Senesi 41 - Tosi Tapu

Sosefo i mua o Falaone

¹ Na sili loa ni fetuu katoa e lua, ti na fai loa e Falaone se moe miti : Ko leinei, na tuu a ia i le kauvai o le vaitafe.

² Ti na tio loa a ia ki ni pipi fafine e fitu, ala na fulumalilie mo pepeti, na pale ake loa i le vaitafe, o kai i le faisaga mouku.

³ Ti ko ni iki ake pipi fafine e fitu, ala na fuluveveli mo kakala, na nake loa i olatou muli i le vaitafe, o tutuu i olatou tafa i le laugutu o le vaitafe.

⁴ Ti na kai loa e pipi fafine fuluveveli mo kakala a pipi fafine fulumalilie mo pepeti. Ti na ala loa Falaone.

⁵ Na toe moe loa a ia, ti na toe fai loa e ia se tasi moe miti. Na tio a ia ki ni taulu fulumeto e fitu, ala na fulumalilie mo fualalasi, na sosomo ake i le tafito fulumeto e tasi.

⁶ Ti ko ni iki ake taulu fulumeto e fitu, ala na paao mo masunu i le matagi o le potu esite, na somo ake loa i olatou muli.

⁷ Ti na folo loa e taulu fulumeto paao a taulu fulumeto fualalasi mo fuamalilie. Ti na ala ake loa Falaone ; ko lena lana moe miti.

⁸ I le usu, na mamae loa le laumalie o Falaone, ti na kalagai loa e ia a tagata fainea fakatalatupua fuli mo le kau poto fuli o Esipito. Ti na fakamatala loa e ia kia latou ana moe miti. Kae na leaise mafai ke fakamatala e se tasi a moe miti kia Falaone.

⁹ Ti na masau loa le pule vino, o pati kia Falaone : E kau fakamanatu loa i le aso nei laku sala.

¹⁰ Na ita Falaone ki ana tagata fakasausau ; ti na tuku loa e ia au mo le pule pane ki le pilisoni, ki le fale o le pule o le kau tagata leo.

¹¹ Na ma fai loa toka lua ni moe miti i le po e tasi. Ti na ma tasi maua ia loa se fakamatala ki ama moe miti.

¹² I le fale pilisoni, na ma nonofo fakatasi mo se tama tupulaga Epeleo, ko le tagata fakasausau a le pule o le kau tagata leo. Na ma fakamatala loa kiate ia ama moe miti, ti na fakamatala loa e ia a ma moe miti taki tasi.

¹³ Ti na soko loa a nea fuli ala na fakasa e ia o mulimuli ki lana fakamatala kia maua. Na toe fakanofo loa au e Falaone ki loku tuulaga, kae na tautau loa le pule pane ki le laakau.

¹⁴ Na fakatotonu loa e Falaone ke avake Sosefo kiate ia. Ti na too fakatavili loa Sosefo i le fale pilisoni. Ti na tele loa e Sosefo lona kau kava, ti na fetogi loa e ia ona teu, ti na ano loa a ia ki mua o Falaone.

¹⁵ Na pati loa Falaone kia Sosefo : Na kau fai ia se moe miti, ti na leaise mafai ke fakamatala a ia e se tasi. Ti na kau logo e ke fakamatala ia a moe miti, i le oki o lau fakalogo ki ai.

¹⁶ Na tali loa Sosefo kia Falaone : E leaise ko au ! Kae ko le Atua leia e soli ia loa se tali malie kia Falaone.

¹⁷ Na pati loa Falaone kia Sosefo : I laku moe miti, na kau tuu i le laugutu o le vaitafe.

¹⁸ Ti na kau tio loa na pale ake i le vaitafe ni pipi fafine e fitu, ala na fulumalilie mo pepeti, ti na lotou kai loa le mutie i le faisaga mouku i tafa o le vaitafe.

¹⁹ Ti na pale ake loa ni iki ake pipi fafine e fitu, ala na kakala mo fuluveveli, i olatou muli : Na leaise kau tio i se aso ki ni pipi fuluveveli felaaki i le fenua o Esipito.

²⁰ Ti na kai loa e pipi fafine kakala mo fuluveveli a pipi pepeti e fitu.

²¹ Na lotou folo loa a pipi pepeti ki olatou manava, kae na leaise mailoga fua talie na lotou kakala aifai pe mua. Ti na kau ala loa.

²² Na kau toe moe, ti na kau toe tio loa ki ni taulu fulumeto e fitu, ala na fualalasi mo fulumalilie, na sosomo ake i se tafito fulumeto e tasi.

²³ Ti na sosomo ake loa i olatou muli ni iki ake taulu fulumeto e fitu, ala na paao mo masunu i le matagi o le potu esite.

²⁴ Ti na folo loa e taulu fulumeto paao a taulu fulumeto fulumalilie e fitu. Ko lena laku moe miti ; kua oki i laku fakamatala ki le kau fai nea fakatalatupua, kae na leaise soli mai e se tasi lona fakamatala kiate au.

²⁵ Na pati loa Sosefo kia Falaone : Ko le nea leia na moe miti ki ai Falaone ko le nea e tasi. Kua fakasa e le Atua kia Falaone le nea leia ka fai loa e ia.

²⁶ Ko pipi fafine fulumalilie e fitu ko fetuu ana e fitu ; ti ko taulu fulumeto fulumalilie e fitu ko fetuu ana e fitu. Ko se moe miti e tasi.

²⁷ Ko pipi fafine kakala mo fuluveveli e fitu, ala na pale ake i muli o uluaki pipi fafine, ko fetuu ana e fitu ; ti ko taulu fulumeto paao mo masunu i le matagi o le potu esite, ko fetuu foki ana e fitu. Kae ko fetuu oge ana e fitu.

²⁸ Ko leinei le nea leia e kau fakasa kia Falaone : Kua fakasa e le Atua kia Falaone le nea leia ka fai loa e ia.

²⁹ Ko leinei, e ia loa ni fetuu mau i le fenua katoa o Esipito.

³⁰ Ti e muli mai loa ni fetuu oge e fitu i le fenua katoa o Esipito. Ti e galo loa le mau i le fenua o Esipito ; talie e tamate loa e le oge le fenua.

³¹ O tupu ko le lasi o le oge lena ka to loa ki le fenua, e leaise toe iloa loa le mau o le fenua nei.

³² Kapau na tio tua lua Falaone ki le moe miti, ko lona uiga, kua fakapapau e le Eteleno ke fai le nea lena, ti e leaise toe talitali loa a ia.

³³ Koia i le aso nei, ke afa e Falaone se tagata malie mo poto, ti ke fakanofo e ia a ia ke pule ki le fenua o Esipito.

³⁴ Ke fakanofo foki e Falaone ni kovana i le fenua, ke lotou tanaki ia le vaega lima o magiti fuli o Esipito i fetuu e mau e fitu o le fenua.

³⁵ Ke lotou tanaki a nea kai kesekese fuli i fetuu malilie anei ka au, ti ke lotou fakatuu ni fale koloa, o laku ki ai le fulumeto ke lasi se tokonaki, ti ke lotou taupau a nea fuli ana, i le pule a Falaone.

³⁶ E maua loa e Esipito se tokonaki nea kai ki fetuu oge e fitu, ti e leaise mamate loa le kakai i le oge.

Sosefo, kovana o Esipito

³⁷ Na malie loa a masau ana kia Falaone mo ana minisi fuli.

³⁸ Ti na pati loa Falaone kia ana minisi : E nofo le tagata leinei mo le Laumalie o le Atua. Pe tou toe maua loa se tasi ake tagata ofaipe ia leinei ?

³⁹ Ti na pati loa Falaone kia Sosefo : Ko leinei kua fakasa e le Atua kiate koe a nea fuli anei, e leaise toe maua se tasi ake tagata leia e toe atamai ake mo toe poto ake iate koe.

⁴⁰ Koia e kau fakanofo a koe ke pule ki loku puleaga, ti e fakalogo loa loku kakai katoa ki au fakatotonu. E kau malaga fua iate koe i le ekeekeaga fakasau.

⁴¹ Ti na pati loa Falaone kia Sosefo : Tio, e kau tuku kiate koe i le aso nei le pule ki le fenua katoa o Esipito.

⁴² Ti na too loa e Falaone lona mama i lona lima o velo ki le lima o Sosefo ; ti na fakakofu loa e ia Sosefo ki ni kofu tetea fulumalilie, ti na fakatau loa e ia se kasoa aulo ki lona ua.

⁴³ Ti na fakaeke loa e ia Sosefo ki le saliote leia e olo ake ki lana saliote, ti na kalaga loa i mua o Sosefo : Ke tutuli ! I le nea lena, na fakanofo loa a ia e Falaone ke pule ki le fenua katoa o Esipito.

⁴⁴ Ti na toe pati foki a ia kia Sosefo : Ko au ko Falaone ! ti e leaise siki loa e se tasi lona lima pe ko lona vae i le fenua katoa o Esipito.

Avaga o Sosefo

⁴⁵ Ti na soli loa e Falaone kia Sosefo le igoa ko Safinati-Paeneasi ; ti na soli loa e ia kia Sosefo a Asenate, taine o Potifela, ko le pelepitelo o Oni, ke avaga mo ia. Ti na ano loa Sosefo o fakatele le fenua katoa o Esipito.

⁴⁶ Na fetuu kau tolu Sosefo i lana ano ki mua o le sau o Esipito ko Falaone. Ti na mavae loa Sosefo meia Falaone, o ano o fakatele le fenua katoa o Esipito.

⁴⁷ I fetuu mau e fitu na fua mauke ai le kele.

⁴⁸ Na tanaki loa e Sosefo a fua fuli o fetuu ana e fitu, i le fenua katoa o Esipito. Ti na fakatuu loa e ia ni fale koloa i kolo fuli, o laku ki ai a fua o faisaga i olatou tafatafa.

⁴⁹ Na tanaki loa e Sosefo le fulumeto o tatau mo le one o le tai, ti na leaise koi mafai lona lau.

Tupu o Manase mo Efalaimi

⁵⁰ I mua o fetuu oge, na tupu loa kia Sosefo ni vosa e lua, ala na fanaui e Asenate, taine o Potifela, ko le pelepitelo o Oni.

⁵¹ Na soli loa e Sosefo ki le vosa uluaki le igoa ko Manase, talie na pati a ia : Kua tuku e le Atua ke kau galoi oku mamae fuli mo loku mamao mei le fale katoa o loku tamana.

⁵² Ti na soli loa e ia ki le vosa lua le igoa ko Efalaimi, talie na pati a ia : Kua soli mai e le Atua kiate au ni fanau i le fenua leinei na kau mamae lasi ai.

⁵³ Ti na oki loa a fetuu e fitu o le mau i Esipito.

⁵⁴ Ti na kamata loa a fetuu oge e fitu, ofaipe lona kua fakasa e Sosefo. Na to loa le oge i fenua fuli, kae na maua loa le pane i le fenua katoa o Esipito.

⁵⁵ I le aso leia na kamata pakupaku ai loa le kakai o le fenua o Esipito, na lotou tagi loa kia Falaone ke soli ake se pane kia latou. Na pati loa Falaone ki le kau Esipito fuli : Kotou ano kia Sosefo, ti kotou fai le nea leia e fakatotonu atu loa e ia kia koutou.

⁵⁶ Na veli loa le oge i le fenua katoa. Ti na fakamavaa loa e Sosefo a ganea fuli ala na tanaki ai a nea kai, ti na fakatau loa e ia le fulumeto ki le kau Esipito. Na toe asilisili veli loa le oge i le fenua o Esipito.

⁵⁷ Ti na au loa mei fenua fuli ki Esipito, o totogi fulumeto ia Sosefo ; talie na veli ai le oge i fenua fuli.