Senesi 31 - Tosi Tapu

Toe liliu a Sakopo ki Kanaane

¹ Na logo loa Sakopo ki masau o vosa o Lapane, ala na pati : Kua too e Sakopo a nea fuli o lotatou tamana, ti kua fakatupu e ia lona koloa fuli ki nea o lotatou tamana.

² Na fakatokagai foki e Sakopo a mata o Lapane, na leaise koi tatau lana tio kiate ia pe mua.

³ Koia na pati ai loa le Eteleno kia Sakopo : Toe liliu ki le fenua o ou tamana, ti mo le ganea leia na ke tupu ai, ti e kau nofo loa mo koe.

⁴ Na kalagai loa e Sakopo a Lasele mo Lea ala na nonofo i faisaga i tafa o lana kau manu liliki.

⁵ Ti na pati loa a ia kia laua : E kau tio i mata o lokoulua tamana e leaise koi tatau a ia kiate au mo mua ; kae na kau mo au le Atua o loku tamana.

⁶ E kolua iloa malie na kau gaoi ki lokoulua tamana i loku makeke katoa.

⁷ Ti na kakai au e lokoulua tamana, o fetogi tua kau agafulu e ia loku totogi ; kae na leaise fakataga e le Atua ke fai e ia se nea veli kiate au.

⁸ Ka pati a ia : Ko lou totogi loa ko ovi pulepule, ti na fanaui loa e ovi fafine ni uviki pulepule. Ti ka pati a ia : Ko lou totogi loa ko ovi sikasika, ti na fanaui loa e ovi fafine fuli ni uviki sikasika.

⁹ Kua too e le Atua mei lokoulua tamana lana kau manu, o soli mai kiate au.

¹⁰ Na kau moe miti ti na kau tio ki ovi tagata ala na ano ki ovi fafine, na lotou pulepule mo ilaila ti mo safesafe.

¹¹ Ti na pati mai loa le aselo o le Atua kiate au i le moe : Sakopo ! Na kau tali : Ko leinei au !

¹² Na pati loa a ia : Tio ou mata : E pulepule mo safesafe a ovi tagata fuli ana na ano ki ovi fafine ; talie na kau tio ki nea fuli ala na fai e Lapane kiate koe.

¹³ Ko le Atua au o Petele, le ganea leia na ke pani lolo ai se fatu fakamanatu, leia na ke fai ai se fakapapau. I le aso nei, ke ke tuu ki aluga, ti ke mavae i le fenua leinei, o toe liliu ki le fenua leia na ke tupu ai.

¹⁴ Na tali loa Lasele mo Lea kiate ia : Pe koi ma maua se vaega pe ko se tofiga i le fale o loma tamana ?

¹⁵ Pe na leaise tio a ia kia maua ofaipe ni fafine matapule, o tupu ai lana fakatau maua, kae kai loa e ia lona paaga ?

¹⁶ Koia kua ma maua ai le koloa fuli leia kua too e le Atua mei loma tamana, e maua mo ama fanau. Fai i le aso nei a nea fuli ala e fakasa atu e le Atua kiate koe.

¹⁷ Na tuu ake loa Sakopo ki aluga, o fakaeke ana fanau mo ana avaga ki ni kamelo.

¹⁸ Ti na ave loa e ia lana kau manu katoa mo ana nea fuli ala na maua e ia, ala na gaoi ki ai i Patane-Alame ; ti na ano loa a ia ki lona tamana ko Isaake i le fenua o Kanaane.

¹⁹ I le temi lena na ano Lapane o koti lana kau manu. Na kaia loa e Lasele a taulaatua o lona tamana.

²⁰ Na kakai loa e Sakopo a Lapane, le tagata Alami, talie na sola fakafufu a ia kae na leaise fakasa e ia kiate ia.

²¹ Na sola loa a ia mo nea fuli ala na maua e ia ; na tuu loa a ia o ano, ti na fakalaka loa a ia i le vaitafe o fakaagaaga ki le mauga o Kalate.

Tuli o Sakopo e Lapane

²² I le tolu o aso, na fakasa loa kia Lapane kua sola Sakopo.

²³ Na too loa e Lapane ona fetaina, ti na lotou kapu loa Sakopo i aso e fitu, ti na maua loa e ia a ia ki le mauga o Kalaate.

²⁴ Kae na sa loa le Atua i le pouli i se moe miti kia Lapane, le tagata Alame, o pati kiate ia : Aua na ke masau loa kia Sakopo i se nea malie pe ko se nea veli !

²⁵ Na kaku loa Lapane kia Sakopo. Na fakatuu loa e Sakopo lona falela i le mauga o Kalaate.

²⁶ Ti na pati loa Lapane kia Sakopo : Kolea na ke fai ? Kolea na ke kakai ai au, o ke ave oku taineliki ofaipe ni fafine popula ?

²⁷ Kolea na ke sola fakafufu ai, ti na ke kakai ai au ? Kolea na leaise ke fakasa mai ai kiate au ? Na kau tuku loa a koe ke ke ano i loto malie o ni fakafiafia mo ni sua, i le musika o le fa nafa mo le alepe ?

²⁸ Na leaise ke fakataga fua ke kau sogi ki oku makopuna mo oku taineliki ! Na ke fai se nea fakavale !

²⁹ E makeke feauga loku lima ke kau fai ia kiate koe se nea veli ; kae na pati mai kiate au le Atua o lokoutou tamana i le aso nanafi : Aua na ke masau loa kia Sakopo i se nea malie pe ko se nea veli !

³⁰ Ko leinei, kua ke ano talie kua ke mamae ki le fale o lou tamana, kolea na ke kaia ai oku atua ?

³¹ Na tali loa Sakopo kia Lapane : Na kau i, ti na kau manatu : e lagi ke too loa ou taineliki.

³² Kae ke mate leia e ke maua ai loa ou atua ! I mua o ota fetaina, afa i loku fale katoa au nea fuli, ti ke too latou. Na leaise iloa e Sakopo na kaia latou e Lasele.

³³ Na ulu loa Lapane ki le falela o Sakopo, mo le falela o Lea, ti mo le falela o fafine fakasausau, ti na leaise maua loa e ia se nea. Na mavae loa a ia i le falela o Lea, o toe ulu ki le falela o Lasele.

³⁴ Kae na too loa e Lasele a atua, o tatao i lalo o le ekeekeaga kamelo ti na tonatona loa a ia i aluga. Na sufe loa e Lapane le falela katoa, kae na leaise maua loa e ia se nea.

³⁵ Ti na pati loa Lasele ki lona tamana : Ke aua na ke ita, ei loku tamana, mo kapau e ke tio e leaise kau tuu ki aluga i ou mua, talie e kau maua le nea leia e soko masani ki fafine. Na fai loa e Lapane lana afa, kae na leaise maua loa e ia a atua.

³⁶ Na ita loa Sakopo, o masau fakaveli kia Lapane. Na pati loa a ia : Kolea laku sala, kolea laku agasala, ke ke afa fakamakeke ai au ?

³⁷ Kua ke sufe aku nea fuli. Pe na ke maua se nea fua e tasi o lou fale ? Ke ke fakasa mai a ia ki oku fetaina mo ou fetaina, ti ke lotou fakamaau loa taua.

³⁸ Ko leinei kua fetuu kau lua laku nofo i lou fale ; na leaise vilo fua se tinae o au ovi fafine mo au koti fafine, ti na leaise kau kai fua se ovi tagata o lau kau manu.

³⁹ Na leaise kau aumai fua kiate koe i se aso se manu na tamate e se manu fekai, ti na kau totogi kiate koe a nea fuli na puli. Na ke fakaala mai kiate au a manu fuli na kaia, tatau fai pe na kaia i le ao pe ko le pouli.

⁴⁰ Na kau tali le mamae o le vevela o le laa i le ao, mo le momoko i le pouli, ti na sola mamao le fia moe i oku mata.

⁴¹ Ko leinei kua fetuu kau lua laku nofo i lou kaiga ; na kau gaoi kiate koe i fetuu e kau agafulu tupu fa ke totogi ai ou taineliki e toka lua, ti mo fetuu e ono ke totogi ai laku kau manu, kae ko koe, na ke fetogi tua kau agafulu loku totogi.

⁴² Kanapau na leaise tokoi mai le Atua o loku tamana ko Apalaamo kiate au, le Atua leia e i ki ai loku tamana ko Isaake, na ke aga loa o kapu au mo oku lima ata. Kae na tio le Atua ki loku mamae mo le pakia o oku lima i le gaoi ; koia i le aso nanafi na fakasa e ia lona faitotonu kiate au.

⁴³ Na tali loa Lapane kia Sakopo : Ko taineliki ana ko oku taineliki, ko olatou fanau ko oku fanau, ko manu ana ko aku kau manu, ti ko nea fuli e ke tio ki ai ko aku nea. Kae kolea e feala ke kau fai i le aso nei ki oku taineliki mo oku fanau ala kua lotou fanaui ki le malama nei ?

⁴⁴ Au, ta fai se sai, e koe mo au, ti ke tuu loa le nea lena ko se fakamaoki i lota vasaa.

⁴⁵ Na too loa e Sakopo se fatu, ti na fakatuu loa e ia le fatu lena ko se fakamanatu.

⁴⁶ Ti na pati loa Sakopo ki ona fetaina ke lotou tanaki ake ni fatu. Na lotou tae ake loa ni fatu, o lotou tanaki fakatuuga loa latou. Ti na lotou kakai fuli loa i aluga o le tuuga fatu lena.

⁴⁷ Na fakaigoa loa e Lapane le ganea lena ko Sekale-Saatuta, ti na fakaigoa loa a ia e Sakopo ko Kaleti.

⁴⁸ Na pati loa Lapane : Ke tuu le tuuga fatu leinei ko se fakamaoki iate au mo koe ! Ko le tupuaga lena o lona igoa ko Kaleti, ko lona uiga : tuuga fatu o le fakamaoki.

⁴⁹ Na toe soli foki ki ai le igoa ko Misipa, ko lona uiga : tuuaga o leia e leoleo, talie na pati Lapane : Ke leoleo le Eteleno kiate koe mo au, i le temi leia e leaise ta toe fetioaki ai loa.

⁵⁰ Kapau e ke fakavelivelii loa oku taineliki, kapau e ke toe avaga loa mo ni iki ake fafine, tokaga ai talie e leaise ko se tagata leia e fakamaoki ia taua, kae ko le Atua totonu.

⁵¹ Ti na pati loa Lapane kia Sakopo : Tio ki le tuuga fatu leinei, mo le fatu leia kua kau fakatuu i lota vasaa.

⁵² E tuu loa le tuuga fatu lena mo le fatu lena ko ni fakamaoki kia taua : E leaise kau toe fakalaka loa i le tuuga fatu leinei ki lou fetuu, ti e leaise ke toe fakalaka mai loa i le tuuga fatu lena mo le fatu lena ki loku fetuu, o fai se nea leia e veli.

⁵³ Ke tuu le Atua o Apalaamo mo Nakole ko le tui fakamaau ia taua. Na fakapapau loa Sakopo i le suafa o le Atua leia na i ki ai Isaake.

⁵⁴ Ti na momoli loa e Sakopo se sakilifisio i le mauga, ti na fakaafe loa e ia ona fetaina ki se kaitasi. Na lotou kai loa, ti na lotou momoe loa i le mauga i le po lena.

⁵⁵ Ti na tuu ake loa Lapane i le usu koi mafoata, o sogi ki ona vosa mo ona taineliki, ti na tapuaki loa a ia kia latou. Ti na mavae loa a ia, o toe liliu ki lona kaiga.