Senesi 35 - Tosi Tapu

Toe liliu a Sakopo ki Petele

¹ Na pati loa le Atua kia Sakopo : Tuu ki aluga, o pale ki Petele, ti ke nofo i ai. E ke fakatuu loa i ai se aletale ki le Atua, leia na sa kiate koe i lau sola mei lou taina ko Esau.

² Ti na pati loa Sakopo ki lona famili, mo latou fuli ala na nonofo mo ia : Kotou too ia koutou a atua kese fuli ala e maua ia koutou, ti kotou fakamea mo fetogi okoutou kofu.

³ E tou tutuu loa ki aluga, ti e tou pale loa ki Petele. E kau fakatuu loa i ai se aletale ki le Atua, leia na tali ia laku kole i le aso o loku mamae, ti na nofo mo au i ala na kau fanoga ai.

⁴ Na lotou tuku loa kia Sakopo a atua kese fuli ala na maua ia latou, mo sau ala na piki i olatou taliga. Ti na tanu loa e Sakopo a nea ana i lalo o le laakau lasi leia e ofi ki Siseme.

⁵ Ti na lotou ano loa. Na mafola loa le i ki le Atua i kolo fuli ala na ofi kia latou, ti na leaise tuli loa e se tasi a vosa o Sakopo.

⁶ Na kaku loa Sakopo mo latou fuli ala na ano mo ia ki Lusi, leia ko Petele, i le fenua o Kanaane.

⁷ Ti na fakatuu loa e ia i ai se aletale, ti na tuku loa e ia le igoa ko Ele-Petele ki le ganea lena ; talie ko le ganea lena leia na sa ai le Atua kiate ia i lana sola mei lona taina.

⁸ Na mate loa Tepola, le fafine tausi o Lepeka, ti na tanu loa a ia o ofi ki Petele, i lalo o le sene, leia na soli loa ki ai le igoa ko le sene o tagi.

⁹ Na toe sa loa le Atua kia Sakopo, i lana liliu mei Patane-Alame, ti na tapuaki loa a ia kiate ia.

¹⁰ Ti na pati loa le Atua kiate ia : Ko lou igoa ko Sakopo. E leaise toe igoa loa a koe ko Sakopo, kae e igoa loa a koe ko Iselaele. Ti na soli loa e le Atua kiate ia le igoa ko Iselaele.

¹¹ Ti na pati loa le Atua kiate ia : Ko au ko le Atua Mafimafi. Ke ke fanaunau, mo ke liuliuga : E tupu loa meiate koe se puleaga, mo ni puleaga lasi ai, ti e ulu loa ni sau mei ou ifiifi.

¹² E kau soli loa kiate koe le fenua leia na kau soli kia Apalaamo mo Isaake, ti e kau soli loa le fenua leinei ki lou sakoga ki muli.

¹³ Na malaga loa le Atua o pale ki lagi i le ganea lena na masau ai a ia kia Sakopo.

¹⁴ Ti na fakatuu loa e Sakopo se fatu fakamaoki i le ganea lena na masau ai le Atua kiate ia. Ti na liligi loa e ia ki aluga o le fatu se vino mo se lolo, o fakatapui ai le fatu.

¹⁵ Na soli loa e Sakopo le igoa ko Petele, fale o le Atua, ki le ganea lena na masau ai le Atua kiate ia.

Tupu o Pesamino ; mate o Lasele

¹⁶ Na lotou mavae loa i Petele ; ti na lotou kaku loa ki se ganea na ofi ki Efalata, ti na mamae loa le ganea o Lasele. Na faigataa loa le fanau a Lasele.

¹⁷ I le lolotoga o mamae o le fanauga, na pati loa le fafine fai fanau kiate ia : Ke aua na ke i, talie kua ke toe maua ia se tasi a vosa !

¹⁸ I le meimeiki ke mavae lona laumalie, talie kua lolotoga mate loa a ia, na soli loa e ia ki lona tama le igoa ko Pene-Oni (ko lona uiga : vosa o le mamae) ; kae na soli loa e le tamana ki le toe le igoa ko Pesamino, (ko lona uiga : vosa o loku lima atamai).

¹⁹ Na mate loa Lasele, ti na tanu loa a ia i le ala o Efalata, leia ko Peteleemi.

²⁰ Na fakatuu loa e Sakopo se fatu i lona tanuma ; ko le fatu fakamanatu a ia o le tanuma o Lasele, leia koi tuu i le aso nei.

Agasala o Lupeni

²¹ Na mavae loa Iselaele i ai ; ti na fakatuu loa e ia lona falela i leia atu fetuu o le mauga ko Miketale-Etele.

²² I le nofo a Iselaele i le fenua lena, na ano loa Lupeni o momoe mo Pila, ko le avaga o lona tamana. Ti na iloa loa e Iselaele le nea lena, ti na mamae ai lona loto. Ko vosa o Sakopo na tino agafulu tupu lua.

²³ Ko vosa ia Lea : Ko le uluaki o Sakopo ko Lupeni, mo Simeone, mo Levi, mo Suta, mo Isakale, mo Sapulone.

²⁴ Ko vosa ia Lasele : Ko Sosefo mo Pesamino.

²⁵ Ko vosa ia Pila, ko le fafine fakasausau a Lasele : Ko Tane mo Nefetali.

²⁶ Ko vosa ia Silipa, ko le fafine fakasausau a Lea : Ko Kate mo Asele. Ko vosa ana o Sakopo, ala na tupu kiate ia i Patane-Alame.

Mate o Isaake

²⁷ Na kaku loa Sakopo ki lona tamana ko Isaake i Mamele, ofi ki Kiliate-Alepa, leia kua igoa i le temi nei ko Epelone, ganea leia na nofo ai foki Apalaamo mo Isaake.

²⁸ Ko le lasi o fetuu o Isaake ko le kau lelau kau valu fetuu.

²⁹ Na tuku loa e Isaake lona laumalie, ti na mate loa a ia, ti na fakatasi loa a ia ki lona kakai, kua matua ai ti kua makona i aso. Na tanu loa a ia e ona vosa ko Esau mo Sakopo.