Senesi 29 - Tosi Tapu

Sakopo i Salani

¹ Na soko atu loa e Sakopo lona fanoga, ti na ano loa a ia ki le fenua o vosa o le potu Esite.

² I se aso, na tio loa a ia ki se sosoni leia na tuu i loto o faisaga ; ti na i ai ni kau ovi e tolu ala na malolo i ona tafatafa, talie na fakainu i le sosoni lena a kau manu. Ti na lasi ai le fatu leia na tapono ki ai le sosoni.

³ Na fakatasi a kau manu fuli ki ai ; na tekai loa le fatu mei le gutu o le sosoni, kae fakainu loa a manu, ti na toe teki loa le fatu ki le gutu o le sosoni.

⁴ Na pati loa Sakopo ki le kau tausi manu : Ei oku fetaina, pe kotou au meifea ? Na lotou tali loa : E motou nofo i Salani.

⁵ Na pati loa a ia kia latou : Pe kotou iloa Lapane, ko le vosa o Nakole ? Na lotou tali loa : E motou iloa a ia.

⁶ Na pati loa a ia kia latou : Pe malolo a ia ? Na lotou tali loa : E malolo a ia ; ti ko leinei lona taine ko Lasele e au mo lana kau manu.

⁷ Na pati loa a ia : Koi loa ai le aso, e leikiaise tatae le temi leia e tonu ke tanaki ai a kau manu ; kotou fakainu a ovi, ti kotou ano o tuku latou ke kai saele.

⁸ Na lotou tali loa : E leaise feala ke motou fai le nea lena, kae e leikiaise tanaki mai a kau manu fuli i mua ; ti e tekai loa le fatu i le gutu o le sosoni, ti e fakainu loa a ovi.

⁹ Koi lolotoga masau a ia kia latou, kae kaku ake loa Lasele mo le kau manu a lona tamana, talie na tausi manu a ia.

¹⁰ I le tio a Sakopo kia Lasele, le taine o Lapane, le tuagaane o lona tinana, mo le kau manu a Lapane, le tuagaane o lona tinana, na soso loa a ia ki le sosoni, o tekai kese le fatu i le gutu o le sosoni, kae fakainu loa e ia le kau manu a Lapane, le tuagaane o lona tinana.

¹¹ Ti na sogi loa Sakopo kia Lasele, ti na tagi leo lasi loa a ia.

¹² Na fakasa loa e Sakopo kia Lasele ko le famili totonu a ia o lona tamana, ko le tama a ia o Lepeka. Ti na makape loa Lasele o fakasa ki lona tamana.

¹³ I le logo a Lapane ki le masau kia Sakopo, le tama o lona tuagaane, na makape loa a ia ki ona mua, o luluku a ia ki ona lima, o sogi kiate ia, ti na taki ake loa e ia a ia ki lona fale. Na fakamatala loa e Sakopo kia Lapane a nea fuli ala na soko kiate ia.

¹⁴ Ti na pati loa Lapane kiate ia : E maoki ko koe ko loku ivi ti ko loku kanofi. Na nofo loa Sakopo i le masina e tasi i le fale o Lapane.

Lea mo Lasele

¹⁵ I se aso na pati loa Lapane kia Sakopo : Ko loku famili totonu a koe, kae e leaise ko se tupuaga lena ke ke gaoi noa kiate au : Fakasa mai kiate au pe kolea lou totogi !

¹⁶ Na i ai ni taineliki e toka lua o Lapane : Na igoa le uluaki ko Lea, ti na igoa le lua ko Lasele.

¹⁷ Na mata fuluveli a Lea, kae na fuafuamalie mo fulumalie a Lasele.

¹⁸ Na mamana Sakopo kia Lasele, ti na pati loa a ia : E kau fakasausau loa kiate koe i fetuu e fitu ki le lua o ou taine, ko Lasele.

¹⁹ Ti na pati loa Lapane : E kau malie ia ake lona soli atu kiate koe, i lona soli ki se tagata kese. Nofo i loku fale !

²⁰ Ti na gaoi loa Sakopo i fetuu e fitu kia Lasele ; kae na fai loa a fetuu ana kiate ia pe ni ga aso teiki fua, i le lasi o lona alofa kia Lasele.

²¹ I le oki o fetuu ana, na pati loa Sakopo kia Lapane : Soli mai kiate au laku avaga, talie kua katoa loku temi, ti e kau ano loa kiate ia.

²² Na fakaafe loa e Lapane le kakai fuli o le ganea lena ki le kaitasi o le avaga.

²³ I le afiafi pouli, na too loa e Lapane lona taine ko Lea, o ave kia Sakopo. Ti na ano loa Sakopo kia Lea.

²⁴ Na soli foki e Lapane ki lona taine ko Lea le fafine fakasausau ko Silipa ke kaunaga kiate ia.

²⁵ I le ala usu ake, na tio loa Sakopo ko Lea. Ti na pati loa Sakopo kia Lapane : Kolea le nea leia kua ke fai kiate au ? Pe na leaise kau gaoi i lou fale kia Lasele ? Kolea kua ke kakai ai au ?

²⁶ Na pati loa Lapane : E leaise ko le aga masani o le fenua leinei ke fakaavaga le taine muli i mua o le taine uluaki.

²⁷ Fakaoki le vasaa mo le uluaki. E motou toe soli atu loa kiate koe mo Lasele, ti e ke toe gaoi loa kiate au i ni iki ake fetuu e fitu.

²⁸ Na fai loa Sakopo ki ai, ti na fakaoki loa e ia le vasaa mo Lea. Ti na soli loa e Lapane kiate ia lona taine ko Lasele ke avaga mo ia.

²⁹ Ti na soli foki e Lapane ki lona taine ko Lasele le fafine fakasausau ko Pila ke kaunaga kiate ia.

³⁰ Na ano loa Sakopo kia Lasele, ti na alofa loa a ia kiate ia o lasi ake ia Lea. Ti na toe gaoi loa a ia i le fale o Lapane i ni iki ake fetuu e fitu.

Fanau a Sakopo

³¹ Na tio loa le Eteleno na leaise alofa Sakopo kia Lea ; ti na fakafanaunau loa e ia a Lea, kae fakapaa loa e ia a Lasele.

³² Na tinae loa a Lea, ti na fanaui loa e ia se tama, o fakaigoa loa e ia ko Lupeni, talie na pati loa a ia : Kua tio le Eteleno ki loku fakataulaloi. I le aso nei e alofa loa loku avaga kiate au.

³³ Na toe tinae loa a ia, ti na fanaui loa e ia se tasi a tama, ti na pati loa a ia : Kua iloa e le Eteleno e leaise alofaia au, ti kua soli mai e ia kiate au le vosa leinei. Ti na soli loa e ia kiate ia le igoa ko Simeone.

³⁴ Na toe tinae loa a ia, o fanaui loa e ia se tasi a tama, ti na pati loa a ia : I le faiaga loa leinei, e pipiki loa loku avaga kiate au, talie kua kau fanaui kiate ia ni vosa e tolu. Ti na soli loa e ia ki le vosa lena le igoa ko Levi.

³⁵ Na toe tinae loa a ia, o fanaui loa e ia se tasi a tama, ti na pati loa a ia : I le faiaga loa leinei, e kau fakavikiviki loa ki le Eteleno. Ti na soli loa e ia ki le vosa lena le igoa ko Suta. Ti na gato loa lana fanaunau.