Senesi 27 - Tosi Tapu

Kaia o le tapuaki e Sakopo

¹ Na matua Isaake, ti kua fakapouli ona mata, ti na leaise koi tio a ia. I se aso, na kalagai loa e ia Esau, lona vosa uluaki, o pati kiate ia : Ei loku vosa ! Na tali loa Esau : Ko leinei au !

² Na pati loa Isaake : Ko leinei foki kua kau matua, ti e leaise kau iloa le aso o loku mate.

³ Koia i le aso nei, e kau kole atu ai kiate koe ke ke too au masafu, mo lau kalolo, mo lau taga gasau, ti ke ano ki le vao o fanai mai se manu kiate au.

⁴ Teuteui mai loa kiate au se nea kai leia e kau manako ki ai, ti ke aumai loa a ia kiate au ke kau kai, o tupu ke kau tapuaki loa kiate koe i mua o loku mate.

⁵ Na logo loa Lepeka ki le masau a Isaake ki lona vosa ko Esau. Ti na ano loa Esau ki le vao o fana ke aumai se manu ki lona tamana.

⁶ Na pati loa Lepeka ki lona tama ko Sakopo : Ko leinei, na kau logo kua masau lou tamana ki lou taina ko Esau, o pati :

⁷ Aumai kiate au se manu, ti ke teuteui mai kiate au se nea kai ke kau kai ; ti e kau tapuaki loa kiate koe i mua o le Eteleno, i mua o loku mate.

⁸ I le temi nei, ei loku tama, fakalogo mai ki loku leo, ti ke fai a nea fuli ala e kau fakatotonu atu kiate koe.

⁹ Ano ki le kau manu, o too i ai ni uviki koti e lua, o aumai laua kiate au ; e kau teuteui loa ki lou tamana se nea kai leia e manako ki ai,

¹⁰ ti e ke ave loa a ia ke kai e lou tamana, o tupu ke tapuaki atu loa a ia kiate koe i mua o lona mate.

¹¹ Na tali loa Sakopo ki lona tinana : Ko leinei, e fulufulu loku taina ko Esau, kae e leaise kau fulufulu.

¹² Ti kapau e fafa mai loa loku tamana kiate au, ti e kau liliu loa kiate ia ko se tagata kaka, ti e kau aumai loa le malaia kiate au, kae leai le tapuaki.

¹³ Na pati loa lona tinana kiate ia : Ei loku tama, ke vilo le malaia lena kiate au ! Fakalogo mai fua ki loku leo, ti ke ano o too mai a manu.

¹⁴ Na ano loa Sakopo o too a manu o aumai ki lona tinana, leia na teuteui ia loa se nea kai leia na manako ki ai Isaake.

¹⁵ Ti na too loa e Lepeka a kofu o Esau ko lona tama uluaki, ona kofu fulumalie ala na tuku i fale, ti na fakatui loa e ia latou kia Sakopo, lona tama muli.

¹⁶ Ti na kofu loa e ia a lima o Sakopo ki le kilii koti, mo lona ua leia na leaise fulufulu.

¹⁷ Ti na teki loa e ia ki lima o lona tama ko Sakopo le nea kai mo le pane ala na teuteui e ia.

¹⁸ Ti na ano loa Sakopo ki lona tamana, o pati : Ei loku tamana ! Ti na pati loa Isaake : Ko leinei au ! Ko ai a koe, ei loku vosa ?

¹⁹ Ti na tali loa Sakopo ki lona tamana : Ko au ko Esau, ko lou vosa uluaki ; kua kau fai le nea leia na ke pati mai ki ai. E kau kole atu kiate koe ke ke tuu la ki aluga o tonatona, ti ke ke kai ki le manu leia kua kau teuteui, o tupu ke ke tapuaki mai loa kiate au.

²⁰ Ti na pati loa Isaake ki lona vosa : Ei loku vosa, ki le vave nei o lau maua le manu ! Ti na tali loa Sakopo : Talie ko le Eteleno lou Atua, leia na aumai ia le manu ki oku mua.

²¹ Ti na pati loa Isaake kia Sakopo : Soso mai ake ke kau fafa kiate koe, ei loku vosa, ti ke kau iloa pe ko koe ko loku vosa totonu ko Esau, pe leai.

²² Na soso ake loa Sakopo kia Isaake lona tamana, ti na fafa loa Isaake kiate ia, o pati : Ko le leo, ko leia o Sakopo, kae ki lima, ko la o Esau.

²³ Na leaise iloa loa e ia ko Sakopo, talie na fulufulu ona lima ofaipe lima o lona taina ko Esau. Ti na tapuaki loa a ia kiate ia.

²⁴ Na pati loa a ia : Pe ko koe ko loku vosa ko Esau ? Ti na tali loa Sakopo : Ko au.

²⁵ Ti na pati loa Isaake : Fakafeofi mai le nea kai kiate au, ke kau kai ki le manu o loku vosa, ti ke kau tuku kiate koe laku tapuaki. Na avake loa e Sakopo le nea kai ki lona tamana, ti na kai loa a ia ; na toe avake foki e Sakopo kiate ia se vino, ti na inu loa a ia.

²⁶ Ti na pati loa Isaake lona tamana kiate ia : Ke ke soso mai, ti ke sogi mai kiate au, ei loku vosa !

²⁷ Ti na soso ake loa Sakopo o sogi kiate ia. Ti na nanamu loa Isaake ki le sauga o ona kofu ; ti na tapuaki loa a ia kiate ia, o pati : Ko leinei, e tatau le sauga o loku vosa mo le sauga o se faisaga leia kua tapuakii e le Eteleno.

²⁸ Ke tuku e le Atua kiate koe le sasau o le lagi, Mo le gako o le kele, Mo le fulumeto, ti mo le vino o lasi ai !

²⁹ Ke fakalogo ni kakai kiate koe, Ti ke punou ni puleaga i ou mua ! Ke ke pule ki ou fetaina, Ti ke punou a vosa o lou tinana i ou mua ! Ke malaia leia e tutuku ia a koe, Ti ke tapuakina leia e tapuaki loa kiate koe.

³⁰ I le oki o le tapuaki a Isaake kia Sakopo, ti nao mavae atu fua Sakopo i lona tamana, kae kaku ake loa Esau lona taina mei lana kapu manu.

³¹ Na teuteui foki e ia se nea kai, o ave ki lona tamana ; ti na pati loa a ia ki lona tamana : Tuu ki aluga, ei loku tamana, ti ke kai ki le manu a lou vosa, o tupu ke tapuaki lou laumalie kiate au !

³² Na pati loa lona tamana ko Isaake kiate ia : Ko ai a koe ? Ti na tali loa a ia : Ko au Esau, lou vosa uluaki.

³³ Na lulu katoa loa Isaake i le lasi o lona ofolele, ti na pati loa a ia : Ko ai leia na kapu ia se manu o aumai kiate au ? Talie kua kau kai ki nea fuli i mua o lau kaku mai, ti kua kau tapuaki kiate ia. Koia, e tapuakina maoki loa a ia.

³⁴ I le logo a Esau ki masau a lona tamana, na tagi leo lasi loa a ia, i le lasi o lona mamae, ti na pati loa a ia ki lona tamana : Tapuaki mai foki kiate au, ei loku tamana !

³⁵ Na pati loa Isaake : Na au lou taina o kakai au, ti kua too e ia lou tapuaki.

³⁶ Na pati loa Esau : E tonu ai lona igoa leia ko Sakopo, talie ko le tua lua leinei o lana fakalaka iate au. Na uluaki too mua e ia loku tuulaga o le vosa uluaki, ti ko leinei i le aso nei kua toe too e ia loku tapuaki. Ti na toe pati loa a ia : Pe leaise ke nofo mo se tasi ake tapuaki kiate au ?

³⁷ Na tali loa Isaake kia Esau : Ko leinei, kua kau fakanofo a ia ke pule kiate koe, ti kua kau tuku ke fakasausau ona fetaina fuli kiate ia. Kua kau tuku kiate ia le fulumeto mo le vino o lasi. Kolea le nea leia ke kau toe maua loa kiate koe, ei loku vosa ?

³⁸ Na pati loa Esau ki lona tamana : Pe ko le tapuaki fua lena e tasi e ke maua, ei loku tamana ? Tapuaki mai foki kiate au, ei loku tamana ! Ti na tagi loa Esau o leo lasi.

³⁹ Na tali loa lona tamana ko Isaake kiate ia : Ko leinei ! E sala loa lou nofoaga i le gako o le kele Mo le sasau o le lagi, i aluga.

⁴⁰ E ke mauli loa ki lau seleta, Ti e ke fakasausau loa ki lou taina. Kae i se aso e ke lauatea loa meiate ia, Ti e ke fatii loa le laakau o le popula leia e teki loa e ia ki lou ua, Ti e ke tiaki loa a ia ki mamao.

⁴¹ Na somo loa i le loto o Esau se vesia lasi kia Sakopo, o tupu ko le tapuaki leia na tuku kiate ia e lola tamana ; ti na pati loa Esau i lona loto : Kua vave fua a aso o le putu o loku tamana, ti e kau tamate loa loku taina ko Sakopo.

⁴² Na fakasa loa kia Lepeka a masau o lona tama uluaki ko Esau. Ti na kalagai loa e ia lona tama muli ko Sakopo, o pati kiate ia : Ko leinei, e fia taui e lou taina ko Esau kiate koe, ti e afa e ia ke tamate a koe.

⁴³ Koia ei loku tama, i le aso nei fakalogo mai ki loku leo ! Tuu o sola ki loku tuagaane ko Lapane, i Salani ;

⁴⁴ ti ke nofo loa i ai i se ga temi ikiiki,

⁴⁵ o kaku ki le fimalie o le loto o lou taina, ki le oki o lona ita kiate koe, ti ke galoi e ia le nea leia na ke fai kiate ia. E kau toe tuku logo atu loa kiate koe ke ke toe liliu mai. Kolea e kau sala ai loa mo koulua toka lua i se aso e tasi ?

⁴⁶ Na pati loa Lepeka kia Isaake : Kua kau fakalialia ki le mauli o tupu ko oku fugao, a taineliki o Eti. Kapau e toe avaga loa Sakopo mo se taine o Eti, ofaipe laua anei, kolea loa le uiga o le mauli kiate au ?