Senesi 4 - Tosi Tapu

Kaino mo Apele

¹ Na iloa loa e Atama a Eva, lana avaga ; ti na tinae loa a Eva, ti na fanaui loa e ia a Kaino, ti na pati loa a ia : Kua kau maua ia se tagata mei le Eteleno.

² Na toe fanaui foki e ia le taina o Kaino ko Apele. Na tausi manu Apele, ti na gaoi kele Kaino.

³ I se aso, na fai loa e Kaino ki le Eteleno sana failaulau ki ni fua o le kele.

⁴ Ti na fai foki e Apele, i lona potu, sana failaulau ki uluaki tupu o lana kau manu ti mo olatou gako. Na tali loa e le Eteleno a Apele mo lana failaulau.

⁵ Kae na leaise tali loa e ia a Kaino mo lana failaulau. Na ita loa Kaino, ti na mata mamae loa a ia.

⁶ Ti na pati loa le Eteleno kia Kaino : Kolea e ke ita ai, kolea e ke mata mamae ai ?

⁷ Kapau e ke fai le nea leia e totonu, ti e toe tuu loa ou mata ki aluga ; kae kapau e ke fai le nea leia e veli, ti e moe loa le agasala i lou mua matapa. E loto a ia ke pule kiate koe, kae ko koe, ke ke pulei a ia.

⁸ Kae na pati loa Kaino ki lona taina ko Apele ke la ano ki fafo. I lala kaku ki faisaga, na oso loa Kaino ki lona taina ko Apele, o tamate a ia.

⁹ Na pati loa le Eteleno kia Kaino : Kofea lou taina ko Apele ? Na tali loa a ia : E leaise kau iloa ; pe ko le tagata taupau au o loku taina ?

¹⁰ Ti na pati loa le Atua : Kolea le nea leia kua ke fai ? E tagi mai kiate au le leo o le toto o lou taina mei le kele.

¹¹ Koia i le aso nei, e ke malaia ai loa i le kele lena, leia na fakamavaa ia lona gutu o tali mei lou lima le toto o lou taina.

¹² Ka ke gaoi loa ki le kele, e leaise toe soli atu loa e le kele kiate koe lona koloa. E ke sese loa, ti e ke foli noa loa i aluga o le kele.

¹³ Na pati loa Kaino ki le Eteleno : E mamafa ai loku tua, e leaise mafai ke kau amo a ia.

¹⁴ Ko leinei e ke kapu au i le aso nei i le kele leinei ; ti e tonu loa ke kau mumuni o mamao mo koe ; e kau liliu loa ko se nea sese mo foli noa i fuga o le kele, ti ka maua loa au e se tasi, ti e tamate loa e ia au.

¹⁵ Na pati loa le Eteleno kiate ia : Kapau e tamate Kaino e se tasi, e totogi loa Kaino o tua fitu. Ti na tuku loa e le Eteleno kia Kaino se fakamailoga, o tupu ke aua na tamate a ia e se tasi leia e maua ia loa a ia.

Sakoga o Kaino

¹⁶ Ti na fakamamao loa Kaino i mata o le Eteleno, ti na nofo loa a ia i le fenua o Noti, i le potu esite o Eteni.

¹⁷ Na ano loa Kaino ki lana avaga ; ti na tinae loa lana avaga, ti na fanaui loa e ia Enoke. Na fakatuu loa e ia se kolo, ti na tuku loa e ia ki le kolo lena le igoa o lona vosa ko Enoke.

¹⁸ Na tupu loa meia Enoke a Ilate, ti na tupu meia Ilate a Meusaele, ti na tupu meia Meusaele a Metusaele, ti na tupu meia Metusaele a Lemeke.

¹⁹ Na avaga loa Lemeke mo ni fafine e toka lua : ko le igoa o le tasi ko Ata, ti ko le igoa o le tasi ko Tesila.

²⁰ Na fanaui loa e Ata a Sapale : Ko le tamana a ia o latou ala e nofo falela i tafa o alatou kau manu.

²¹ Ko le igoa o lona taina ko Supale : Ko le tamana a ia o latou fuli ala e fai musika ki le alepe mo le salumo.

²² Na fanaui loa e Tesila a Tupale-Kaino, leia na fau ia a nea gaoi fuli ala e fai ki le kapa mo le ukamea. Ko le tuagaane o Tupale-Kaino ko Naama.

²³ Na pati loa Lemeke ki ona avaga : Ata mo Tesila, ke kolua fakalogo mai ki loku leo ! Avaga o Lemeke, ke kolua fakalogo mai ki laku masau ! Na kau tamate se tagata ke totogi ai loku lavea, Mo se tama tupulaga ke totogi ai loku kafo.

²⁴ E totogi loa Kaino ki ni tagata e toka fitu, Ti mo Lemeke ki ni tagata e kau fitu tupu fitu.

Meia Seti kia Noe

²⁵ Na toe iloa loa e Atama lana avaga ; ti na fanaui loa e lana avaga se tama, ti na fakaigoa loa e ia a ia ko Seti, talie na pati loa a ia : kua toe soli mai e le Atua kiate au se tasi a vosa ke fetogi ia Apele leia na tamate e Kaino.

²⁶ Na toe maua foki e Seti sona vosa, ti na fakaigoa loa e ia a ia ko Enosi. Na kamata loa i ai le toe masau ki le suafa o le Eteleno.