Senesi 38 - Tosi Tapu

Suta mo Tamale

¹ I le temi lena, na mavae loa a Suta i ona fetaina, ti na ano loa a ia ki se tagata o Atulami na igoa ko Ila.

² I ai, na tio loa a Suta ki le taine o se tagata Kanaane na igoa ko Sua ; ti na avaga loa a ia mo le taine lena ; ti na ano loa a ia kiate ia.

³ Na tinae loa le fafine, ti na fanaui loa e ia se tama, leia na fakaigoa loa e ia ko Ela.

⁴ Na toe tinae loa a ia, ti na fanaui loa e ia se tama, leia na fakaigoa loa e ia ko Onane.

⁵ Na toe fanaui loa e ia se tasi a tama, leia na fakaigoa loa e ia ko Sela. Na nofo a Suta i Kesipi i le tupu o Sela.

⁶ Na filifili loa e Suta ki lona vosa uluaki ko Ela, se fafine na igoa ko Tamale.

⁷ Ko Ela, le vosa uluaki o Suta, na agaveli ai ki mata o le Eteleno ; ti na fakamate loa a ia e le Eteleno.

⁸ Ti na pati loa a Suta kia Onane : Ano ki le avaga o lou taina, o too a ia, ti ke fakatupu se sakoga ki lou taina.

⁹ Kae i le iloa e Onane e leaise ko lona sakoga loa a ia, na liligi loa e ia lona pulapula ki le kele i temi fuli ala na ano ai a ia ki le avaga o lona taina, o tupu ke aua na maua loa se sakoga ki lona taina.

¹⁰ Na veli ai le nea lena ki mata o le Eteleno, leia na toe fakamate ia loa a ia.

¹¹ Ti na pati loa a Suta ki lona fugao ko Tamale : Ko leinei kua ke nofo toka tasi, toe liliu o nofo i le fale o lou tamana, o talitali ke lasi ake loku vosa ko Sela. Na masau felaaki a ia talie na i a ia na toe mate loa lona vosa ko Sela ofaipe ona taokete. Ti na ano loa Tamale o nofo i le fale o lona tamana.

¹² Na fualoa ai, ti na mate loa le taine o Sua, le avaga o Suta. I le tokamalie loa o le loto o Suta, na pale loa a ia mo lona kau tagata ko Ila, tagata Atulami, ki Timina kia latou ala na koti ia lana kau ovi.

¹³ Na fakasa loa le nea lena kia Tamale, o pati kiate ia : Ko leinei lou tamana kua pale ki Timina, o tuuti lana fului ovi.

¹⁴ Ti na tatala loa e Tamale ona teu fakalokonui, ti na puloui loa e ia ona mata ki se kie, ti na ano loa a ia o tonatona i le matapa o Enaimi, leia na tuu i le ala o Timina ; talie na tio a ia kua lasi a Sela, kae na leaise soli a ia e Suta ke avaga mo Sela.

¹⁵ Na tio loa Suta kia Tamale, ti na pati loa a ia ko se fafine faiaga, talie na puloui e Tamale ona mata.

¹⁶ Ti na ano loa a ia o pati kia Tamale : Tuku mai ke kau natu kiate koe. Na leaise iloa loa e Suta ko lona fugao a ia. Ti na pati loa Tamale kiate ia : Kolea le nea leia e ke soli mai loa kiate au ke ke au ai kiate au ?

¹⁷ Na tali loa Suta : E kau fakamomoli mai loa kiate koe se uviki koti o laku kau manu. Ti na pati loa Tamale : Tuku mai kiate au se fakamaoki o kaku ki le kaku mai o le nea lena.

¹⁸ Na tali loa Suta : Kolea le fakamaoki leia e tonu ke kau tuku atu kiate koe ? Ti na pati loa Tamale : Ko lou mama fakamailoga totonu, mo lou kavei, ti mo le tokotoko lena e ke too i lou lima. Ti na tuku loa e Suta a nea ana kia Tamale, ti na ano loa a Suta kiate ia. Na tinae loa Tamale kia Suta.

¹⁹ Na toe liliu loa Tamale ki lona kaiga ; ti na tatala loa e ia lona pulou, kae na toe tui loa e ia ona teu fakalokonui.

²⁰ Na kakau loa e Suta lona kaukau soa ko Atulami ke ano o ave le uviki koti, ti mo toe aumai a nea fakamaoki ala na tuku ki le fafine. Kae na leaise maua loa e ia le fafine.

²¹ Ti na vesili loa a ia ki le kakai o le ganea lena : Kofea le fafine faiaga leia na tuu i Enaimi, i le ala o Timina ? Ti na lotou tali loa kiate ia : Na leikiaise maua i le fenua leinei se fafine faiaga.

²² Ti na toe liliu loa le tagata kia Suta, o pati : Na leaise kau maua le fafine, ti na pati mai le kakai o le fenua kiate au : Na leikiaise maua i le fenua leinei se fafine faiaga.

²³ Na pati loa Suta : Ke taupau e ia a nea ana ma ana ! E leaise tonu ke katai tatou. Ko leinei, na kau ave le uviki koti, kae na leaise ke maua a ia.

²⁴ Na sili loa ki ai ni masina e tolu, ti na fakasa loa kia Suta : Kua faiaga lou fugao ko Tamale, ti ko leinei kua tinae a ia i lana faiaga. Ti na pati loa Suta : Kotou aumai a ia ke tutu mauli !

²⁵ I le lolotoga o lona ave ki le tua kolo, na pati loa Tamale ke fakasa ki lona tamana ko Suta : Na kau tinae ki le tagata leia o ona a nea anei ; e kau kole atu kiate koe ke ke iloa pe a ai a nea ana, le mama fakamailoga, mo le kavei, ti mo le tokotoko.

²⁶ Na iloa loa e Suta a nea ana, ti na pati loa a ia : E ikiiki ake lana sala iate au, talie na leaise kau soli a ia ki loku vosa ko Sela ! Ti na leaise toe ano loa Suta kia Tamale.

²⁷ I le tatae ki le fanau o Tamale, ko leinei na nofo se masaga i lona manava.

²⁸ I le lolotoga o lana fanau, na sa ake loa ki tafa le lima o se tasi, ti na nonoa loa ki ai e le fafine fai fanau se va kula. Ti na pati loa a ia : Ko ia leinei na uluaki tupu !

²⁹ Kae na toe sau e le toe lona lima, ti na vilo ake loa lona taina ki tafa. Ti na pati loa le fafine fai fanau : Ko le mavaa fea leia na ke ulu mai ai ki tafa ! Ti na soli loa e ia kiate ia le igoa ko Pelesi.

³⁰ Ti na vilo ake loa ki tafa lona taina, leia na nonoa lona lima ki le va kula, ti na soli loa kiate ia le igoa ko Selake.