Senesi 37 - Tosi Tapu

Fakatau o Sosefo e ona fetaina

¹ Na nofo loa Sakopo i le fenua o Kanaane, leia na nofo fakatemi ai lona tamana.

² Ko leinei le sakoga o Sakopo. Na fetuu kau agafulu tupu fitu Sosefo, ti na tausi e ia le kau manu o lona tamana, o fakatasi mo ona fetaina ; ti na nofo le fanau lena mo vosa o Pila ti mo vosa o Silipa, ko tinifu o lona tamana. Ti na fakasa e Sosefo ki lolatou tamana alatou masau veli.

³ Na alofa Iselaele kia Sosefo o lasi ake i ona vosa fuli, o tupu na maua e ia a ia i lona matua ; ti na fai loa e ia se kofu lanu kesekese kiate ia.

⁴ Na tio loa ona fetaina na alofa lasi ake lolatou tamana kia Sosefo ia latou fuli, ti na lotou vesia loa kiate ia. Na leaise feala ke lotou masau malie kiate ia.

Moemiti a Sosefo

⁵ Na fai loa e Sosefo se moe miti, ti na fakamatala loa e ia a ia ki ona fetaina, ala na toe asilisili vesia loa kiate ia.

⁶ Na pati loa a ia kia latou : Ke kotou fakalogo mai ki le moe miti leinei kua kau fai !

⁷ Na tou lolotoga sai a fuiga fulumeto i faisaga ; ti ko leinei, na malaga ake loa laku fuiga fulumeto, o tuu fakasako ki aluga, ti na nake loa akoutou fuiga fulumeto o takatakai a ia, ti na lotou punou loa kiate ia.

⁸ Na pati loa ona fetaina kiate ia : Pe maoki e ke pule loa kia matou ? Pe ke lagiaki loa kia matou ? Ti na lotou toe asilisili vesia loa kiate ia o tupu ko ana moe miti mo ana masau.

⁹ Na toe fai foki e ia se tasi moe miti, ti na toe fakamatala loa e ia ki ona fetaina. Na pati loa a ia : Na kau toe fai foki se tasi moe miti : Na kau tio ki le laa, mo le masina, ti mo fetuu e kau agafulu tupu tasi, na tulolo i oku mua.

¹⁰ Ti na fakamatala loa e ia lana moe miti ki lona tamana mo ona fetaina. Ti na valoki loa a ia e lona tamana, o pati : Kolea le uiga o le moe miti lena kua ke fai ? Pe tonu loa ke motou au, a au ko lou tamana, mo lou tinana, ti mo ou fetaina fuli, o punou ki le kele i ou mua ?

¹¹ Na finenonofo loa ona fetaina kiate ia, kae na taupau loa e lona tamana a nea ana i lona loto.

¹² Na ano loa fetaina o Sosefo ki Siseme, o fagai ai le kau manu o lolatou tamana.

¹³ Ti na pati loa Iselaele kia Sosefo : Pe leaise fagai e ou fetaina le kau manu i Siseme ? Au, talie e kau loto ke ke ano kia latou. Ti na tali loa a ia, ko leinei au !

¹⁴ Na pati loa Iselaele kiate ia : E kau kole atu kiate koe ke ke ano o fakatele ki ou fetaina, o tio pe lotou malolo mo le kau manu ; ti ke au loa mo ni logo kiate au. Ti na kakau loa e Sakopo lona vosa ko Sosefo mei le vaivailiua o Epelone ; ti na ano loa Sosefo ki Siseme.

¹⁵ Na felavei loa se tagata mo ia i lana foli i faisaga, ti na vesili loa le tagata kiate ia : Kolea e ke afa ?

¹⁶ Na tali loa Sosefo : E kau afa oku fetaina. E kau kole atu kiate koe ke ke fakasa mai kiate au le ganea leia e lotou fagai ai a manu.

¹⁷ Ti na pati loa le tagata kiate ia : Kua lotou mavae i leinei, talie na kau logo ki lalatou pati : Tou ano ki Totane ! Ti na ano loa Sosefo o afa ona fetaina, ti na maua loa e ia latou i Totane.

¹⁸ Na lotou tio loa kiate ia mei mamao, kae i mua o lana kaku ake kia latou, na lotou fonofono loa ke tamate a ia.

¹⁹ Na lotou fepatiaki loa : Ko leinei le tagata fai moe miti e au kia tatou !

²⁰ Kotou au i le temi nei, tou tamate a ia, ti tou ti loa a ia ki se sosoni i sosoni anei. E tou pati loa kua kai a ia e se manu fekai, ti e tou tio loa pe iku feaki loa ana moe miti.

²¹ Na logo loa Lupeni ki le nea lena, ti na fakapapau loa a ia ke saofaki e ia Sosefo mei lima o ona fetaina. Na pati loa a ia : Aua na tou tamate a ia.

²² Ti na toe pati loa Lupeni kia latou : Aua na kotou liligi le toto ; kotou ti a ia ki le sosoni leinei i le toafa, kae aua na fafa okoutou lima kiate ia. Na masau felaaki loa a ia talie kua fakatuutuu e ia ke saofaki e ia Sosefo mei lima o ona fetaina, o toe fakaliliu a ia ki lona tamana.

²³ I le tau ake fai a Sosefo ki ona fetaina, na lotou tatala loa lona kofu, le kofu lanu kesekese leia na kofu e ia.

²⁴ Ti na lotou ti loa a ia ki le sosoni. Na masa le sosoni lena, ti na leaise se vai i ai.

²⁵ Na lotou tonatona loa ki lalo o kai. Na lotou tio loa ki se fanoga a se kau Isemaele. Na lotou au mei Kalaate, ti na lotou ano ki Esipito. Na amo e alatou kamelo ni laakau fakamanogi, mo ni kaloni, mo se mila.

²⁶ Ti na pati loa a Suta ki ona fetaina : Kolea sona aoga kia tatou o latatou tamate lotatou taina, mo latatou fufu lona toto ?

²⁷ Kotou au, ti tou fakatau a ia ki le kau Isemaele, kae aua na fafa otou lima kiate ia, talie ko lotatou taina a ia, ko lotatou tino. Ti na fakalogo loa ona fetaina kiate ia.

Fakatau o Sosefo ke ave ki Esipito

²⁸ I le kaku ake o le kau o Matiane kia latou, na lotou toso ake loa Sosefo mei le sosoni ki tafa, ti na lotou fakatau loa a ia o kau lua sikele paaga ki le kau Isemaele, ala na ave ia loa Sosefo ki Esipito.

²⁹ Na toe liliu loa Lupeni ki le sosoni ; ti ko leinei, kua puli Sosefo i le sosoni. Ti na sae loa e ia ona kofu.

³⁰ Ti na ano loa a ia ki ona fetaina o pati kia latou : Kua puli le toe ! Ti ko au, e kau ano loa kifea ?

³¹ Na lotou too loa le kofu o Sosefo ; ti na lotou tamate loa se koti tagata, ti na lotou ukui loa le kofu ki le toto.

³² Ti na lotou fakamomoli loa ki lolatou tamana le kofu lanu kesekese, o pati kiate ia : Ko leinei le nea leia na motou maua ! Tio pe leaise ko le kofu a ia o lou vosa.

³³ Na iloa loa e Sakopo le kofu, ti na tagi loa a ia, o pati : Ko le kofu a ia o loku vosa ! Kua kai a ia e se manu fekai !

³⁴ Ti na sae loa e Sakopo ona kofu, kae tui loa e ia se taga, ti na tagi loa a ia ki lona vosa i se temi fualoa ai.

³⁵ Ti na nake loa ona vosa fuli mo ona taineliki fuli o fakapelepelei a ia, kae na leaise tali loa e ia se fakafimalie e tasi. Na pati loa a ia : E kau tagi loa ki loku vosa o kaku ki le aso leia e kau fakatasi ai loa mo loku vosa i le nofoaga o le kau mate ! Ti na tagi a ia ki lona vosa.

³⁶ Na fakatau loa e le kau Matiane a Sosefo i Esipito kia Potifale, ko le ofisa a Falaone, ko le pule o le kau leo.