Senesi 3 - Tosi Tapu

Fakasala, siga, fakapapau

¹ Na poto lasi ake le gata i manu fuli o le vao ala na fakatupu e le Eteleno Atua. Na pati loa a ia ki le fafine : Pe na pati maoki atu le Atua : E leaise kolua kai loa ki laakau fuli o le oloto ?

² Na tali loa le fafine ki le gata : E ma kai ki fua o laakau o le oloto.

³ Kae ki le fua o le laakau leia e tuu i loto malie o le oloto, na pati le Atua : E leaise kolua kai loa ki ai ti e leaise kolua fafa loa ki ai, talie e kolua mamate loa.

⁴ Ti na pati loa le gata ki le fafine : E leaise kolua mamate loa ;

⁵ kae e iloa e le Atua, i le aso leia e kolua kai loa ki ai, e mavaa loa okoulua mata, ti e kolua tatau loa mo le Atua, o kolua iloa loa le malie mo le veli.

⁶ Ti na tio loa le fafine na malie le laakau ki le kai, mo fulumalie ki le mata, ti mo mauiga ki le fakamavaa o le atamai. Na taui loa e ia se fa fuai laakau, o kai, ti na toe soli foki e ia ki lona avaga, leia na tuu i ona tafa, ti na kai loa a ia ki ai.

⁷ Ti na mavaa loa ola mata, ti na la iloa loa e la telefua. Na la tui loa ni lau fiki, o la lava loa ki ai.

⁸ Ti na la logo loa ki le leo o le Eteleno Atua, leia na evaeva i le oloto i le afiafi, ti na mumuni loa le tagata mo lana avaga, o mamao i mata o le Eteleno, i loto o laakau o le oloto.

⁹ Kae na kalagai loa e le Eteleno Atua le tagata, o pati kiate ia : Kofea a koe ?

¹⁰ Na tali loa a ia : Na kau logo ki lou leo i le oloto, ti na kau i, talie e kau telefua, ti na kau mumuni loa.

¹¹ Ti na pati loa le Eteleno Atua : Ko ai na fakasa ia kiate koe e ke telefua ? Pe kua ke kai ki le laakau leia na kau tapui atu kiate koe ?

¹² Na tali loa le tagata : Ko le fafine leia na ke tuku mai ki oku tafa, na soli ia mai kiate au se fa fua o le laakau, ti na kau kai ki ai.

¹³ Ti na pati loa le Eteleno Atua ki le fafine : Kolea na ke fai ai le nea lena ? Na tali loa le fafine : Na kakaai au e le gata, o kau kai loa ki le fua o le laakau.

¹⁴ Na pati loa le Eteleno Atua ki le gata : Talie na ke fai le nea lena, e ke malaia loa o lasi ake i manu lalasi mo manu liliki fuli o le vao, e ke totolo loa i lou manava, ti e ke kai loa le efu i aso fuli o lou mauli.

¹⁵ E kau tuku loa le vesia iate koe mo le fafine, i lou sakoga mo lona sakoga : E takafi loa e le sakoga o le fafine lou ulu, kae e ke uuti loa lona mulivae.

¹⁶ Ti na pati loa a ia ki le fafine : E kau fakalasi loa le mamae o ou tinae, ti e ke fanau loa i le mamae, ti e ano loa ou oli ki lou avaga, kae e pule loa a ia kiate koe.

¹⁷ Ti na pati loa a ia ki le tagata : O tupu na ke fakalogo ki le leo o lau avaga, ti na ke kai ki le fua o le laakau leia na kau fakatotonu atu kiate koe : E leaise ke kai loa ki ai ! E malaia loa le kele o tupu ko koe. E ke gaoi pakia loa ke maua ai lau nea kai i aso fuli o lou mauli.

¹⁸ E tupu loa i le kele ni laakau talatala mo ni vao veli, ti e ke kai loa le mutie o faisaga.

¹⁹ E ke kai loa lau pane i le kavakavaia o lou lae, o kaku ki le aso leia e ke toe liliu ai loa ki le kele, leia na ke too mei ai ; talie ko le efu a koe, ti e ke toe liliu loa ki le efu.

²⁰ Na soli loa e Atama ki lana avaga le igoa ko Eva : talie ko le tinana a ia o kakai mauli fuli.

²¹ Na fau loa e le Eteleno Atua ni kofu mei ni kilii manu kia Atama mo Eva, ti na fakakofu loa e ia laua ki ai.

²² Ti na pati loa le Eteleno Atua : Ko leinei, kua liliu le tagata ofaipe se tasi o tatou, talie kua iloa e ia le malie mo le veli. Koia ke tou taofi a ia i le aso nei ke aua na falo lona lima, o tau le laakau o le mauli o kai, ti ke mauli loa a ia o lee gato.

²³ Ti na tuku loa e le Eteleno Atua le tagata i le oloto o Eteni, ke gaoi ki le kele, leia na too a ia mei ai.

²⁴ I le oki o le kapu o Atama, na fakatuu loa e le Atua i le potu esite o le oloto o Eteni ni selupino, ke leo ia le ala ki le laakau o le mauli.