale o Sosefo, kae koi nofo Sosefo i ai, ti na lotou punou loa ki le kele i ona mua.

¹⁵ Ti na pati loa Sosefo kia latou : Kolea le nea leia kua kotou fai ? E leaise kotou iloa ko le tagata fai kikite au ?

¹⁶ Ti na tali loa Suta : Kolea ke motou pati ki loku aliki ? Kolea ke fakatonuia ai matou ? Kua fakasa e le Atua le agaveli o ana tagata fakasausau. Ko nei matou ke popula ki loku aliki, mo leia na maua ai le ipu.

¹⁷ Ti na pati loa Sosefo : Ke taofi au e le Atua ke aua na kau fai ia le nea lena ! Ke popula toka tasi fua le tagata leia na maua ai le ipu, kae ko le toega, ke kotou toe liliu i le tokamalie ki lokoutou tamana.

¹⁸ Ti na fakafeofi ake loa Suta kia Sosefo, o pati : Alofa mai ei loku aliki, o fakataga ki lau tagata fakasausau ke masau ki loku aliki, ti ke aua na vilo lona ita ki lana tagata fakasausau, talie e ke tatau mo Falaone !

¹⁹ Na vesili mai e loku aliki ki ana tagata fakasausau, o pati : Pe koi mauli lokoutou tamana ? Pe koi toe se tasi okoutou taina ?

²⁰ Na motou tali : Koi mauli lomatou tamana kae kua matua, ti e i ai foki somatou taina muli leia na tupu kiate ia i lona temi matua. E alofa kese lomatou tamana ki le toe lena, talie ko le toe a ia e tasi koi toe kiate ia i le fafine leia na alofa mamae a ia ki ai ; kua mate le tasi a vosa.

²¹ Na ke pati mai loa ki au tagata fakasausau : Kotou aumai a ia kiate au, e kau fia tio mata kiate ia.

²² Na motou tali loa ki loku aliki : E leaise feala ke mavae le toe lena i lona tamana ; kapau e mavae loa a ia iate ia, e mate loa lona tamana.

²³ Ti na ke pati mai loa ki au tagata fakasausau : Kapau e leaise kotou au loa mo lokoutou taina mulimuli, ti e leaise kotou sa loa ki oku mua.

²⁴ I lamatou liliu ki lau tagata fakasausau, lomatou tamana, na motou fakasa loa kiate ia a masau a loku aliki.

²⁵ Ti na pati loa lomatou tamana : Kotou toe liliu o totogi mai se nea kai.

²⁶ Na motou tali loa kiate ia : E leaise feala ke motou ifo ki Esipito mo kapau e leaise au lomatou taina mulimuli mo matou. Talie kapau e leaise au loa a ia mo matou, ti e leaise tali loa matou e le tagata pule o le fenua.

²⁷ Ti na pati mai loa lau tagata fakasausau, lomatou tamana, kia matou : E kotou iloa na fanaui e laku avaga ni vosa e lua kiate au.

²⁸ Kua puli le tasi a vosa talu mei le aso leia na mavae ai i leinei ; ti e kau masalo kua kai a ia e se manu fekai, talie e leikiaise kau toe tio kiate ia o kaku mai ki le aso nei.

²⁹ Kapau e kotou toe too loa le toe leinei, ti kapau e soko loa kiate ia se nea veli, e kotou fakaifo loa loku ulu sina ki le nofoaga o le kau mate.

³⁰ Koia i le aso nei, kapau e kau toe liliu loa ki lau tagata fakasausau, loku tamana, kae e leaise motou ano mo le fanau leia e pipiki ki ai lona laumalie,

³¹ ti e mate loa a ia mo kapau e puli le toe ; ti e sala loa au tagata fakasausau, i lamatou fakaifo i le mamae le ulu sina o lomatou tamana, lau tagata fakasausau, ki le nofoaga o le kau mate.

³² Ti na pati loa lau tagata fakasausau ki lona tamana o uiga mo le fanau : Kapau e leaise kau aumai loa a ia kiate koe, ti e kau sala loa i ou mua o lee gato.

³³ Koia e kau kole atu ai kiate koe, ke ke fakataga mai ki lau tagata fakasausau ke nofo o fetogi le fanau, o popula ki loku aliki, kae ke toe pale le fanau mo ona fetaina ki lomatou tamana.

³⁴ Pe feaki loa laku toe liliu ki loku tamana, kae leaise pale loa le toe mo au ? Ke aua na kau tio loa ki le mamae o loku tamana !