Senesi 30 - Tosi Tapu

¹ Na tio loa Lasele na leaise maua e ia ni fanau kia Sakopo, ti na finenonofo loa a ia ki lona taina, o pati loa a ia kia Sakopo : Soli mai kiate au ni fanau, pe kau mate !

² Na ita loa Sakopo kia Lasele, o pati : Pe ko le Atua au, leia na tapono ia a koe ke aua na ke fanaunau ?

³ Ti na pati loa Lasele : Ko leinei laku fafine kaunaga ko Pila ; ano ki ai, ti ke fanau a ia i oku tuli ke kau maua foki ni vosa meiate ia.

⁴ Ti na tuku loa e Lasele lana fafine fakasausau ko Pila ke avaga mo ia, ti na ano loa Sakopo kia Pila.

⁵ Na tinae loa a Pila, ti na fanaui loa e ia se tama kia Sakopo.

⁶ Na pati loa Lasele : Kua tuku mai e le Atua kiate au lana faitotonu, talie kua logo a ia ki loku leo, ti kua soli mai e ia se vosa kiate au. Ti na fakaigoa loa e ia le toe ko Tane.

⁷ Na toe tinae loa a Pila, fafine fakasausau a Lasele, ti na fanaui loa e ia kia Sakopo se tasi a tama.

⁸ Na pati loa Lasele : Na kau tau i mua o le Atua ki loku taina, ti kua kau malo. Ti na fakaigoa loa e ia le toe ko Nefetali.

⁹ Na tio loa a Lea kua gato lana fanaunau, ti na too loa e ia lana fafine fakasausau ko Silipa, o soli ke toe avaga mo Sakopo.

¹⁰ Ti na fanaui loa e Silipa, fafine fakasausau a Lea, se vosa kia Sakopo.

¹¹ Na pati loa a Lea : Oi se manuia ! Ti na soli loa e ia ki lona tama le igoa ko Kate.

¹² Na toe fanaui loa e Silipa, fafine fakasausau a Lea, se tasi a vosa kia Sakopo.

¹³ Na pati loa a Lea : Kua lasi ai loku manuia ! Talie e pati loa a taineliki kiate au : e kau manuia ! Ti na soli loa e ia ki lona tama le igoa ko Asele.

¹⁴ Na ano loa Lupeni i le temi tuuti o le fulumeto, ti na maua loa e ia ni fuai laakau ko le matakole i faisaga. Ti na aumai loa e ia latou ki lona tinana ko Lea. Ti na pati loa Lasele kia Lea : E kau kole atu kiate koe ke ke soli mai kiate au ni fuai laakau mei fuai laakau o lou tama.

¹⁵ Na tali loa a Lea kiate ia : Pe leaise feauga kiate koe lau too loku avaga ? Pe ke loto foki ke ke toe too mo matakole o loku tama ? Ti na pati loa Lasele : E malie ! E momoe loa Sakopo mo koe i le po leinei ke totogi ai a matakole o lou tama.

¹⁶ I le afiafi, na liliu ake loa Sakopo i faisaga, ti na ano loa a Lea o fakafelavei kiate ia, o pati : E ke au loa kiate au, talie kua kau totogi a koe ki ni matakole o loku tama. Ti na la momoe loa i le po lena.

¹⁷ Na tali loa e le Atua le tagi a Lea, ti na toe tinae loa a ia, ti na fanaui loa e ia se tasi a vosa kia Sakopo, ko lona lima a ia.

¹⁸ Na pati loa a Lea : Kua soli e le Atua kiate au loku totogi talie na kau soli laku fafine fakasausau ki loku avaga. Ti na soli loa e ia le igoa ko Isakale ki lona tama.

¹⁹ Na toe tinae loa a Lea, ti na toe fanaui loa e ia se tasi a tama kia Sakopo, ko lona ono a ia.

²⁰ Na pati loa a Lea : Kua soli mai e le Atua kiate au se koloa fulumalie, i le faiaga leinei, e nofo loa loku avaga mo au, talie kua kau fanaui kiate ia ni vosa e toka ono. Ti na fakaigoa loa e ia ko Sapulone.

²¹ Na toe fanaui foki e Lea se taine, ti na soli loa e ia kiate ia le igoa ko Tina.

²² Na manatui loa e le Atua a Lasele, ti na tali loa e ia lana kole, o fakafanaunau loa a ia.

²³ Na tinae loa Lasele, ti na fanaui loa e ia se tama, ti na pati loa a ia : Kua too e le Atua loku luma.

²⁴ Ti na soli loa e ia le igoa ko Sosefo ki lona tama, o pati : Ke toe soli mai e le Atua kiate au se tasi a vosa !

Fakamou koloa o Sakopo e le Atua

²⁵ I le oki o le fanaui e Lasele o lona tama ko Sosefo, na pati loa Sakopo kia Lapane : Tuku mai la ke kau ano, ke kau toe liliu ki loku kaiga, ki loku fenua.

²⁶ Tuku mai ke kau ano mo oku avaga ti mo aku fanau, ala na kau gaoi ki ai i lou fale ; talie e ke iloa le lasi o le gaoi na kau fai kiate koe.

²⁷ Na pati loa Lapane kiate ia : Kapau e ke alofa kiate au, ti ke nofo i leinei. E kau iloa malie na tapuaki le Atua kiate au o tupu ko koe ;

²⁸ Fakasa mai kiate au le lasi o lou totogi, ti e kau soli atu loa a ia kiate koe.

²⁹ Na pati loa Sakopo kiate ia : E ke iloa le lasi o laku gaoi kiate koe, ti mo le lasi o lau kau manu i laku tausi ki ai ;

³⁰ talie kua tupu lasi ai le ga nea noa leia na ke maua i mua o laku kaku mai kiate koe ; ti kua tapuaki le Eteleno kiate koe i le aso leia na ulu ai oku vae i lou fale. Pe leaise ko le temi leinei e tonu ke kau gaoi ai ki loku famili totonu ?

³¹ Na pati loa Lapane : Kolea le totogi leia e tonu ke kau soli kiate koe ? Ti na tali loa Sakopo : E leaise ke soli mai loa kiate au se nea fua e tasi. Kae kapau e ke loto malie ki le nea leinei e kau pati atu loa ki ai, e kau toe fagai loa lau kau manu, ti e kau toe taupau loa a ia.

³² I le aso nei, e kau ano loa o fakatele ki lau kau manu katoa ; Ti e kau vaei kese loa a ovi fuli e pulepule liliki pe pulepule lalasi, mo akeno uli fuli, ti mo koti fuli e pulepule liliki pe pulepule lalasi. Ko loku totogi loa lena.

³³ E feala loa i apogipogi ke ke tio ki loku faitotonu, mo ka ke au loa o tioi loku totogi. Ko koti fuli ala e leaise pulepule liliki pe pulepule lalasi, ti mo ovi fuli ala e leaise fulu uli, e lau loa latou ko manu kaia.

³⁴ Ti na pati loa Lapane : E malie, ke fai ki le nea leia kua ke masau ki ai.

³⁵ Kae i le aso fai lena na vaei kese loa e Lapane a koti tagata fuli ala na pulepule liliki mo pulepule lalasi, mo koti fafine fuli ala na pulepule liliki pe na pulepule lalasi, ti mo ovi fuli ala na fulu uli mo pulepule liliki pe pulepule lalasi. Na tuku loa e ia le kau manu lena ki ona vosa,

³⁶ ti na kakau loa e ia latou ke ano, ti na lotou saele loa i aso e tolu o tupu ke lotou mamao meia Sakopo. Ti na tausi loa e Sakopo le toega o le kau manu a Lapane.

³⁷ Na ano loa a ia o tuuti ake ni laai laakau mata o le laakau ko le popelie mo le amatie ti mo le palatane. Na foke loa e ia le kili i le tasi a potupotu o le laakau, o tupu ke sa le tea o le kuagai laakau.

³⁸ Ti na tuku loa e ia a laai laakau ana kua oki i le foke ki loto o ganea inu o manu, o tupu ke tio ki ai a ovi fafine mo ka lotou au o iinu, ti ke lotou fia avavaga ai.

³⁹ Na fia avavaga loa a ovi i tafa o laai laakau, ti na lotou feavavagaaki loa i ai, ti na fanaui loa e ovi fafine ni uviki sikasika mo ni uviki pulepule liliki mo pulepule lalasi.

⁴⁰ Ti na vaei kese loa e Sakopo a akeno, o fakatasii e ia ala e pulepule mo la e fulu uli i le kau manu a Lapane. Na kamata fakatupu loa e Sakopo ana kau manu, o tuku kese loa e ia latou mei kau manu a Lapane.

⁴¹ I temi fuli ala na fia avavaga ai a ovi fafine fuli ala e makeke, na tuku loa e Sakopo a laai laakau ki ganea inu o manu, ke lotou tio ki ai ti ke lotou feavavagaaki ai.

⁴² Ti kapau ko ni manu gagae, e leaise tuku loa e ia ki ai a laai laakau : Koia na maua ai loa e Lapane a manu gagae, kae na maua loa e Sakopo ala na makeke.

⁴³ Na asilisili mou koloa loa le tagata lena : Na lasi loa ana kau ovi, mo ana kau koti, mo ana fafine fakasausau, mo ana tagata fakasausau, mo ana kau kamelo, ti mo ana kau asino.