Senesi 32 - Tosi Tapu

Teuteu a Sakopo ke felavei mo Esau

¹ Na ano loa Sakopo i lona ala ; ti na fakafetaulaki loa kiate ia ni aselo o le Atua.

² I lana tio kia latou, na pati loa Sakopo : Ko le kau tau a le Atua ! Ti na soli loa e ia ki le ganea lena le igoa ko Maanaimi.

³ Na kakau loa e Sakopo ni tagata avelogo ke muamua iate ia ki lona taina ko Esau, i le fenua ko Seili, leia e kau ki Etome.

⁴ Na tuku loa e ia kia latou le fakatotonu leinei : Ko leinei le nea leia ke kotou fakasa loa ki loku aliki ko Esau : E masau feneeki mai kiate koe lau tagata fakasausau ko Sakopo : Na kau nofo i le fale o Lapane o kaku mai ki le aso nei ;

⁵ Kua kau maua ni aku kau pipi, mo ni kau asino, mo ni kau ovi, mo ni kau tagata fakasausau, mo ni kau fafine fakasausau ; ti e kau kakau atu kiate koe ni tagata avelogo ke fakasa ki loku aliki le nea lena, o tupu ke ke tali malie lau tagata fakasausau.

⁶ Na toe liliu ake loa a tagata avelogo kia Sakopo, o pati : Na motou ano o fakafelavei ki lou taina ko Esau ; ti ko leinei kua saele mai a ia kiate koe mo tagata e tino lelau fa.

⁷ Na i loa Sakopo, o mamae lasi ai. Na vaelua loa e ia le kakai leia na nofo mo ia, mo ovi, mo pipi, mo kamelo, i ni nofolaga e lua.

⁸ Talie na pati loa a ia : Kapau e au loa Esau, o tamate se tasi nofolaga, ti e feala loa ke sola le tasi nofolaga.

⁹ Na faikole loa Sakopo, o pati : Atua o loku tamana ko Apalaamo, Atua o loku tamana ko Isaake, Eteleno leia na pati mai kiate au : Toe liliu ki lou fenua mo lou ganea tupu, ti e kau fai loa kiate koe le nea malie.

¹⁰ Eteleno, e leaise kau gali mo kalasia fuli ala na ke tuku mai kiate au, mo lou agatonu katoa kiate au ko lau tagata fakasausau ; talie na kau fakalaka i le Solotane leinei mo loku tokotoko, ti ko leinei kua kau nofo mo ni nofolaga e lua i le aso nei.

¹¹ E kau kole atu kiate koe, ke ke fakamauli au mei loku taina ko Esau, talie e kau i kiate ia, ti e kau mamae na au loa a ia o tamate au, mo fafine, mo toe.

¹² Ti ko koe, na ke pati mai kiate au : E kau fai loa kiate koe le nea malie, ti e kau fakaliliu loa lou sakoga ke tatau mo le one o le tai, leia e leaise feala ke lau.

¹³ Na nofo loa Sakopo i le pouli i le ganea lena. Na filifili loa e ia i nea ala na ofi kiate ia se moliga ki lona taina ko Esau :

¹⁴ Ko koti fafine e kau lelau lua, mo koti tagata e kau lua, mo ovi fafine e kau lelau lua, mo ovi tagata e kau lua,

¹⁵ mo kamelo fafine e kau tolu ti mo olatou uviki ala e fakau, mo pipi fafine e kau fa, mo pipi tagata e kau agafulu, mo asino fafine e kau lua, mo asino tagata e kau agafulu.

¹⁶ Na tuku loa e ia a kau manu ana ki ana tagata fakasausau, o fakamavaevae latou i olatou faasiga, ti na pati loa a ia kia latou : Ke kotou ano i oku mua, ti ke kotou tuku se vasa i leia kau manu mo leia kau manu.

¹⁷ Ti na tuku loa e ia le fakatotonu leinei ki le tagata fakasausau leia na ano i mua : Ka felavei loa loku taina ko Esau mo koe, ti ka vesili atu loa a ia : Pe ko ai lou pule ? Pe ke ano kifea ? Pe a ai le kau manu lena e saele i ou mua ?

¹⁸ Ti ke tali loa kiate ia : A lau tagata fakasausau ko Sakopo ; ko se moliga leia na fakamomoli mai e ia ki lona aliki ko Esau. Ti ko leinei a ia totonu e au i omatou muli.

¹⁹ Na toe tuku loa e ia le fakatotonu lena ki le lua, mo le tolu, ti mo latou fuli ala na muli i kau manu : Ko lena le nea leia e tonu ke kotou fakasa kia Esau mo ka kotou felavei loa mo ia.

²⁰ Ti e kotou toe pati loa : Ko leinei lau tagata fakasausau ko Sakopo e au i omatou muli. Talie na pati loa Sakopo : E kau fakafimalie loa lona loto ki le moliga lena e ave i oku mua. Ti ka kau tio loa ki ona mata, e lagi tali malie loa e ia au.

²¹ Ti na fakamuamua loa e ia le moliga ; kae na nofo loa a ia i le po lena i le nofolaga.

²² Na tuu ake loa a ia i le po lena o too ana avaga e toka lua, mo ana fafine fakasausau e toka lua, ti mo ona toe e kau agafulu tupu tasi, ti na fakalaka loa e ia latou i le liua ko Sapoke.

²³ Na too loa e ia latou, ti na pati loa a ia ke lotou fakalaka i le vaitafe, mo nea fuli ala na maua e ia.

Sakopo i Peniele

²⁴ Na nofo toka tasi loa Sakopo. Ti na fepoko loa se tagata mo ia o kaku ki le mafoata.

²⁵ I le tio a le tagata na leaise makeke a ia iate ia, na tai loa e ia Sakopo i le sokoga o lona kauaga ; ti na maui loa le sokoga o le kauaga o Sakopo i lana poko mo le tagata lena.

²⁶ Ti na pati loa le tagata : Tuku mai au ke kau ano, talie kua malama le mafoata. Na tali loa Sakopo : E leaise kau tuku loa a koe ke ke ano, kae e leikiaise ke tapuaki mai kiate au.

²⁷ Ti na pati loa le tagata kiate ia : Ko ai lou igoa ? Ti na tali loa a ia : Ko Sakopo.

²⁸ Ti na toe pati loa le tagata : E leaise toe igoa loa a koe ko Sakopo, kae e ke igoa loa ko Iselaele ; talie na ke poko mo le Atua ti mo ni tagata, ti kua ke malo.

²⁹ Ti na vesili loa Sakopo kiate ia : E kau kole atu kiate koe, fakasa mai kiate au lou igoa. Na tali loa le tagata : Kolea e ke afa mai ai loku igoa ? Ti na tapuaki loa a ia kia Sakopo i le ganea lena.

³⁰ Na soli loa e Sakopo le igoa ko Peniele ki le ganea lena ; talie na pati a ia : Kua kau tio mata ki le Atua, ti na fakamauli loa e ia loku mauli.

³¹ Na sopo loa le laa, i le temi leia na fakalaka ai loa Sakopo i Peniele. Na kito Sakopo o tupu ko lona kauaga.

³² Koia leia e leaise kai ai e fanau o Iselaele o kaku mai ki aso anei le kanomate o le tega, leia e pipiki ki le sokoga o le kauaga, talie na taai e le Atua a Sakopo i le sokoga o lona kauaga.