Senesi 40 - Tosi Tapu

Sosefo i le fale pilisoni

¹ I le oki o nea ana, na fai loa e le pule vino mo le pule pane o le sau o Esipito, se sala ki lola pule, le sau o Esipito.

² Na ita loa Falaone ki ana minisi, le pule vino mo le pule pane.

³ Ti na tuku loa e ia laua ki le fale pilisoni, ki le fale leia na nonofo ai le kau pilisoni a le sau, le ganea leia na nofo ai Sosefo.

⁴ Ti na tuku loa laua e le pule o le fale pilisoni ki lima o Sosefo, leia na tausi loa kia laua. Na la nonofo loa i le fale pilisoni o fualoa.

⁵ I se po e tasi, na fai loa e le pule vino mo le pule pane o le sau o Esipito, ala na pilisoni, ni ala moe miti taki tasi, o feala ke fakamatala lona uiga.

⁶ I se usu leia na fakatele ai Sosefo kia laua, na tio loa a ia e la mata mamae.

⁷ Ti na vesili loa Sosefo ki minisi a Falaone : kolea e kolua mata mamae ai i le aso nei ?

⁸ Na la tali loa kiate ia : Na ma moe miti, ti e leaise tasi ke kikite ia. Na pati loa Sosefo kia laua : Ko le Atua toka tasi leia e feala ke fakamatala ia a moe miti ana kia koulua. Kolua fakamatala mai a moe miti kiate au.

⁹ Na fakasa loa e le pule vino lana moe miti kia Sosefo, o pati kiate ia : I laku moe miti, na kau tio na tuu se tafito vite i oku mua.

¹⁰ Na maga tolu le tafito vite lena. Na mauli ake loa a ia o se, ti na fua loa a ia o fuifui, ti na leleu loa ona fui vite.

¹¹ Na kau too ia loa i loku lima le ipu o Falaone. Ti na kau too loa a fuai vite o tatau ki le ipu o Falaone, ti na kau fakatoo loa le ipu ki le lima o Falaone.

¹² Na pati loa Sosefo kiate ia : Ko leinei le fakamatala o lau moe miti : Ko laa vite e tolu ko aso ana e tolu.

¹³ Koi toe loa ni aso e tolu, ti e toe siki loa a koe e Falaone ki se tuulaga mauiga, ti e ke toe nofo loa ki lou tuulaga mua. E ke toe fakatoo loa le ipu ki le lima o Falaone, ofaipe lau fai masani i mua, i le temi leia na ke pule vino ai.

¹⁴ Kae kau kole atu kiate koe, ke ke manatu mai loa kiate au, i le aso leia e ke manuia ai loa. Ke ke fakasa lou alofa kiate au, o masau kia Falaone o uiga mo au, ke kau mavae la i le fale pilisoni leinei ;

¹⁵ talie na aumai fakamakeke au mei le fenua o le kau Epeleo, ti i le fenua leinei, na leaise kau fai se nea veli i le fenua leinei ke fakapilisoni ai au.

¹⁶ I le tio a le pule pane na malie le fakamatala o le moe miti e Sosefo, ti na pati loa a ia kiate ia : Na kau fai foki saku moe miti : Na kau tio na teki i loku ulu ni kete pane tetea e tolu.

¹⁷ Ko le kete leia na teki oki i aluga na apele i ni kato malilie kesekese, ala e fia kai ki ai Falaone. Kae na au loa a manu lele o le lagi, o kai a kato i loto o le kete, i aluga o loku ulu.

¹⁸ Na tali loa Sosefo : Ko leinei lona fakamatala : Ko kete e tolu ko aso ana e tolu.

¹⁹ Koi toe loa ni aso e tolu, ti e too loa e Falaone lou tuulaga iate koe. E tautau loa a koe ki se laakau, ti e au loa a manu lele o le lagi o kai lou tino.

²⁰ Na sili loa a aso e tolu, ti na fakamanatu loa le aso tupu o Falaone, ti na fai loa e ia se kaitasi ki ana minisi fuli. Ti na lagai loa e Falaone le ulu o le pule vino mo le ulu o le pule pane ki ni tuulaga mauiga :

²¹ Na toe fakanofo loa e ia le pule vino ki lona tuulaga, ke toe fakatoo e ia le ipu ki le lima o Falaone ;

²² kae na fakatotonu loa e ia ke tautau le pule pane ki se laakau. Na soko fuli loa a nea ala na fakasa e Sosefo.

²³ Na leaise toe manatu loa le pule vino kia Sosefo. Na galo loa Sosefo iate ia.